
(फोटो सौजन्य- सोशल मीडिया)
Priyanka Chopra: बॉलिवूड अभिनेत्री प्रियंका चोप्रा सातासमुद्रापार राहत असली तरी भारतीय संस्कृती आणि संस्कार जपताना अनेकदा दिसते. परदेशात राहूनही तिने आपल्या संस्कारांचा वारसा जपला आहे. नुकतेच प्रियंकाने तिच्या इन्स्टाग्राम अकाऊंटवर आयुष्यातील काही खास क्षण शेअर केले. समुद्रकिनाऱ्यावरील सुट्ट्यांपासून ते चित्रपटाच्या सेटवरील आठवणींपर्यंत अनेक फोटो आणि व्हिडीओ या पोस्टमध्ये पाहायला मिळतात. मात्र, यातील एका व्हिडीओने चाहत्यांचे विशेष लक्ष वेधून घेतले असून तो सोशल मीडियावर व्हायरल होत आहे.
या व्हिडीओमध्ये प्रियंका चोप्राची मुलगी मालती मेरी आईसोबत बसून गायत्री मंत्र म्हणताना दिसत आहे. मालतीचा निरागस आवाज आणि आईसोबतचा हा सुंदर क्षण चाहत्यांना भावला आहे. हा व्हिडीओ शेअर करताना प्रियंकाने चाहत्यांना आवाज सुरू करण्याचे आवाहन केले आहे. आई आणि मुलीचा हा खास क्षण पाहून नेटकरी तिच्यावर प्रेमाचा वर्षाव करत आहेत. मालतीला लहानपणापासून भारतीय संस्कृती आणि परंपरांची ओळख करून देण्याचा प्रियंकाचा प्रयत्न या व्हिडीओतून दिसून येतो.
या फोटो आणि व्हिडीओंच्या कॅप्शनमध्ये प्रियंकाने, “आजकाल… मी खूप व्यस्त आहे… पण एका स्वप्नवत ठिकाणी. #BlueFly. आवाज सुरू करा,” असे लिहिले आहे. तिच्या या पोस्टला चाहत्यांकडून चांगला प्रतिसाद मिळत असून अनेकांनी मालतीच्या गोड आवाजाचे आणि प्रियंकाच्या संस्कारांचे कौतुक केले आहे.
प्रियंकाने अनेक मुलाखतींमध्ये मुलगी मालती मेरीबद्दल मनमोकळेपणाने सांगितले आहे. मे महिन्यात ‘वोग अरेबिया’ला दिलेल्या मुलाखतीत तिने काम आणि कुटुंब यांच्यात समतोल साधण्याबद्दल भाष्य केले होते. यावेळी तिने पती निक जोनासचेही कौतुक केले. निक मालतीच्या संगोपनात सक्रिय सहभाग घेतो, असे तिने सांगितले. प्रियंकाच्या दैनंदिन दिनचर्येपासून ते कामाच्या नियोजनापर्यंत अनेक गोष्टी मालतीभोवती केंद्रित असतात. तिने मालतीला आपल्या आयुष्यातील सर्वात महत्त्वाची उपलब्धी असल्याचेही म्हटले आहे.
निक जोनासनेही अनेक मुलाखतींमध्ये मालतीला दोन्ही कुटुंबांच्या संस्कृती आणि परंपरांशी जोडून ठेवण्याची इच्छा व्यक्त केली आहे. ‘पीपल’ मासिकाला दिलेल्या मुलाखतीत त्याने मालतीच्या संगोपनात भारतीय आणि अमेरिकन अशा दोन्ही संस्कृतींतील महत्त्वाच्या परंपरांचा समावेश करण्याबद्दल सांगितले होते. प्रियंका मालतीला गायत्री मंत्र शिकवत असल्याचा हा व्हिडीओ त्यांच्या कौटुंबिक विचारांची आणि संस्कारांची सुंदर झलक दाखवतो. त्यामुळेच मालतीचा हा गोड व्हिडीओ चाहत्यांच्या पसंतीस उतरला आहे.