रविवार, 27 सप्टेंबर 2026
(फोटो सौजन्य- सोशल मीडिया)
Ranbir Kapoor: रणबीर कपूरचा आगामी ‘रामायण’ चित्रपट सध्या चर्चेत आहे. त्याचबरोबर संजय लीला भन्साळी यांच्या ‘लव्ह अँड वॉर’ या चित्रपटाचीही प्रेक्षकांमध्ये उत्सुकता आहे. रणबीर कपूर, आलिया भट्ट आणि विकी कौशल पहिल्यांदाच या चित्रपटाच्या निमित्ताने एकत्र पडद्यावर दिसणार आहेत. दरम्यान, या चित्रपटाच्या टीमचा एक व्हिडीओ सोशल मीडियावर व्हायरल झाला असून, यामध्ये रणबीर कपूर एका फोटोग्राफरवर नाराज होताना दिसत आहे.
२६ सप्टेंबरच्या रात्री रणबीर कपूर, आलिया भट्ट, विकी कौशल आणि दिग्दर्शक संजय लीला भन्साळी मुंबईत एकत्र दिसले. चौघांनीही फोटोग्राफर्ससमोर काही वेळ पोज दिल्या. यावेळी रणबीरने संजय लीला भन्साळी यांनाही फोटोसाठी पुन्हा फ्रेममध्ये येण्यास सांगितल्याचं समोर आलं आहे.
मात्र, फोटोसेशन संपवून सर्वजण निघत असताना एका फोटोग्राफरकडून रणबीरला वारंवार पोज देण्यास सांगितलं जात होतं. तो फोटोग्राफर रणबीरला आलिया आणि विकीसोबत पुन्हा फोटो देण्यास सांगत होता. यामुळे रणबीर काहीसा नाराज झाल्याचं व्हिडीओमध्ये दिसत आहे.
‘बहुत बोल रहा है तू…’ म्हणत रणबीरची प्रतिक्रिया
रणबीर तिथून निघत असताना फोटोग्राफरच्या बोलण्यावर त्याने मागे वळून प्रतिक्रिया दिली. “बहुत बोल रहा है तू हा” असं रणबीर म्हणताना ऐकू येत आहे. या छोट्याशा प्रसंगाचा व्हिडीओ सोशल मीडियावर मोठ्या प्रमाणात शेअर केला जात आहे.
या प्रसंगानंतर रणबीर आलियासोबत गाडीकडे जाताना दिसला. व्हिडीओ समोर आल्यानंतर नेटकऱ्यांमध्येही या घटनेची चर्चा सुरू झाली आहे.
संजय लीला भन्साळी दिग्दर्शित ‘लव्ह अँड वॉर’ हा चित्रपट रणबीर कपूर, आलिया भट्ट आणि विकी कौशल यांना पहिल्यांदाच एकाच चित्रपटात घेऊन येणार आहे. चित्रपटाची कथा आणि पात्रांबाबत निर्मात्यांनी अद्याप बरीच माहिती गुप्त ठेवली आहे. मात्र, माध्यमांमधील वृत्तांनुसार हा ऐतिहासिक पार्श्वभूमीवर आधारित रोमँटिक वॉर ड्रामा असल्याचं सांगितलं जात आहे.
रणबीर आणि आलिया यापूर्वी ‘ब्रह्मास्त्र’मध्ये एकत्र दिसले आहेत. रणबीर आणि विकी यांनी ‘संजू’मध्ये काम केलं आहे, तर आलिया आणि विकीची जोडी ‘राझी’मध्ये पाहायला मिळाली होती. आता हे तिन्ही कलाकार पहिल्यांदाच एकाच पडद्यावर दिसणार असल्याने चित्रपटाबाबत उत्सुकता वाढली आहे.
२१ जानेवारी २०२७ रोजी प्रदर्शित होणार चित्रपट
‘लव्ह अँड वॉर’च्या प्रदर्शनाची तारीख २१ जानेवारी २०२७ अशी निश्चित करण्यात आली आहे. दरम्यान, रणबीर कपूरचा ‘रामायण – पार्ट वन’ हा चित्रपट दिवाळी २०२६मध्ये प्रदर्शित होणार आहे. त्यामुळे पुढील काळात रणबीरचे दोन मोठे प्रोजेक्ट प्रेक्षकांच्या भेटीला येणार आहेत.
