बुधवार, 11 नोव्हेंबर 2026
(फोटो सौजन्य- सोशल मीडिया)
Ranveer Singh Grandfather Death: बॉलिवूड अभिनेता रणवीर सिंहच्या कुटुंबातून एक दुःखद बातमी समोर आली आहे. रणवीरचे आजोबा डॉ. राम हिंगोराणी यांचं दिवाळीच्या दिवशी वयाच्या ९६व्या वर्षी निधन झालं. ८ नोव्हेंबर रोजी लक्ष्मीपूजेच्या वेळी त्यांनी अखेरचा श्वास घेतला. रणवीरची चुलत बहीण सौम्या हिंगोराणी हिने सोशल मीडियावर पोस्ट शेअर करत आजोबांच्या निधनाची माहिती दिली. मात्र, दुःख व्यक्त करण्याऐवजी तिने त्यांच्या आयुष्यातील सुंदर आठवणींना उजाळा देत त्यांना ‘रॉकस्टार’ म्हटलं आहे.
सौम्या हिंगोराणीने मंगळवारी रात्री इन्स्टाग्रामवर डॉ. राम हिंगोराणी यांचे अनेक जुने फोटो आणि व्हिडिओ शेअर केले. कुटुंबातील सर्वजण त्यांना प्रेमाने ‘दादू’ म्हणत असत. या पोस्टमध्ये सौम्याने आजोबांसोबतच्या आठवणी सांगताना त्यांच्या आयुष्याचा आनंद साजरा केला.
तिने लिहिलं, “वयाच्या ९६व्या वर्षी… हे एक अद्भुत आयुष्य होतं, जे साजरं करण्यासारखं आहे, शोक करण्यासारखं नाही. माझे आजोबा डॉ. राम दिवाळीच्या दिवशी माझ्या आजीकडे जाण्यासाठी शांतपणे आम्हाला सोडून गेले. त्यांनी यापेक्षा अधिक शुभ वेळ निवडली नसती.”
पुढे तिने लक्ष्मीपूजेच्या खास क्षणाचा उल्लेख करत लिहिलं की, दिवसातील सर्वात खास वेळी, लक्ष्मीपूजेच्या वेळी आजी-आजोबा एकत्र असतील. दोघेही खुर्च्यांवर बसून व्हिस्की पीत असतील आणि आपल्याला एकत्र पाहून आनंदी असतील, अशी भावना तिने व्यक्त केली.
“जगातील सर्वोत्तम आजोबा असल्याबद्दल धन्यवाद. आम्हाला सर्व काही दिल्याबद्दल धन्यवाद. आपण पुन्हा एकत्र नाचेपर्यंत माझ्यासाठी आईस्क्रीमचा एक स्कूप वाचवून ठेवा. हरी ओम,” अशा शब्दांत सौम्याने आपल्या भावना व्यक्त केल्या.
रणवीर सिंहही आजोबांच्या होता खूप जवळ
रणवीर सिंहचं आपल्या आजोबांशी खास नातं होतं. अभिनेता अनेकदा सोशल मीडियावर त्यांच्यासोबतचे फोटो आणि व्हिडिओ शेअर करत असे. आजोबांचाही रणवीरप्रमाणेच उत्साही आणि दिलखुलास स्वभाव होता. त्यांच्या व्हिडिओंमधून त्यांचं विनोदी व्यक्तिमत्त्व आणि आयुष्य जगण्याची जिद्द दिसून येत असे.
२०२३ मध्ये ‘रॉकी और रानी की प्रेम कहानी’ या चित्रपटाच्या प्रमोशनदरम्यान रणवीरने आजोबांचा एक खास व्हिडिओ शेअर केला होता. या व्हिडिओमध्ये डॉ. राम हिंगोराणी चित्रपटातील लोकप्रिय गाणं ‘क्या झुमका’वर थिरकताना दिसले होते. विशेष म्हणजे, त्यांनी ‘टीम रॉकी’ असलेला टी-शर्ट घातला होता.
त्यावेळी त्यांचं वय ९३ वर्षं होतं, तरीही त्यांचा उत्साह पाहण्यासारखा होता. व्हिडिओमध्ये ते रणवीरला गंमतीने म्हणाले होते, “टिक्की सोडून दे, माझ्यासाठी थोडी टकीला आण.”
हा व्हिडिओ शेअर करताना रणवीरने, “नाना खऱ्या रॉकीसारखे रॉक करत आहेत! वयाच्या ९३व्या वर्षीही रॉक करत आहेत!!!” असं कॅप्शन दिलं होतं. आजोबांच्या निधनानंतर त्यांचे हे जुने व्हिडिओ आणि आठवणी पुन्हा चर्चेत आल्या आहेत.
