
(फोटो सौजन्य- सोशल मीडिया)
Salman Khan: बॉलिवूडचा भाईजान सलमान खान पुन्हा एकदा आपल्या खास डान्स स्टाइल आणि जबरदस्त स्वॅगने प्रेक्षकांचे लक्ष वेधून घेत आहे. सलमान खानच्या आगामी ‘मातृभूमी: मे वॉर रेस्ट इन पीस’ या चित्रपटातील नवीन गाणे ‘मदिरापान’ नुकतेच प्रेक्षकांच्या भेटीला आले आहे. या गाण्यात सलमानचा हटके अंदाज, दमदार डान्स आणि सहकारी जवानांसोबतची धमाल पाहायला मिळत आहे. गाण्यामुळे चित्रपटाबद्दल चाहत्यांची उत्सुकता आणखी वाढली आहे.
‘मदिरापान’ हे गाणे लष्करी जीवनातील आनंद, मस्ती आणि जवानांमधील बंधुभावाचे दर्शन घडवते. गाण्यात सलमान खान आपल्या सहकारी जवानांसोबत डान्स करताना आणि आनंद साजरा करताना दिसत आहे. त्याचा खास स्वॅग आणि सहजसुंदर डान्स चाहत्यांना पुन्हा एकदा भुरळ घालत आहे. यासोबतच सलमान खान आणि अभिनेत्री चित्रांगदा सिंह यांची केमिस्ट्रीदेखील गाण्याच्या आकर्षणात भर घालत आहे.
‘मदिरापान’ या गाण्याला संगीतकार हिमेश रेशमिया यांनी संगीत दिले आहे. तर प्रसिद्ध नृत्यदिग्दर्शक मुदस्सर खान यांनी गाण्याचे नृत्यदिग्दर्शन केले आहे. समीर अंजान यांनी या गाण्याचे बोल लिहिले आहेत. ठेका धरायला लावणारे संगीत, दमदार डान्स आणि कलाकारांचा उत्साही अंदाज यामुळे हे गाणे प्रेक्षकांना नक्कीच आवडेल, अशी अपेक्षा व्यक्त केली जात आहे. पार्टीचा मूड तयार करणाऱ्या या गाण्याची सध्या चर्चा रंगली आहे.
अपूर्व लाखिया यांच्या दिग्दर्शनाखाली ‘मातृभूमी: मे वॉर रेस्ट इन पीस’ हा चित्रपट तयार होत आहे. सलमान खान फिल्म्सच्या बॅनरखाली या चित्रपटाची निर्मिती करण्यात आली आहे. चित्रपटाच्या संपूर्ण भारतातील वितरणाची जबाबदारी जिओ स्टुडिओजने सांभाळली आहे, तर आंतरराष्ट्रीय वितरणाची धुरा झी स्टुडिओजकडे आहे.
या चित्रपटात सलमान खान आणि चित्रांगदा सिंह महत्त्वपूर्ण भूमिकांमध्ये एकत्र दिसणार आहेत. ‘मदिरापान’ या नव्या गाण्यामुळे चित्रपटाच्या संगीताची आणि सलमानच्या पडद्यावरील अंदाजाची चाहत्यांमध्ये उत्सुकता निर्माण झाली आहे.