रविवार, 16 ऑगस्ट 2026
(फोटो सौजन्य- सोशल मिडिया)
Sohail Khan On Weight Loss:बॉलिवूड अभिनेता आणि निर्माता सोहेल खान सध्या त्याच्या बदललेल्या लूकमुळे चर्चेत आहे. ५५ वर्षीय सोहेलचं वजन अचानक कमी झाल्याने सोशल मीडियावर त्याच्या आरोग्याबाबत विविध चर्चा रंगल्या होत्या. काहींनी त्याच्या वजन कमी होण्याचा संबंध आजारपणाशी जोडला, तर काहींनी त्याने वजन कमी करण्यासाठी ‘ओझेम्पिक’ किंवा फॅट-बर्निंग सप्लिमेंट्सचा वापर केल्याचा अंदाज व्यक्त केला. मात्र, आता खुद्द सोहेल खानने या सर्व चर्चांवर स्पष्टीकरण दिलं आहे.
सोहेल खानने हिंदुस्तान टाइम्सला दिलेल्या मुलाखतीत आपल्या वजन कमी होण्यामागचं कारण सांगितलं. त्याच्या म्हणण्यानुसार, ‘द अलायन्स’ या रिअॅलिटी शोमध्ये घालवलेल्या काळाचा त्याच्या शरीरावर मोठा परिणाम झाला. सोहेलने या शोमध्ये वाइल्डकार्ड स्पर्धक म्हणून प्रवेश केला होता.
हा त्याचा पहिलाच रिअॅलिटी शो असल्याने सुरुवातीला शोच्या वातावरणाशी जुळवून घेणं त्याच्यासाठी काहीसं कठीण होतं. सुरुवातीच्या दिवसांत आपल्याला घरात गुदमरल्यासारखं वाटत असल्याचं त्याने सांगितलं. त्यातच शोच्या पहिल्याच आठवड्यात त्याला पोटाचा संसर्ग झाला.
पाच आठवडे शोमध्ये राहिला
तब्येत बिघडल्यानंतरही सोहेलने तब्बल पाच आठवडे शोमध्ये आपला प्रवास सुरू ठेवला. सहकारी स्पर्धकांकडून मिळालेलं प्रेम आणि पाठिंबा यामुळेच आपण शोमध्ये टिकून राहिलो, असं त्याने सांगितलं.
या काळात आजारपणामुळे त्याला आपल्या खाण्यापिण्याच्या सवयींवर विशेष लक्ष द्यावं लागलं. आहार आणि दिनचर्येत बदल केल्यामुळे त्याचं वजन झपाट्याने कमी झालं आणि शरीर अधिक फिट झालं.
वजन कमी करण्यासाठी औषधं किंवा सप्लिमेंट्स घेतल्याच्या चर्चांवर सोहेलने स्पष्ट शब्दांत प्रतिक्रिया दिली. ‘ओझेम्पिक नाही, फॅट बर्नर नाही,’ असं म्हणत त्याने वजन कमी करण्यासाठी अशा कोणत्याही गोष्टींचा वापर केल्याचं नाकारलं.
सोहेलच्या म्हणण्यानुसार, तो सध्या केवळ शिस्तबद्ध दिनचर्या आणि योग्य आहारावर लक्ष देत आहे. त्यामुळे त्याच्या बदललेल्या लूकमागे कोणत्याही वजन कमी करण्याच्या औषधांचा हात नसल्याचं त्याने स्पष्ट केलं आहे.
सोहेलच्या वजनाबाबत याआधी त्याचा भाऊ सलमान खान यानेही ‘द अलायन्स’मध्ये भाष्य केलं होतं. सलमान शोमध्ये सोहेलला पाठिंबा देण्यासाठी पोहोचला असताना त्याने सांगितलं होतं की सोहेलने आधीच १२ किलो वजन कमी केलं आहे.
यानंतर रिअॅलिटी शोमधील पार्टीचे फोटो आणि व्हिडिओ सोशल मीडियावर व्हायरल झाल्यानंतर त्याच्या वजनाबाबतच्या चर्चांना पुन्हा उधाण आलं. मात्र, आता सोहेल खानने स्वतः खुलासा करत या सर्व चर्चांना पूर्णविराम दिला आहे.
