बुधवार, 11 नोव्हेंबर 2026
(फोटो सौजन्य- सोशल मीडिया)
Salman Khan Maatrubhumi Trailer: बॉलिवूडचा भाईजान सलमान खान पुन्हा एकदा मोठ्या पडद्यावर दमदार अ‍ॅक्शन अवतारात दिसणार आहे. त्याच्या आगामी ‘मातृभूमी: मे वॉर रेस्ट इन पीस’ या चित्रपटाचा ट्रेलर प्रदर्शित झाला असून, त्याला प्रेक्षकांकडून चांगलीच उत्सुकता मिळत आहे. देशभक्ती, सैनिकांचं बलिदान, युद्धाचा थरार आणि त्यामागे दडलेली भावनिक वेदना यांची झलक या ट्रेलरमध्ये पाहायला मिळते. विशेष म्हणजे, हा चित्रपट केवळ युद्धभूमीवरील लढाई दाखवत नाही, तर सैनिकांच्या कुटुंबीयांच्या आयुष्यातील संघर्षही अधोरेखित करतो.
ट्रेलरमध्ये एका सैनिकाच्या आयुष्याची झलक पाहायला मिळते. देशासाठी कर्तव्य बजावताना सैनिकाला स्वतःच्या कुटुंबापासून दूर राहावं लागतं. त्याच्यासाठी प्रत्येक दिवस महत्त्वाचा असतो, तर कुटुंबासाठी त्याची प्रत्येक भेट अनमोल असते. सैनिकाच्या वर्दीमागे एक असं कुटुंब असतं, जे कायम अनिश्चिततेच्या सावटाखाली जगत असतं. प्रत्येक निरोपाच्या वेळी पुन्हा भेट होईल की नाही, ही भीती त्यांच्या मनात असते. युद्धभूमीवरील संघर्षासोबतच सैनिकांच्या कुटुंबीयांच्या भावना आणि त्यांचं बलिदानही चित्रपटातून मांडण्यात आलं आहे.
अ‍ॅक्शन, थरार आणि युद्धाची भीषणता
‘मातृभूमी’च्या ट्रेलरमध्ये जबरदस्त अ‍ॅक्शन सीन्स, हातघाईच्या लढाया आणि भव्य व्हिज्युअल्स पाहायला मिळतात. मात्र, या अ‍ॅक्शनसोबतच चित्रपट युद्धाची दुसरी बाजूही दाखवतो. युद्धाचा शेवट कोणासाठीही आनंददायी नसतो. दोन्ही बाजूंनी जीव जातात, कुटुंबं उद्ध्वस्त होतात आणि त्याचे परिणाम रणभूमीच्या पलीकडेही जाणवतात. देशभक्तीची भावना जपत शांततेचं महत्त्व अधोरेखित करणारा संदेशही या चित्रपटातून दिला जातो.
Aaj release karoon ya kal ?
Jo kal kare so aaj kar, Jo aaj kare so ab.Enjoy the trailer…..
#MaatrubhumiTrailer out now @IChitrangda @LakhiaApoorva #ZeynShaw #AbhishrriSen @JasonThamIndia @TheAnkurBhatia #HarshilShah #HeeraSohal #VipinBhardwaj @TanyaDesai4 #HimeshReshammiya @meetbros @SKFilmsOfficial @SKF_Music @RaviBasrur @cchintanshaah @ShamiraahN @editormayuresh — Salman Khan (@BeingSalmanKhan) November 10, 2026
साडेचार मिनिटांचा ट्रेलरही प्रेक्षकांना खिळवून ठेवतो
जवळपास साडेचार मिनिटांचा हा ट्रेलर अ‍ॅक्शन, भावना आणि नाट्य यांचा सुरेख मेळ साधतो. ट्रेलरची कथनशैली आणि वेग प्रेक्षकांची उत्सुकता शेवटपर्यंत टिकवून ठेवतात. पहिल्या फ्रेमपासून शेवटच्या फ्रेमपर्यंत अनेक थरारक आणि भावनिक प्रसंग पाहायला मिळतात. सलमान खानची प्रभावी स्क्रीन प्रेझेन्स, भव्य अ‍ॅक्शन सीन्स आणि देशभक्तीची भावना यामुळे चित्रपटाबद्दलची उत्सुकता आणखी वाढली आहे.
सलमान खान-चित्रांगदा सिंहची जोडी दिसणार
या चित्रपटात सलमान खानसोबत अभिनेत्री चित्रांगदा सिंह महत्त्वपूर्ण भूमिकेत दिसणार आहे. ट्रेलरमध्ये दोघांची केमिस्ट्रीही पाहायला मिळते. चित्रपटातील सुंदर लोकेशन्स, प्रभावी सिनेमॅटोग्राफी आणि संगीत यामुळे कथेला अधिक भव्य स्वरूप मिळालं आहे. सलमान खानचा अ‍ॅक्शन अवतार आणि चित्रपटातील भावनिक प्रसंग प्रेक्षकांसाठी खास आकर्षण ठरण्याची शक्यता आहे.
अपूर्व लाखिया यांच्या दिग्दर्शनाखाली ‘मातृभूमी: मे वॉर रेस्ट इन पीस’ हा चित्रपट तयार करण्यात आला आहे. सलमान खान फिल्म्सच्या बॅनरखाली या चित्रपटाची निर्मिती करण्यात आली आहे. सलमान खान आणि चित्रांगदा सिंह यांच्या प्रमुख भूमिका असलेला हा चित्रपट ४ डिसेंबर २०२६ रोजी चित्रपटगृहांमध्ये प्रदर्शित होणार आहे. आता ट्रेलरनंतर प्रेक्षकांना चित्रपटाची प्रतीक्षा लागली आहे.
