रविवार, 8 नोव्हेंबर 2026
(फोटो सौजन्य-सोशल मिडिया)
: Sugi Parivar Diwali Pahatदिवाळी म्हणजे प्रचंड उत्साह, आनंद आणि चैतन्याचा सण. अगदी लहानांपासून ते ज्येष्ठांपर्यंत प्रत्येकाच्याच चेहऱ्यावर दिवाळीच्या सणात आनंद असतो. फराळ, फटाके, रांगोळी, आकाश कंदील यासोबतच आणखी एक गोष्ट असते जी दिवाळीमध्ये असतेच असते ती म्हणजे दिवाळी पहाट! दिवाळी पहाटच्या कार्यक्रमातून सर्वांची दिवाळी संगीतमय व्हावी म्हणून ही आयोजन केलं जातं.
यंदाच्या वर्षीही अनेक ठिकाणी दिवाळी पहाट कार्यक्रम झाले मात्र, राज्यभरात दुष्काळाची परिस्थिती इतकी भीषण असताना आपण इकडे उत्साहात दिवाळीचा आनंद साजरा करावा का? अशीही चर्चा सुरू होती. मात्र, दरवर्षी दादरमध्ये दिवाळी पहाट आयोजित करणाऱ्या सुगी परिवारातर्फे एक महत्त्वपूर्ण निर्णय शेतकऱ्यांसाठी घेण्यात आला आणि या निर्णयाची घोषणा ही दिवाळी पहाट कार्यक्रमातच करण्यात आली. शेतकऱ्यांसाठी 1 कोटीपेक्षा अधिक रुपये देण्याची घोषणा करण्यात आली असून ही रक्कम मंचावरच धनादेशाच्या माध्यमातून मकरंद अनासपुरे यांच्याकडे ‘नाम फाउंडेशन’ साठी देण्यात आली. तर आणखी 51 लाख रुपयांची रक्कम ही पारिजात फाउंडेशनकडे सुपूर्त करण्यात आली. या निर्णयामुळे सुगी परिवाराचे सर्वत्र कौतुक होत असून आभारही मानले जात आहेत.
दरम्यान यंदाच्या या दिवाळी पहाट कार्यरमातील उपस्थित मान्यवरांचीही यादी भरगच्च होती… राहुल देशपांडे यांच्या गायनाने परिसर मंत्रमुग्ध झाला… तर संकर्षण कऱ्हाडे, अभि मुंडे यांच्याही सादरीकरणाने प्रेक्षक भारावून गेले. स्वप्नील जोशीही या मंचावर उपस्थित होते. शिवाय सांस्कृतिक मंत्री आशिष शेलार, अमित ठाकरे यांच्याही उपस्थितीने हा कार्यक्रम बहारदार झाला. मात्र, या सगळ्यामध्ये सुगी परिवाराचे सर्वाधिक कौतुक होतंय ते सर्वाधिक शेतकऱ्यांसाठी देण्यात आलेल्या रक्कमेमुळे.
