
(फोटो सौजन्य- सोशल मीडिया)
Tabu New Web Series:बॉलिवूडमधील प्रतिभावान अभिनेत्री तब्बू लवकरच एका नव्या भूमिकेतून प्रेक्षकांच्या भेटीला येणार आहेत. वायआरएफ एंटरटेनमेंटच्या नेटफ्लिक्सवरील आगामी ‘टनल मेन’ या सीरिजमध्ये त्या झळकणार आहेत. विशेष म्हणजे, या निमित्ताने तब्बू पहिल्यांदाच हिंदी ओरिजिनल स्ट्रीमिंग सीरिजमध्ये काम करणार आहेत. २०२३ मध्ये उत्तराखंडमध्ये झालेल्या टनेल रेस्क्यूच्या घटनेपासून प्रेरित असलेली ही काल्पनिक ड्रामा सीरिज असणार आहे.
नोव्हेंबर २०२३ मध्ये उत्तराखंडमधील कोसळलेल्या बोगद्यात अनेक कामगार अडकले होते. त्यांना सुरक्षित बाहेर काढण्यासाठी अनेक दिवस अत्यंत आव्हानात्मक बचावकार्य सुरू होते. संपूर्ण देशाचे लक्ष या मोहिमेकडे लागले होते. याच घटनेमागील जिद्द, धैर्य, सांघिक प्रयत्न आणि कठीण परिस्थितीतही कायम राहिलेली आशा या भावनांपासून ‘टनल मेन’ ही सीरिज प्रेरित आहे. ही प्रत्यक्ष घटनेवर आधारित माहितीपट नसून त्यापासून प्रेरणा घेतलेली काल्पनिक ड्रामा सीरिज आहे.
तीन दशकांहून अधिक काळ तब्बूचा अभिनयाचा प्रवास
तब्बू यांनी आपल्या तीन दशकांहून अधिक काळाच्या कारकिर्दीत हिंदीसह विविध भाषांमधील चित्रपटांतून अभिनयाची छाप पाडली आहे. ‘माचिस’ आणि ‘चांदनी बार’ या चित्रपटांमधील अभिनयासाठी त्यांना राष्ट्रीय चित्रपट पुरस्काराने सन्मानित करण्यात आले. याशिवाय ‘मकबूल’, ‘हैदर’ आणि ‘अंधाधुन’ यांसारख्या चित्रपटांमधील त्यांच्या भूमिका विशेष गाजल्या.
आंतरराष्ट्रीय स्तरावरही तब्बू यांनी आपल्या अभिनयाची छाप उमटवली आहे. मीरा नायर यांच्या ‘द नेमसेक’मध्ये त्यांनी अशिमा गांगुलीची भूमिका साकारली होती. तसेच आंग ली यांच्या ‘लाइफ ऑफ पाय’ आणि ‘ड्यून: प्रोफेसी’ या प्रोजेक्ट्समध्येही त्या झळकल्या आहेत. ‘ड्यून: प्रोफेसी’मध्ये त्यांनी सिस्टर फ्रान्सेस्का ही भूमिका साकारली होती.
‘द रेल्वे मेन’चे दिग्दर्शक सांभाळणार शोरनरची जबाबदारी
‘टनल मेन’ या सीरिजच्या शोरनरपदाची जबाबदारी शिव रवैल सांभाळणार आहेत. त्यांनी यापूर्वी ‘द रेल्वे मेन’ या सीरिजचे दिग्दर्शन केले होते. आता ‘टनल मेन’मधून धैर्य, जिद्द आणि मानवी संवेदनशीलतेची नवी कथा ते प्रेक्षकांसमोर आणणार आहेत.
वायआरएफ एंटरटेनमेंटमध्ये सीईओ अक्षय विधानी यांच्या नेतृत्वाखाली हेड ऑफ कंटेंट म्हणून रुजू झाल्यानंतर सौगता मुखर्जी यांचा ‘टनल मेन’ हा पहिलाच प्रोजेक्ट आहे. यापूर्वी त्यांनी ‘स्कॅम १९९२’, ‘महारानी’, ‘तब्बर’ आणि ‘रॉकेट बॉईज’ यांसारख्या लोकप्रिय सीरिजशी संबंधित काम केले आहे. त्यांच्या कामाशी संबंधित ‘आर्या’, ‘रॉकेट बॉईज’ आणि ‘रिअल काश्मीर फुटबॉल क्लब’ या सीरिजना इंटरनॅशनल एमी पुरस्कारांसाठी नामांकन मिळाले होते.
‘टनल मेन’ नेटफ्लिक्सवर प्रदर्शित होणार आहे. या सीरिजच्या निमित्ताने वायआरएफ एंटरटेनमेंट आणि नेटफ्लिक्स यांच्यातील क्रिएटिव्ह भागीदारी पुढे सुरू राहणार आहे. या भागीदारीची सुरुवात २०२३ मध्ये ‘द रोमँटिक्स’ या सीरिजपासून झाली होती. आता तब्बूंच्या सहभागामुळे ‘टनल मेन’बद्दल प्रेक्षकांमध्ये उत्सुकता निर्माण झाली आहे.