(फोटो सौजन्य- सोशल मीडिया)
ट्विंकल खन्नाने ‘टाइम्स ऑफ इंडिया’मधील आपल्या कॉलममध्ये तुकाराम मुंढे यांच्या कारवाईवर मिश्कील भाष्य केलं आहे. यामध्ये तिने अन्नातील भेसळ, पनीरची गुणवत्ता आणि रेस्टॉरंटमधील खाद्यपदार्थांबाबत निर्माण झालेल्या भीतीवर विनोदी शैलीत भाष्य केलं.
ट्विंकलने आपल्या कॉलममध्ये महाराष्ट्र FDAच्या कारवाईचा उल्लेख करताना सांगितलं की, तुकाराम मुंढे यांनी राज्यभरात मोठ्या प्रमाणावर तपासण्या आणि छापेमारी केली आहे. नियमांचे उल्लंघन करणाऱ्या अनेक रेस्टॉरंट्सवर कारवाई करण्यात आली असून काही ठिकाणी परवानेही रद्द करण्यात आले आहेत.
ट्विंकलने आपल्या नेहमीच्या मिश्कील शैलीत मुंढे यांच्या कारवाईचा संदर्भ देत लिहिलं की, ते जिथे जातात तिथे मोठ्या लोकांची ‘मुंडी’ पडते.
नकली पनीरच्या चर्चेनंतर आपण आणि आपली आई डिंपल कपाडिया यांनी घरच्या घरी पनीर बनवण्यास सुरुवात केल्याचं ट्विंकलने सांगितलं.
तिने लिहिलं की, त्यांच्या घरी एक लिटर दुधापासून डिंपल २५० ग्रॅम पनीर बनवतात, तर ट्विंकलला त्याच प्रमाणात दुधापासून केवळ १८० ग्रॅम पनीर मिळतं. आता त्यांच्या दोघींमध्ये पनीरच्या प्रमाणासोबतच त्याच्या चवीवरूनही मजेशीर स्पर्धा सुरू झाली आहे.
ट्विंकलने पुढे लिहिताना या स्पर्धेचा रंग आणखी वाढण्याची शक्यता व्यक्त केली. उद्या आईसोबत कोणाचं पनीर जास्त पांढरं आहे, यावरूनही वाद सुरू होऊ शकतो, असं तिने विनोदी अंदाजात म्हटलं. याच संदर्भात तिने खाद्यपदार्थांमध्ये चुकीच्या पदार्थांचा वापर केल्याने होणाऱ्या धोक्यांवरही भाष्य केलं.
तिने बिहारमधील नालंदा जिल्ह्यात मीठाऐवजी डिटर्जंटचा वापर झाल्याने काही विद्यार्थ्यांची प्रकृती बिघडल्याच्या घटनेचाही उल्लेख केला.
Is it really so rare to see a government official simply doing his job that it has become news? https://t.co/AGG7DOUBDX pic.twitter.com/F4ZYwrDXN1 — Twinkle Khanna (@mrsfunnybones) August 30, 2026
ट्विंकलने आपल्या कॉलममध्ये एक काल्पनिक प्रसंगही रंगवला आहे. ती मित्रांसोबत रेस्टॉरंटमध्ये जाते आणि तंदुरी ब्रोकोली तसेच चिकन टिक्का ऑर्डर करते. त्यानंतर पनीर टिक्का ऑर्डर करण्यापूर्वी ती वेटरला रेस्टॉरंटची तुकाराम मुंढे यांनी तपासणी केली आहे का, असा प्रश्न विचारते.
वेटरने ‘हो, गेल्या आठवड्यात तपासणी झाली आणि आम्ही पास झालो,’ असं सांगितल्यानंतरच ती पनीर टिक्का ऑर्डर करण्यास तयार होते, असा मजेशीर प्रसंग ट्विंकलने सांगितला आहे
ट्विंकलने पुढे आणखी मजेशीर किस्सा सांगितला आहे. पनीरचा एक तुकडा टूथपिकवर घेतल्यानंतर तो थेट तिच्या मार्टिनीमध्ये पडतो. त्यानंतर ती या प्रसंगाला तुकाराम मुंढेंच्या नावाने टोस्ट करण्याची कल्पना करते.
ट्विंकलने या काल्पनिक ड्रिंकला ‘मुंढेंची मार्टिनी’ असं नाव दिलं आहे. जिन, वर्मुथ, ऑलिव्ह आणि पनीर यांचं हे भन्नाट मिश्रण असल्याचं तिने मिश्कीलपणे लिहिलं आहे.
ट्विंकल खन्नाच्या या विनोदी लेखातून अन्नातील भेसळ आणि खाद्यपदार्थांच्या गुणवत्तेबाबत सध्या निर्माण झालेली चिंता वेगळ्या पद्धतीने समोर आली आहे. तुकाराम मुंढेंच्या कारवाईचा संदर्भ घेत तिने आपल्या आणि आई डिंपल कपाडियाच्या घरगुती पनीर बनवण्याच्या अनुभवाला मजेशीर ट्विस्ट दिला आहे.
.png "Videos"){kind=small}
