Tukaram Mundhe
महाराष्ट्रात अन्न व औषध प्रशासनाच्या (FDA) कारवायांमुळे सध्या व्यापारी आणि व्यावसायिकांमध्ये खळबळ उडाली आहे. सणासुदीच्या पार्श्वभूमीवर भेसळयुक्त, खराब आणि नियमबाह्य अन्नपदार्थांविरोधात कारवाई सुरू असतानाच, काही अधिकारी आपल्या कार्यक्षेत्राबाहेर जाऊन कारवाई करत असल्याच्या तक्रारी समोर आल्या आहेत.
अन्न व औषध प्रशासन खात्याचे मंत्री नरहरी झिरवाळ यांनी संबंधित अधिकाऱ्यांना थेट इशारा दिला आहे. नियमांच्या बाहेर जाऊन कारवाई केल्याचे सिद्ध झाल्यास दोषींवर निलंबनाची कारवाई होऊ शकते, असे त्यांनी स्पष्ट केले.
FDA आयुक्त तुकाराम मुंढे यांच्या निर्देशानुसार राज्यात भेसळयुक्त आणि नियमबाह्य अन्नपदार्थांविरोधात कारवाई केली जात आहे. दसरा आणि दिवाळीच्या पार्श्वभूमीवर तपासणी मोहिमांनाही वेग आला आहे. मात्र, काही ठिकाणी अधिकाऱ्यांकडून अधिकारक्षेत्राबाहेर जाऊन कारवाई होत असल्याचा आरोप आस्थापनाधारकांकडून करण्यात येत आहे.
या प्रकरणावर प्रतिक्रिया देताना मंत्री नरहरी झिरवाळ यांनी दोषी अधिकाऱ्यांवर कारवाई केली जाईल, असे सांगितले. संबंधित प्रकरणात पाच ते सात अधिकारी किंवा अन्य व्यक्ती दोषी आढळल्यास त्यांच्यावर निश्चितपणे कारवाई केली जाईल, असेही त्यांनी स्पष्ट केले.
FDA अधिकाऱ्यांच्या कारवाईसंदर्भातील प्रकरणाची मुख्यमंत्र्यांनी दखल घेतल्याचे झिरवाळ यांनी सांगितले. दोषींवर कोणती कारवाई करायची, याबाबत मुख्यमंत्री निर्णय घेतील. आवश्यक असल्यास संबंधित अधिकाऱ्यांचे निलंबनही केले जाऊ शकते, असे त्यांनी नमूद केले.
दोन दिवसांपूर्वी FDA मधील पाच अधिकाऱ्यांवरील निलंबनाच्या कारवाईवरूनही चर्चा रंगली होती. नाशिक जिल्ह्यातील मालेगाव येथे सुपारीच्या ट्रकवर करण्यात आलेल्या कारवाईत भ्रष्टाचार झाल्याचे प्रकरण समोर आल्यानंतर हा मुद्दा ऐरणीवर आला. या प्रकरणाची मुख्यमंत्र्यांनी दखल घेतल्याची माहिती आहे.
दुसरीकडे, अन्न व औषध प्रशासनाने १४ आणि १५ ऑक्टोबर रोजी कोकण व पुणे विभागात विशेष शोधमोहीम राबवली. या मोहिमेत मुदतबाह्य आणि खराब अन्नपदार्थांची विल्हेवाट लावण्याच्या नावाखाली त्यांची पुन्हा खुल्या बाजारात विक्री करणाऱ्या साखळीचा पर्दाफाश झाल्याची माहिती प्रशासनाने दिली.
या कारवाईदरम्यान एकूण ४८ लाख ८ हजार ९२४ रुपये किमतीचा संशयास्पद व खराब अन्नसाठा आढळून आला. भिवंडी, अंबरनाथ आणि खेड तालुक्यातील चाकण-निघोजे परिसरातील मोठ्या कंपन्यांच्या पाच गोदामांचे परवाने तात्काळ निलंबित करण्यात आले. तसेच, दोन विनापरवाना आस्थापनांना व्यवसाय बंद करण्याचे निर्देश देण्यात आले.
एकीकडे अन्नसुरक्षेच्या दृष्टीने FDA कडून कारवाई सुरू असताना, दुसरीकडे अधिकारक्षेत्राबाहेर जाऊन कारवाई करणाऱ्या अधिकाऱ्यांवरही कारवाई होण्याची शक्यता आहे. त्यामुळे या प्रकरणात मुख्यमंत्री काय निर्णय घेतात, याकडे लक्ष लागले आहे.
शेतकऱ्यांची दिवाळी काळी होणार नाही, उपमुख्यमंत्री एकनाथ शिंदे यांची ग्वाही
Ans: FDA च्या कार्यक्षेत्राबाहेर जाऊन कारवाई केल्याचे संबंधित अधिकारी दोषी आढळल्यास त्यांच्यावर निलंबनासह कारवाई होऊ शकते, असा इशारा मंत्री नरहरी झिरवाळ यांनी दिला.
Ans: या प्रकरणात कोणती कारवाई करायची, याबाबत मुख्यमंत्री निर्णय घेतील, असे नरहरी झिरवाळ यांनी सांगितले.
Ans: १४ आणि १५ ऑक्टोबर रोजी कोकण व पुणे विभागात राबवलेल्या विशेष मोहिमेत ४८ लाख ८ हजार ९२४ रुपये किमतीचा संशयास्पद व खराब अन्नसाठा आढळला.
.png "Videos"){kind=small}
