रविवार, 4 ऑक्टोबर 2026
(फोटो सौजन्य-सोशल मिडिया)
Yami Gautam-Adinath Kothare: बॉलिवूड अभिनेत्री यामी गौतम सध्या तिच्या आगामी ‘नई नवेली’ या चित्रपटामुळे चर्चेत आहे. या चित्रपटात यामी एका वेगळ्याच भूमिकेत दिसणार असून, तिच्यासोबत मराठमोळा अभिनेता आदिनाथ कोठारेदेखील महत्त्वाच्या भूमिकेत झळकणार आहे. नुकताच या चित्रपटाचा ट्रेलर लाँच सोहळा पार पडला. या ट्रेलरला प्रेक्षकांकडून चांगला प्रतिसाद मिळत आहे. दरम्यान, या कार्यक्रमात यामीने आदिनाथ कोठारेसोबत काम करण्याचा अनुभव सांगितला.
‘नई नवेली’च्या ट्रेलर लाँच सोहळ्याला चित्रपटातील कलाकार आणि निर्माते उपस्थित होते. यावेळी यामी गौतम आणि आदिनाथ कोठारे यांनी एकत्र मंचावर हजेरी लावली. या कार्यक्रमात यामीला आदिनाथसोबत काम करण्याचा अनुभव कसा होता, असा प्रश्न विचारण्यात आला.
यावर उत्तर देताना यामी म्हणाली की, “मला त्यांच्यासोबत काम करताना खूप छान वाटलं. खूप मजा आली.” शूटिंगदरम्यान आदिनाथ खूप गंभीर असायचे, असंही तिने सांगितलं. दोघांमधील सेटवरील बॉन्डिंग चांगलं असल्याचंही यामीच्या बोलण्यातून स्पष्ट झालं.
‘नई नवेली’मध्ये यामी साकारणार मोहिनीची भूमिका
दिग्दर्शक बालाजी मोहन यांच्या ‘नई नवेली’ या चित्रपटाची कथा मेरठमधील एका कुटुंबाभोवती फिरते. यामी गौतम या चित्रपटात मोहिनीची भूमिका साकारत आहे, तर आदिनाथ कोठारे तिच्या पतीच्या भूमिकेत दिसणार आहे. नववधू म्हणून घरात आलेल्या मोहिनीमुळे कुटुंबात अनेक घडामोडी घडतात. चित्रपटात हॉरर, कॉमेडी आणि कौटुंबिक मनोरंजनाचा मिलाफ पाहायला मिळणार आहे.
‘नई नवेली’ची निर्मिती आनंद एल. राय आणि हिमांशू शर्मा यांनी केली असून, बालाजी मोहन यांनी चित्रपटाचं दिग्दर्शन केलं आहे. ट्रेलरमधून यामी आणि आदिनाथची नवी जोडी प्रेक्षकांसमोर आली आहे. आता ही जोडी मोठ्या पडद्यावर कितपत पसंती मिळवते, याची उत्सुकता आहे. हा चित्रपट १६ ऑक्टोबर २०२६ रोजी चित्रपटगृहांत प्रदर्शित होणार आहे.
