(फोटो सौजन्य- सोशल मीडिया)
Ramayana Movie:रणबीर कपूरच्या ‘रामायण’ चित्रपटाची सध्या सर्वत्र जोरदार चर्चा सुरू आहे. चित्रपटगृहात प्रदर्शित होऊन १५ दिवस उलटले असले, तरी चित्रपटाची बॉक्स ऑफिसवरील घोडदौड अद्याप सुरूच आहे. अवघ्या १५ दिवसांत या चित्रपटाने जगभरात १५०० कोटी रुपयांचा टप्पा ओलांडला आहे. विशेष म्हणजे, या चित्रपटाने कमाईच्या बाबतीत रणवीर सिंगच्या ‘धुरंधर २’लाही मागे टाकल्याचा दावा केला जात आहे. चित्रपटातील कलाकारांचा अभिनय, भव्य सेट आणि व्हीएफएक्सचे सोशल मीडियावर प्रचंड कौतुक होत आहे.
सॅकनिल्कच्या अहवालानुसार, ‘रामायण’ने प्रदर्शनाच्या १५ व्या दिवशी १९.३५ कोटी रुपयांची कमाई केली आहे. या दिवशी चित्रपटाला १६.९ टक्के प्रेक्षक मिळाले. आतापर्यंत देशभरात या चित्रपटाचे २१,४३७ शो झाले आहेत. भारतात चित्रपटाने आतापर्यंत ८६३.७५ कोटी रुपयांची निव्वळ कमाई केली आहे. तर भारतीय बॉक्स ऑफिसवरील एकूण कमाई १,०३२.१५ कोटी रुपयांवर पोहोचली आहे.
हिंदीसह इतर भाषांमध्येही चित्रपटाची दमदार कमाई
‘रामायण’ने हिंदीसह विविध भाषांमध्येही चांगली कमाई केली आहे. चित्रपटाच्या १५ व्या दिवसाच्या कमाईचा विचार केला, तर हिंदी भाषेत १४ कोटी रुपये, मल्याळममध्ये १.७५ कोटी रुपये, तमिळमध्ये १.५० कोटी रुपये, कन्नडमध्ये १.४० कोटी रुपये आणि तेलुगूमध्ये ७० लाख रुपयांची कमाई केली आहे. त्यामुळे देशांतर्गत बॉक्स ऑफिसवरही चित्रपटाची पकड कायम असल्याचे दिसत आहे.
जगभरातील कमाईचा विचार केला, तर ‘रामायण’ने आतापर्यंत तब्बल १,५४७.१५ कोटी रुपयांचा गल्ला जमवला आहे. अवघ्या १५ दिवसांत १,५०० कोटींचा टप्पा पार करत चित्रपटाने नवा विक्रम नोंदवला आहे. विशेष म्हणजे, रणवीर सिंगच्या ‘धुरंधर २’ने १५ दिवसांत जगभरात १,४९४.७७ कोटी रुपयांची कमाई केली होती. आता ‘रामायण’ने हा आकडा पार करत कमाईच्या बाबतीत ‘धुरंधर २’ला मागे टाकल्याचे सांगितले जात आहे. येत्या दिवसांत चित्रपटाच्या कमाईत आणखी वाढ होण्याची शक्यता आहे.
रणबीर कपूरसह या कलाकारांच्या अभिनयाचे कौतुक
‘रामायण’मध्ये रणबीर कपूरने प्रभू श्रीरामांची भूमिका साकारली आहे. त्याच्यासोबत रवी दुबे, यश आणि साई पल्लवी हे कलाकारही महत्त्वपूर्ण भूमिकांमध्ये दिसत आहेत. या कलाकारांच्या अभिनयाला प्रेक्षकांकडून भरभरून प्रतिसाद मिळत आहे. याशिवाय लारा दत्ता, रकुल प्रीत सिंग, विवेक ओबेरॉय, शीबा चड्ढा, सौरभ सचदेवा आणि इंदिरा कृष्णन यांच्याही महत्त्वपूर्ण भूमिका आहेत.
चित्रपटातील कलाकारांचा अभिनय, भव्य दृश्ये आणि व्हीएफएक्स यामुळे ‘रामायण’ची चर्चा सर्वत्र रंगली आहे. आता हा चित्रपट बॉक्स ऑफिसवर कमाईचे आणखी कोणते विक्रम प्रस्थापित करणार, याकडे प्रेक्षकांचे लक्ष लागले आहे.






