ठाणे येथील ज्युपिटर लाइफलाइन रुग्णालयात हा अवयवदानाचा निर्णय प्रत्यक्षात आला. संजय शहा हे पॅथॉलॉजी लॅब चालवत होते. स्ट्रोक आल्यानंतर त्यांना रुग्णालयात दाखल करण्यात आले होते. सुरुवातीला डॉक्टरांनी ते 80 टक्के मेंदूमृत अवस्थेत असल्याचे कुटुंबाला सांगितले. काही वेळातच त्यांना पूर्णपणे मेंदूमृत घोषित करण्यात आले. त्यानंतर डॉक्टरांनी कुटुंबीयांना अवयवदानाचा पर्याय सुचवला. दरम्यान पत्नी नम्रता शहा यांनी मुलगा दर्शित शहा याला परिस्थितीची माहिती दिली. दर्शित हा एमएससीचे शिक्षण घेत असून आई-मुलाने अवयवदानाचा विचार सकारात्मकरीत्या स्वीकारला. मात्र अंतिम निर्णय घेण्यापूर्वी कुटुंबातील इतर सदस्य मावशी, आत्या, काका यांच्याशीही चर्चा करण्यात आली. सर्वांच्या एकमताने अवयवदानाचा निर्णय घेण्यात आला. राज्य मार्गदर्शक तत्त्वांनुसार अवयवांचे वितरण करण्यात आले असून यकृत आणि मूत्रपिंडे प्रत्यारोपणासाठी देण्यात आली, तर कॉर्निया आणि हाडांचे ऊतकही दान करण्यात आले, अशी माहिती झेडटीसीसी (झोनल ट्रान्सप्लांट कोऑर्डिनेशन सेंटर) मुंबईकडून देण्यात आली.
“माझ्या वडिलांना कोणतेही व्यसन नव्हते. ते आरोग्याने सुदृढ होते. त्यांचे अवयव दुसऱ्याच्या आयुष्यासाठी उपयोगी पडले तर त्यातून मदत होईल, असा आमचा विचार होता. वडिलांची स्वतःची चॅरिटी संस्था आहे. कोरोनाच्या काळात परिसरातील मृत्यू पाहून त्यांनी समाजसेवेत अधिक लक्ष घातले. प्रयोगशाळेतून केवळ चरितार्थापुरते पैसे घेत उर्वरित चाचण्या अनेकांना मदत म्हणून करून देत असत,”
-दर्शित शहा, अवयदात्याचा मुलगा.
.png "Videos"){kind=small}
