इम्फाळ : मणिपूरमध्ये (Manipur Violence) गेल्या पाच महिन्यांहून अधिक काळ हिंसाचार सुरू आहे. यादरम्यान हिंसाचाराशी संबंधित अनेक व्हिडिओ सोशल मीडियावर व्हायरल झाले आहेत. आधी महिलांना विवस्त्र करून त्यांची धिंड काढण्याचा प्रकार घडला. यानंतर दोन मैतेई तरुणांना गोळ्या घालण्याचा व्हिडिओ सोशल मीडियावर व्हायरल झाला.
आता राज्य सरकारने हिंसाचाराला चिथावणी देणाऱ्या व्हिडिओंवर कडक कारवाई केली आहे. राज्यात हिंसाचार आणि मालमत्तेचे नुकसान करणारे व्हिडिओ व्हायरल होण्यापासून थांबवण्याचे आदेश राज्य सरकारने दिले आहेत. जो कोणी अशा व्हिडिओचा प्रचार करेल त्याच्यावर गुन्हा दाखल केला जाईल, असे सरकारने सांगितले आहे.
गृहविभागाने आदेश जारी करून म्हटले, या प्रकरणाची चौकशी केल्यानंतर सरकारने हिंसा भडकावणारे व्हिडिओ आणि फोटो व्हायरल करणे थांबवण्याचा निर्णय घेतला आहे. हिंसा भडकवणारे कोणतेही फोटो किंवा व्हिडिओ ठेवू नका. योग्य कारवाईसाठी हे फोटो पोलिस अधीक्षकांकडे सादर करता येतील. या नियमांचे पालन कोणी न केल्यास त्याला कठोर शिक्षा केली जाईल, असा इशाराही देण्यात आला आहे.
दोघांना गोळ्या घालून ठार केल्याचा व्हिडिओ
सोशस मीडिया प्लॅटफॉर्मवर व्हिडिओ आणि फोटो सतत व्हायरल झाल्यानंतर हा आदेश आला आहे. अलीकडेच कुकी भाषा बोलणाऱ्या लोकांच्या गटाने दोन मैतेई तरुणांना गोळ्या घालून नंतर त्यांना खड्डयात पुरल्याचा व्हिडिओ समोर आला आहे. मात्र, घटनास्थळ आणि दफनभूमी अद्याप समजू शकलेली नाही.
.png "Videos"){kind=small}
