अरे देवा! आणखी एका चक्रीवादळाचा धोका, राज्यांना मुसळधार पावसाचा इशारा, मच्छीमारांना सतर्कतेचा इशारा
हवामान विभागाच्या १४ नोव्हेंबरच्या बुलेटिननुसार, दक्षिण-पूर्व बंगालच्या उपसागरातील ठळक कमी दाबाचे क्षेत्र वायव्य दिशेने सरकण्याची शक्यता आहे. पुढील २४ तासांत त्याचे डिप्रेशनमध्ये रूपांतर होऊ शकते. त्यानंतर ही प्रणाली उत्तर-वायव्य दिशेने पुढे सरकत दक्षिण आणि लगतच्या पश्चिम-मध्य बंगालच्या उपसागराच्या मध्य भागात १६ नोव्हेंबरच्या संध्याकाळपर्यंत चक्रीवादळाचे रूप धारण करू शकते. मात्र, या चक्रीवादळाचा पुढील मार्ग आणि ते कुठे धडकणार याबाबत अद्याप निश्चित अंदाज जाहीर झालेला नाही. त्यामुळे पुढील हवामान बुलेटिनकडे लक्ष ठेवणे महत्त्वाचे आहे.
या हवामान प्रणालीच्या प्रभावामुळे ओडिशामध्ये १८ आणि १९ नोव्हेंबर रोजी काही ठिकाणी मुसळधार पाऊस पडण्याचा अंदाज आहे. किनारपट्टी आंध्र प्रदेश आणि यानम परिसरातही या दोन दिवसांत काही ठिकाणी मुसळधार पावसाची शक्यता हवामान विभागाने व्यक्त केली आहे. तामिळनाडू, पुद्दुचेरी आणि कराईकल भागात १५ नोव्हेंबरला अनेक ठिकाणी, तर १६ ते १९ नोव्हेंबरदरम्यान काही ठिकाणी पावसाची शक्यता आहे. केरळमध्येही १६ ते १९ नोव्हेंबरदरम्यान अनेक भागांत पावसाचा अंदाज वर्तवण्यात आला आहे.
बंगालच्या उपसागरात वाऱ्यांचा वेग वाढण्याची शक्यता असल्याने समुद्र खवळलेला राहू शकतो. १७ नोव्हेंबरपासून मध्य बंगालच्या उपसागरात वाऱ्यांचा वेग ताशी ६५ ते ७५ किलोमीटरपर्यंत पोहोचण्याची आणि झोतांचा वेग ताशी ८० किलोमीटरपर्यंत जाण्याची शक्यता आहे. समुद्रात असलेल्या मच्छीमारांनी १५ नोव्हेंबरपर्यंत किनाऱ्यावर परतावे, अशी सूचना हवामान विभागाने केली आहे. तसेच अंदमान समुद्र, अंदमान-निकोबार बेटे आणि बंगालच्या उपसागरातील विविध भागांत पुढील काही दिवस मासेमारीसाठी समुद्रात न जाण्याचा सल्ला देण्यात आला आहे.
दरम्यान, उत्तर-पश्चिम भारतात पश्चिमी विक्षोभाचा प्रभाव जाणवण्याची शक्यता आहे. त्यामुळे जम्मू-काश्मीर, हिमाचल प्रदेश आणि उत्तराखंडच्या काही भागांत पाऊस किंवा बर्फवृष्टी होऊ शकते. पंजाब, हरियाणा आणि राजस्थानच्या काही भागांतही हलक्या पावसाचा अंदाज आहे. दिल्ली-NCR मध्ये १५ नोव्हेंबरच्या सकाळी काही ठिकाणी अतिशय हलका पाऊस किंवा रिमझिम पावसाची शक्यता हवामान विभागाने वर्तवली आहे. १५ आणि १६ नोव्हेंबर रोजी दिल्लीतील कमाल तापमान २६ ते २८ अंश सेल्सिअसच्या दरम्यान राहण्याचा अंदाज आहे.
बंगालच्या उपसागरातील हवामान प्रणालीची तीव्रता आणि दिशा यामध्ये पुढील काळात बदल होऊ शकतो. त्यामुळे किनारपट्टीवरील नागरिक, मच्छीमार आणि संबंधित यंत्रणांनी भारतीय हवामान विभागाच्या अधिकृत सूचना आणि इशाऱ्यांचे पालन करावे, असे आवाहन करण्यात आले आहे.
.png "Videos"){kind=small}
