नवी दिल्ली : खासदार प्रज्वल रेवण्णा (Prajwal Revanna) यांच्याशी संबंधित लैंगिक छळाच्या आरोपांमुळे मोठी राजकीय खळबळ उडाली होती. या प्रकरणानंतर खासदार रेवण्णा यांना पक्षातून निलंबन केलं. पण आता त्यांच्या अडचणींमध्ये आणखी वाढ होण्याची शक्यता निर्माण झाली आहे. कर्नाटक सरकारकडून या प्रकरणाच्या तपासासाठी ‘एसआयटी’ स्थापना केली आहे. तसेच काँग्रेसने केंद्र सरकारला पत्र लिहून रेवण्णा यांचा ‘डिप्लोमॅटिक पासपोर्ट’ रद्द करण्याची मागणी केली आहे.
कर्नाटक सरकारकडून प्रज्वल रेवण्णा यांचा पासपोर्ट रद्द करण्याची मागणी करणारे पत्र मंगळवारी परराष्ट्र मंत्रालयाला मिळाले आहे. या पत्रानंतर परराष्ट्र मंत्रालयानेही विशेष तयारी केली आहे. त्यामुळे आता त्यांच्याकडून पासपोर्ट रद्द केला जाऊ शकतो, असे सांगण्यात आले आहे. दरम्यान, हा पासपोर्ट रद्द करण्याच्या प्रक्रियेत किती वेळ लागेल, याबाबत माहिती उपलब्ध नाही.
अनेक महिलांकडून लैंगिक छळाचा आरोप
लोकसभा निवडणुकीदरम्यान 33 वर्षीय प्रज्वल रेवन्ना यांच्या हजारो व्हिडिओ क्लिप समोर आल्या होत्या. रेवण्णावर त्यांच्या घरात काम करणाऱ्या मोलकरणींवर बलात्कार आणि धमकावल्याचा आरोप होता. या व्हिडिओनंतर अनेक महिलाही पुढे आल्या आणि रेवण्णाने आपल्यासोबत अनेकदा चुकीचे कृत्य केल्याचा आरोप केला.
कोण आहेत प्रज्वल रेवण्णा?
प्रज्वल रेवण्णा हे कर्नाटकमधील हसन मतदारसंघाचे खासदार आहेत. प्रज्वल रेवण्णा यांचा राजकीय वारसाही मोठा आहे. जनता दल सेक्युलर पक्षाकडून 2019 मध्ये निवडणूक लढवली होती. त्यावेळी त्यांनी भाजपच्या मंजू ए. यांचा पराभव करत विजय मिळवला होता. प्रज्वल रेवण्णा भारताचे माजी पंतप्रधान एच. डी. देवेगौडा यांचा नातू आहे. कर्नाटक राज्याचे माजी मुख्यमंत्री एच. डी. कुमारस्वामी यांचा पुतण्या आहे.
.png "Videos"){kind=small}
