सोमवार, 2 नोव्हेंबर 2026
प्रयागराज : लोकसभा निवडणुकीच्या (Lok Sabha Election) पाचव्या टप्प्यातील मतदानाला आज सकाळपासून सुरुवात झाली आहे. त्यातच काँग्रेस नेते राहुल गांधी (Rahul Gandhi) आणि समाजवादी पक्षाचे नेते अखिलेश यादव (Akhilesh Yadav) यांच्या संयुक्त सभेत रविवारी प्रचंड राडा झाला. या घटनेचा एक व्हिडिओ सोशल मीडियावर तूफान व्हायरल होत आहे.
‘इंडिया’ आघाडीच्या वतीने उत्तर प्रदेशातील फुलपूर येथे सभा आयोजित करण्यात आली होती. राहुल गांधी आधी येऊन व्यासपीठावर बसले होते. थोड्या वेळाने अखिलेशही आले. दोन्ही नेत्यांची भेट सुरू असतानाच खालच्या बाजूला कार्यकर्त्यांनी जोरजोरात आरडाओरडा सुरू केला. नेते व कार्यकर्ते व्यासपीठावर जाण्यासाठी धडपडत होते. सुरक्षेसाठीचे बॅरिकेट त्यांनी तोडून टाकले. हातात सपा आणि काँग्रेसचे झेंडे घेतलेल्या या नेते व कार्यकर्त्यांना शांत बसण्याचे वारंवार आवाहन करण्यात येत होते. मात्र, ते काही ऐकण्याच्या मनःस्थितीत नव्हते. सर्व प्रयत्न फोल ठरत होते.
दरम्यान, या सर्व घडामोडीनंतर अखिलेश यादव यांचे भाषण झाले. त्यानंतर राहुल गांधी यांनी भाषण केले. दोघांनीही भाजपवर जोरदार हल्लाबोल केला. भाजप आमचा जीव आणि संविधानाच्या पिच्छावर आहे. संविधान वाचले तर नोकऱ्या मिळतील. इंडिया आघाडी सत्तेवर आल्यास अग्निवीर योजना बंद करू, असे आश्वासन अखिलेश यांनी दिले.
