राजस्थानच्या फतेहपूरमध्ये बस-ट्रकमध्ये भीषण अपघात; तीन जणांचा जागीच मृत्यू तर 18 जण जखमी

स्लीपर बस बिकानेरहून जयपूरला जात होती, तर ट्रक जयपूरहून बिकानेरला येत होता. दोन्ही वाहनांची समोरासमोर टक्कर झाली.

सिकर : राजस्थानमधील सिकर जिल्ह्यातील फतेहपूर भागात मंगळवारी रात्री उशिरा भीषण अपघात झाला. फतेहपूर-बिकानेर महामार्गावर एक स्लीपर बस आणि ट्रकची समोरासमोर जोरदार धडक झाली. ही धडक इतकी भीषण होती की, यात तिघांचा जागीच मृत्यू झाला. तर 18 जण जखमी झाले आहेत. या अपघातात दोन्ही वाहनांचे मोठे नुकसान झाले.

या अपघाताची माहिती मिळताच फतेहपूर सदर पोलिस तातडीने घटनास्थळी दाखल झाले. पोलिसांनी दिलेल्या माहितीनुसार, स्लीपर बस बिकानेरहून जयपूरला जात होती, तर ट्रक जयपूरहून बिकानेरला येत होता. दोन्ही वाहनांची समोरासमोर टक्कर झाली, ज्यामुळे घटनास्थळी परिस्थिती भीषण बनली. या अपघातात आतापर्यंत तीन जणांचा मृत्यू झाला आहे. मृतांचे मृतदेह फतेहपूर रुग्णालयातील शवगृहात ठेवण्यात आले आहेत. अपघातात १८ जण जखमी झाले आहेत, त्यापैकी अनेकांची प्रकृती गंभीर असल्याचे सांगितले जात आहे.

हेदेखील वाचा : Nashik Accident: देवीची भेट घेतली अन् क्रूर नियतीशी गाठ पडली! सप्तशृंगी गडाजवळ कार दरीत कोसळून ६ भाविकांचा जागीच मृत्यू

दरम्यान, जखमींना तातडीने फतेहपूर रुग्णालयात नेण्यात आले, जिथे प्राथमिक उपचारानंतर, १८ गंभीर जखमींपैकी सात जणांना चांगल्या उपचारांसाठी सिकर येथे रेफर करण्यात आले. उर्वरित जखमींवर फतेहपूर रुग्णालयात उपचार सुरू आहेत.

अपघातानंतर रस्त्यावर वाहनांच्या रांगा

या अपघातानंतर रस्त्यावर वाहनांच्या रांगाच रांगा लागल्याचे पाहिला मिळाले. या अपघाताची माहिती मिळताच, पोलिसही घटनास्थळी तातडीने दाखल झाले. पोलिसांनी वाहतूक व्यवस्था पूर्ववत केली. आता संपूर्ण घटनेचा तपास केला जात आहे. अपघाताचे कारण शोधण्याचा प्रयत्न पोलिसांकडून केला जात आहे.

चित्तोडगड-कोटा राष्ट्रीय महामार्गावरही अपघात

राजस्थानमधील चित्तोडगड-कोटा राष्ट्रीय महामार्ग २७ वरही एका भीषण अपघात झाला. हा अपघात चालकाच्या चुकीमुळे झाल्याचे सांगण्यात येत आहे. कारण, यामध्ये चालकाने अनियंत्रितपणे वाहन चालवल्याचे म्हटले जात आहे. त्यानंतर हा अपघात झाला. यामध्ये अनेकजण जखमी झाले आहेत. या अपघातात चार जणांचा दुर्दैवी मृत्यू झाला आहे, तर १० जण जखमी झाले आहेत, त्यापैकी एकाची प्रकृती गंभीर आहे.

हेदेखील वाचा : Gadchiroli Crime: राष्ट्रवादीच्या महिला प्रदेश उपाध्यक्ष गीताताई हिंगे यांचा भीषण अपघातात मृत्यू; गडचिरोली येथील घटना