Delhi Hauj Rani Hotel Fire
Delhi Hauj Rani Hotel Fire News Marathi : दिल्लीत एक भयंकर दुर्घटना घडली आहे. दिल्लीतील मालवीय नगर येथे हौज रानी परिसरात एका बहुमजली इमारतीला भीषण आग लागली. या दुर्घटनेत २१ जणांचा बळी गेल्याचे वृत्त समोर आले आहे. या घटनेची माहिती मिळताच अग्निशमन दलाच्या गाड्या तातडीने घटनास्थळी दाखल झाल्या असून आग विझवण्याचे आणि बचाव कार्य सुरु आहे.
मिळालेल्या माहितीनुसार, बुधवारी (०३ जून) सकाळच्या सुमारास ही घटना घडली. या आगीत अनेकजण गंभीर जखमी झाले आहेत. आग एवढी भयानक होती की काही मिनिटांतच संपूर्ण इमारतीला आगीच्या ज्वाळांनी लपेटले होते. यामुळे हॉटेलमध्ये उपस्थित नागरिकांची पळापळ झाली.
प्रत्यक्षदर्शनींनी सांगितल्यानुसार, आगीच्या ज्वाळा एवढ्या भयंकर होत्या की इमारतीतून धूराचे काळे लोट बाहेर येत होते. इमारतीमध्ये अडकलेल्या नागरिकांची जीव वाचवण्यासाठी धावपळ सुरु झाली होती. बाहेर पडण्याचा कोणताही मार्ग न दिसल्याने लोकांनी खिडक्या आणि बाल्कनीतून खाली उड्या मारल्या. तर काही लोकांना या आगीतून सावरण्याची संधीही मिळाली नाही. या घटनेमुळे संपूर्ण परिसरात खळबळ उडाली होती.
मिळालेल्या माहितीनुसार, हॉटेलमध्ये काही परदेशी पर्यटकही उपस्थित होते. या हॉटेलचे नाव फ्लोरिस्ट इन असे असून ही पाच मजली इमारत आहे. या इमातीत जवळपास २५ खोल्या आहेत. दुर्घटनेवेळी ४० हून अधिक लोक हॉटेलमध्ये होते. यामध्ये अधिक करुन परदेशी नागरिक असल्याचे सांगितले जात आहे.
अग्निशमन दलाच्या अधिकाऱ्यांना आगीच्या दुर्दैवी घटनेची माहिती सकाळी १० च्या सुमारास मिळाली होती. हॉटेलच्या रेस्टॉरंटमधील आचाऱ्याने सांगितले की तो ८ च्या सुमारास इलेक्ट्रिक शेगडी पेटवण्याचा प्रयत्न करत होता. पण अचानक आगीचा भडका उडाला. हॉटेलच्या तळघरातील स्वयंपाक घरात आग आधीच लागली होती. बघता बघता या आगीने संपूर्ण इमारतीला विळख्यात घेतले.
सध्या युद्धपातळीवर बचाव कार्य सुरु असून आतापर्यंत ३५ हून अधिक लोकांना वाचवण्यात यश आले आहे. जखमींना जवळच्या रुग्णालयता दाखल करण्यात आले असून त्यांच्यावर उपचार सुरु आहेत. आग विझवण्यात आली असून हॉटेलच्या खोलांची तपासणी केली जात आहे. मृतांची ओळख पटवण्याचेही कार्य सुरु आहे.
20 people have lost their lives in the Malviya Nagar fire incident: Delhi Police pic.twitter.com/cbAomtoBuK — IANS (@ians_india) June 3, 2026
.png "Videos"){kind=small}
