RSS Banned in Karnataka: कॉंग्रेस आवळणार RSS च्या मुसक्या?अध्यक्षांच्या बालेकिल्ल्यात पथसंचालनला परवानगी नाहीच

RSS Banned in Karnataka: राष्ट्रीय स्वयंसेवक संघाबाबत कर्नाटक सरकारने काही नियम जारी केले आहेत. यानंतर कर्नाटक मधील चित्तपूरमध्ये संघाच्या पथसंचलनाची परवानगी देखील नाकारण्यात आली आहे.

RSS Banned in Karnataka: कर्नाटक: यंदाच्या वर्षी राष्ट्रीय स्वयंसेवक संघाने शतकवर्षपूर्ती केली आहे. यामुळे संपूर्ण देशामध्ये आरएसएसची जोरदार चर्चा आहे. यंदाच्या विजयादशमीला संघाला 100 वर्षे पूर्ण झाली असून यानिमित्ताने आऱएसएस चर्चेत आला आहे. मात्र कर्नाटकमध्ये आरएसएसवर बंधने घालण्याचा प्रयत्न केला जात आहे. संघाबाबत कर्नाटक सरकारने काही नियम जारी केले आहेत. त्याचबरोबर कर्नाटक मधील चित्तपूरमध्ये संघाच्या पथसंचलनाची परवानगी देखील नाकारण्यात आली आहे. यावरुन पुन्हा एकदा वाद निर्माण होण्याची शक्यता आहे.

रविवारी कर्नाटकातील चित्तपूर येथे राष्ट्रीय स्वयंसेवक संघाच्या (आरएसएस) मोर्चाला परवानगी नाकारण्यात आली. चित्तपूर हे गृह राज्यमंत्री प्रियांक खरगे यांचा मतदारसंघ आहे. चित्तपूर हा कॉंग्रेस प्रदेशाध्यक्ष मल्लिकार्जुन खरगे यांचा बालेकिल्ला मानला जातो. तिथे शांतता आणि कायदा आणि सुव्यवस्था बिघडण्याची भीती अधिकाऱ्यांनी व्यक्त केली. याच कारणास्तव त्यांनी आरएसएसच्या कार्यक्रमाला परवानगी नाकारली आहे. पोलिस संरक्षणात नगर परिषदेने मुख्य रस्त्यावर आरएसएसने लावलेले कट-आउट आणि बॅनर काढून टाकले, मोर्चाला परवानगी मिळण्यापूर्वीच आरएसएसकडून ते लावण्यात आले होते.

राजकीय बातम्या वाचण्यासाठी क्लिक करा

चित्तपूर तहसीलदारांनी त्यांच्या आदेशात म्हटले आहे की, “चित्तपूरमध्ये शांतता आणि कायदा आणि सुव्यवस्थेचा भंग होऊ नये म्हणून आणि कोणताही अनुचित प्रकार टाळण्यासाठी, १९ ऑक्टोबर रोजी होणाऱ्या आरएसएसच्या पथ संचलन कार्यक्रमाची परवानगी नाकारण्यात येत आहे. अर्जही नाकारण्यात येत आहे.” कर्नाटक सरकारने एक आदेश जारी केला ज्यामध्ये खाजगी संस्था, संघटना किंवा गटांना कार्यक्रम, कार्यक्रम किंवा मिरवणुकीसाठी कोणत्याही सरकारी मालमत्तेचा किंवा परिसराचा वापर करण्यापूर्वी पूर्वपरवानगी घेणे बंधनकारक करण्यात आले.

महाराष्ट्रसंबंधित बातम्या वाचण्यासाठी क्लिक करा 

राज्य सरकारने हा निर्णय का घेतला?

राज्य मंत्रिमंडळाने कोणत्याही कार्यक्रमासाठी सरकारी शाळा, महाविद्यालय परिसर आणि सार्वजनिक ठिकाणांचा वापर करण्यासाठी पूर्वपरवानगी आवश्यक असेल असा निर्णय घेतल्यानंतर दोन दिवसांनी हे पाऊल उचलण्यात आले आहे. कर्नाटकचे मंत्री प्रियांक खरगे यांनी अलीकडेच मुख्यमंत्री सिद्धरामय्या यांना पत्र लिहून सरकारी शाळा, महाविद्यालये आणि सार्वजनिक ठिकाणी आरएसएसच्या उपक्रमांवर बंदी घालण्याची मागणी केली होती. संघाने १९ तारखेला रविवारी दुपारी ३ वाजता संघटनेच्या शताब्दी उत्सव आणि विजयादशमीनिमित्त एक कार्यक्रम आयोजित केला होता. कलबुर्गी जिल्ह्यातील चित्तपूर शहरात मिरवणूक आणि विजयादशमी कार्यक्रमासाठी परवानगीसाठी अर्ज देण्यात आला. मात्र हा अर्ज नाकारण्यात आला आहे. त्यावरुन वाद निर्माण होण्याची शक्यता आहे.