गुरुवार, 3 सप्टेंबर 2026
काँग्रेसमध्ये मोठा राजकीय भूकंप! मुलीने मुख्यमंत्री रेवंत रेड्डींविरोधात केलं वक्तव्य; आई कोंडा सुरेखांच्या मंत्रिपदावर गंडांतर
कोंडा सुरेखा यांच्या मुलीने मुख्यमंत्री रेवंत रेड्डी यांच्याविरोधात वक्तव्य केल्यानंतर तेलंगणा काँग्रेसमधील अंतर्गत संघर्ष अधिक तीव्र झाल्याची चर्चा आहे. त्यानंतर आता थेट कोंडा सुरेखा यांच्या मंत्रिपदावरच गंडांतर आल्याने राज्यातील राजकीय वातावरण तापले आहे.
समोर आलेल्या माहितीनुसार, मुख्यमंत्री रेवंत रेड्डी यांनी कोंडा सुरेखा यांना मंत्रिपरिषदेतून हटवण्याची शिफारस राज्यपालांकडे पाठवली आहे. त्यामुळे या शिफारशीवर राज्यपालांकडून पुढील कार्यवाही झाल्यानंतर त्यांच्या मंत्रिपदाबाबत अधिकृत स्थिती स्पष्ट होणार आहे.
तेलंगणात काँग्रेस सत्तेत असतानाच पक्षातील अंतर्गत मतभेद वारंवार चर्चेत येत आहेत. आता कोंडा सुरेखा यांच्या प्रकरणामुळे हा संघर्ष आणखी उघड झाला आहे. एका विद्यमान मंत्र्याला मंत्रिमंडळातून हटवण्याची प्रक्रिया सुरू झाल्याने त्याचे पडसाद पक्षांतर्गत राजकारणावरही उमटण्याची शक्यता आहे.
कोंडा सुरेखा यांच्या समर्थकांची पुढील भूमिका काय असणार आणि काँग्रेसचे केंद्रीय नेतृत्व या वादात हस्तक्षेप करणार का, याकडे आता तेलंगणाच्या राजकीय वर्तुळाचे लक्ष लागले आहे.
बातमी अपडेट होत आहे…
