रविवार, 15 नोव्हेंबर 2026
'भाजपकडून भारतातील संविधान नष्ट करण्याचा कट रचला जातोय...'; जर्मनीतून राहुल गांधींचा भाजपवर पुन्हा हल्ला
राहुल गांधी यांनी सोमवारी त्यांच्या यूट्यूब चॅनेलवर बर्लिनमध्ये आयोजित “राजकारण ही ऐकण्याची कला आहे” या कार्यक्रमाचा व्हिडिओ अपलोड केला. या कार्यक्रमात त्यांनी भारतातील केंद्र सरकावर टिका केल्याचे दिसत आहे. या कार्यक्रमात त्यांनी भारतीय लोकशाही रचनेवर सर्व बाजूंनी हल्ला होत असल्याचे म्हटले आहे. तसेच, हरियाणाच्या राज्यातील मतदार यादीत २२ ठिकाणी ब्राझिलियन मॉडेलचे नाव असल्याचेही त्यांनी निदर्शनास आणून दिले.
काँग्रेस खासदार पुढे म्हणाले, “बघा, भाजपच्या लोकांविरुद्ध किती ईडी आणि सीबीआयचे खटले आहेत? उत्तर: एकही नाही. पण त्याचवेळी विरोधी पक्षनेत्यांवर सातत्याने खटले दाखल केले जात आहेत. तुम्ही उद्योगपती असाल आणि काँग्रेसला मदत करण्याचा विचार करत असाल तर तुमच्याकडे इडी-सीबीआयची धाड केव्हाही पडू शकते.’ याकडेही त्यांनी लक्ष वेधलं.
भाजपला मिळणाऱ्या निवडणूक देणग्यांचा संदर्भ देत राहुल गांधी म्हणाले की, भाजपकडे काँग्रेसपेक्षा खूप जास्त पैसा आहे. “म्हणून, विरोधी पक्ष म्हणून, आपल्याला या परिस्थितीचा सामना करण्यासाठी मार्ग शोधावा लागेल. पण आपण फक्त भाजपशी लढत नाही आहोत, तर ज्यांनी भारताच्या संस्थात्मक रचनेवर कब्जा केलाय त्यांच्याशीदेखील लढत आहोत.
दिल्ली आणि भारतातील काही इतर प्रमुख शहरांमधील वायू प्रदूषणाबद्दल विचारलेल्या प्रश्नाला उत्तर देताना राहुल गांधी म्हणाले की, ”उत्पादन आणि प्रदूषणात कोणताही विरोधाभास नाही; तुम्ही कोणत्या प्रकारचे इंधन वापरता आणि उत्पादनासाठी कोणत्या प्रकारची ऊर्जा वापरता हे महत्त्वाचे आहे. आपल्या प्रमुख शहरांमधील प्रदूषण योग्य सरकारी हस्तक्षेपाने दूर करता येईल. जर्मनीमध्ये खूप प्रदूषण होते, परंतु येथील हवा स्वच्छ आहे.
राहुल गांधी म्हणाले, ‘आम्ही तेलंगणा आणि हिमाचल प्रदेशमध्ये निवडणुका जिंकल्या. आम्ही हरियाणाची निवडणूकही जिंकली, यात काही शंका नाही. मी पत्रकार परिषदेत दाखवून दिले की एका ब्राझिलियन महिलेचे नाव हरियाणाच्या मतदार यादीत होते. जेव्हा आम्ही निवडणूक आयोगाला याबद्दल विचारले तेव्हा आयोगाकडून आम्हाला कोणत्याही प्रकारचे उत्तर मिळाले नाही. महाराष्ट्राच्या निवडणुकाही निष्पक्षपणे झाल्या नाहीत, यावर आमचा विश्वास आहे.
आम्ही सध्या देशात आणि जगात मोठ्या बदलांमधून जात आहोत. भारताला पूर्वी अमेरिकेच्या वर्चस्वाखाली जगाचा फायदा झाला होता, जिथे अमेरिकेने काही नियम ठरवले होते. आता मात्र, अमेरिकेच्या सत्तेला लष्कर, अर्थव्यवस्था आणि वित्त संबंधित बाबींमध्ये आव्हानांचा सामना करावा लागत आहे. शिवाय, अमेरिकेला स्वतः अनेक अंतर्गत समस्यांना तोंड द्यावे लागत आहे.
एक मोठे आव्हान म्हणजे बहुतेक उत्पादन काम चीनकडे गेले आहे. यामुळे, भारत, अमेरिका किंवा जर्मनीसारखे देश केवळ सेवा क्षेत्राद्वारे मोठ्या प्रमाणात रोजगार निर्माण करू शकत नाहीत. उत्पादन आणि उत्पादन महत्त्वाचे आहे, परंतु आता यापैकी बहुतेक क्षेत्रे चीनकडे आहेत.
