UP News : योगी आदित्यनाथ यांचा आणखी एक ‘मास्टरस्ट्रोक’! भदोही जिल्ह्याचे बदलले नाव, आता नुस्ता विकास!

UP News : उत्तर प्रदेशचे मुख्यमंत्री योगी आदित्यनाथ यांनी भदोही जिल्ह्याचे नाव बदलण्याची घोषणा केली आहे. आता भदोही जिल्हा ‘संत रविदास नगर भदोही’ या नावाने ओळखला जाणार आहे. या कार्यक्रमात 1,340 कोटी रुपयांहून अधिकच्या 112 विकासकामांचे उद्घाटन आणि भूमिपूजनही करण्यात आले.

• भदोही जिल्ह्याचे नाव बदलून ‘संत रविदास नगर भदोही’ करण्यात आल्याची घोषणा.
• मुख्यमंत्री योगी आदित्यनाथ यांनी भदोहीतील कार्यक्रमात केला नामांतराचा ऐलान.
• 1,340 कोटी रुपयांहून अधिकच्या 112 विकास प्रकल्पांचे उद्घाटन आणि भूमिपूजन.

 

UP News : उत्तर प्रदेशचे मुख्यमंत्री योगी आदित्यनाथ यांनी राज्याच्या विकासासाठी पुन्हा एकदा मास्टरस्ट्रोक मारला आहे. यंदा उत्तर प्रदेशमधील भदोही जिल्ह्ह्याचे नाव बदलून संत रविदास नगर भदोही असे करत विकासाचा आणखी एक उच्चांक गाठला आहे. भदोही येथे आयोजित कार्यक्रमात मुख्यमंत्री योगी आदित्यनाथ यांनी ही घोषणा केली.

यावेळी योगी आदित्यनाथ यांनी सांगितले की, आता भदोही जिल्ह्याला ‘संत रविदास नगर भदोही’ या नावाने ओळखले जाईल. संत रविदास यांच्या नावाला जिल्ह्याशी जोडण्याचा निर्णय याआधीच जाहीर करण्यात आला होता. याआधीच खासदार रवी किशन यांनी उत्तर प्रदेशची तुलना स्पेनशी करून राज्याच्या विकासाबद्दल मोठे वक्तव्य केले होते. आता मुख्यमंत्री आदित्यनाथ यांनीही जिल्ह्याचे नामकरण करत रवीकिशन यांचे शब्द खरे ठरवले आहेत.

संत रविदास यांच्या नावावरून जिल्ह्याचे नामकरण

योगी आदित्यनाथ यांनी यावेळी सांगितले की, “गुरुपौर्णिमेच्या निमित्ताने सरकारने भदोही जिल्ह्याचे नाव संत रविदास यांच्या नावाने ओळखले जाईल, असे म्हटले होते. संत रविदास हे मध्ययुगीन संत असून त्यांनी आध्यात्मिक भक्तीच्या माध्यमातून समाजाला एकत्र आणण्याचे काम केले,” असे मुख्यमंत्री म्हणाले.

Yogi Adityanath : युपीतील नागरिकांच्या स्थलांतरणाबाबत आदित्यनाथांचं मोठे विधान; म्हणाले, आता आपल्या मातीतच कौशल्य दाखवण्याची संधी

भदोही हा जिल्हा देशातील प्रसिद्ध कार्पेट उद्योगासाठी ओळखला जातो. भदोहीला ‘Carpet City’ म्हणून संबोधले जाते आणि येथे हाताने विणलेल्या कार्पेट उद्योगाचे मोठे केंद्र आहे.

1,340 कोटींच्या 112 प्रकल्पांचे उद्घाटन आणि भूमिपूजन

भदोहीतील कार्यक्रमात मुख्यमंत्री योगी आदित्यनाथ यांनी 1,340 कोटी रुपयांहून अधिक खर्चाच्या 112 विकास प्रकल्पांचे उद्घाटन आणि भूमिपूजन केले. या विकासकामांबरोबरच जिल्ह्याच्या नामांतराची घोषणा करण्यात आली.

यामुळे भदोहीच्या नावाचा विषय पुन्हा एकदा चर्चेत आला आहे. यापूर्वीही जिल्ह्याच्या नावात बदल करण्यात आले होते. उपलब्ध वृत्तांनुसार, 1999 मध्ये ‘संत रविदास नगर भदोही’ हे संयुक्त नाव करण्यात आले होते, तर 2014 मध्ये पुन्हा ‘भदोही’ हे नाव करण्यात आले. आता 2026 मध्ये पुन्हा ‘संत रविदास नगर भदोही’ या नावाची घोषणा करण्यात आली आहे.

जिल्ह्यांचे नामकरण म्हणजेच यूपीचा विकास?

योगी आदित्यनाथ हे नाव बदलण्याच्या भूमिकेमुळे देशभरात प्रसिद्ध आहेत. राज्यातील लोक रोजगाराच्या शोधात देशभरात भटकत असताना आदित्यनाथ यांनी नाव बदल कारण्याचा तगादा लावला आहे. त्यामुळे सोशल मीडियावर नागरिकांकडून मोठ्या प्रमाणात रोष व्यक्त करताना दिसून येत आहे. असे असले तरीही, उत्तर प्रदेशमधील विकास प्रकल्पदेखील मोठ्या प्रमाणात वाढल्याचे दिसून येत आहे.

BJP Rajyasabha Candidate List : राज्यसभा निवडणुकीसाठी भाजपची पहिली यादी जाहीर; अभिनेत्रीला पुन्हा उतरवलं निवडणुकीच्या मैदानात!

योगी सरकारच्या काळातील प्रमुख नामांतरं

• इलाहाबाद – प्रयागराज
• फैजाबाद – अयोध्या
• मुगलसराय – पंडित दीनदयाळ उपाध्याय नगर
• मुगलसराय रेल्वे स्टेशन – पंडित दीनदयाळ उपाध्याय जंक्शन
• मुघल म्युझियम, आग्रा – छत्रपती शिवाजी महाराज म्युझियम
• अकबरपूर बस स्टँड – श्रवण धाम बस स्टँड
• जालालाबाद – परशुरामपुरी
• भदोही – संत रविदास नगर भदोही