रविवार, 4 ऑक्टोबर 2026
Parliament of India (Photo - Social Media)
BJP Rajyasabha Candidate List : राज्यसभा निवडणुकीसाठी भाजपने आपली पहिली उमेदवार यादी जाहीर केली आहे. भाजपच्या केंद्रीय निवडणूक समितीने रविवारी, 4 ऑक्टोबर रोजी दोन नावांवर शिक्कामोर्तब केलं. उत्तराखंडमधून दिनेश आर्य आणि पश्चिम बंगालमधील राज्यसभा पोटनिवडणुकीसाठी रुक्मिणी मल्लिक उर्फ कोएल मल्लिक यांना उमेदवारी देण्यात आली आहे.
भाजपने उत्तराखंडमधून दिनेश आर्य यांना राज्यसभा निवडणुकीच्या रिंगणात उतरवलं आहे. आर्य हे नैनीतालचे रहिवासी असून त्यांनी यापूर्वी भाजपचे नैनीताल जिल्हाध्यक्ष म्हणून काम केलं आहे. सध्या ते उत्तराखंड सरकारमध्ये दर्जाप्राप्त राज्यमंत्री असून राज्यस्तरीय पेयजल अनुश्रवण परिषदेत उपाध्यक्षपदाची जबाबदारी सांभाळत असल्याचं वृत्त आहे. त्यामुळे आगामी राज्यसभा निवडणुकीत भाजपने उत्तराखंडमध्ये स्थानिक संघटनात्मक अनुभव असलेल्या नेत्याला संधी दिली आहे.
पश्चिम बंगालमध्ये भाजपने अभिनेत्री रुक्मिणी मल्लिक उर्फ कोएल मल्लिक यांना उमेदवारी दिली आहे. विशेष म्हणजे, कोएल मल्लिक याआधी तृणमूल काँग्रेसच्या उमेदवारीवर राज्यसभा खासदार झाल्या होत्या. त्यांनी एप्रिलमध्ये खासदार म्हणून शपथ घेतली होती आणि जुलैमध्ये राज्यसभेच्या सदस्यत्वाचा राजीनामा दिला होता. त्यानंतर आता भाजपने त्यांना पुन्हा राज्यसभा निवडणुकीच्या मैदानात उतरवलं आहे.
कोएल मल्लिक या बंगाली चित्रपटसृष्टीतील अभिनेत्री आहेत. त्यामुळे त्यांच्या उमेदवारीकडे राजकीय वर्तुळासोबतच बंगाली मनोरंजन क्षेत्राचंही लक्ष लागलं आहे.
राज्यसभा निवडणुकीसाठी 16 ऑक्टोबर रोजी मतदान होणार आहे. उत्तर प्रदेशातील 10 जागा, उत्तराखंडमधील एक जागा आणि पश्चिम बंगालमधील एका जागेच्या पोटनिवडणुकीचा यात समावेश आहे. पश्चिम बंगालची जागा कोएल मल्लिक यांच्या राजीनाम्यानंतर रिक्त झाली होती.
भाजपने सध्या दोन उमेदवारांची घोषणा केली असून उत्तर प्रदेशातील उर्वरित जागांसाठी पक्षाकडून आणखी उमेदवारांची घोषणा होण्याची शक्यता आहे. त्यामुळे आता भाजपच्या पुढील यादीकडे राजकीय वर्तुळाचं लक्ष लागलं आहे.
