‘व्हाइट मार्बल सिटी’ च्या नावाने ओळखलं जातं हे शहर, बिल्डिंगपासून गाड्यांपर्यंत इथे सर्वांचाच रंग दिसेल पांढरा

White Marble City : तुर्कमेनिस्तानची राजधानी 'अश्गाबात' हे संपूर्णपणे पांढऱ्या मार्बलने सजलेले ‘व्हाइट मार्बल सिटी’ म्हणून प्रसिद्ध आहे. इमारती, रस्ते आणि गाड्यांपर्यंत इथे सर्व काही पांढऱ्या रंगात नटलेले दिसून येते. 

• जगात असे एक शहर आहे जे तिथल्या रंगामुळे लोकांना आकर्षित करते
• या शहराला व्हाइट मार्बल सिटी म्हणून ओळखलं जात
• इथे गाड्या, घर सर्वकाही पांढऱ्या रंगात दिसून येत

जगभरात अनेक देश आपापल्या अनोख्या संस्कृती, वास्तुकला आणि परंपरांमुळे लोकांमध्ये खास ओळख निर्माण करतात. अशाच देशांमध्ये तुर्कमेनिस्तानची राजधानी अश्गाबात विशेष प्रसिद्ध आहे. जगभरात हे शहर ‘व्हाइट मार्बल सिटी’ म्हणून ओळखले जाते. कारण, इथल्या बहुतांश इमारती, रस्ते आणि सरकारी स्ट्रक्चर्स हे चमकदार पांढऱ्या मार्बलने बनलेले आहेत. शहर इतके उजळ दिसते की ढगाळ हवामानातसुद्धा लोकांना सनग्लासेस घालावे लागतात. चला, जाणून घेऊया या शहराच्या खासियत आणि आकर्षणाविषयी.

Top Travel Spots: ‘ही’ 15 ठिकाणे आयुष्यात एकदा तरी अवश्य पहावीतच; आजच बनवा Bucket list!

पांढऱ्या रंगाची क्रेझ

अश्गाबात हे असे एकमेव शहर मानले जाते, जिथे संपूर्ण शहराचा जीवनशैलीच पांढऱ्या मार्बलभोवती फिरते. इथल्या इमारतींपासून फुटपाथपर्यंत सर्व काही पांढऱ्या रंगातच दिसते. पांढऱ्या मार्बलचा इतका मोठ्या प्रमाणावर वापर केल्यामुळे या शहराची नोंद गिनीज वर्ल्ड रेकॉर्ड मध्ये करण्यात आली आहे.

इथली एक अत्यंत अनोखी गोष्ट म्हणजे गाड्यांसाठीचा पांढरा रंगाचा नियम. शहरात बहुतेक सर्व गाड्या पांढऱ्या रंगातच असतात. जर कोणी दुसऱ्या रंगाची कार घेऊन आला, तर स्थानिक अधिकाऱ्यांकडून ती गाडी जप्त केली जाते आणि वाहनमालकाला दंडही भरावा लागतो. कार परत मिळण्याची अट म्हणजे गाडीचा पेंट बदलून तिला पांढरा करणे!

पांढऱ्या मार्बलमुळे वाढलेली उजळ प्रकाशाची तीव्रता

2000 नंतर या शहराचे मोठ्या प्रमाणावर पुनर्विकासाचे काम करण्यात आले. या काळात 550 पेक्षा जास्त मार्बलच्या इमारती उभारण्यात आल्या. संपूर्ण शहर पांढऱ्या मार्बलने झाकलेले असल्यामुळे रस्ते असोत किंवा उंच इमारती, सर्वजण सूर्यमालेची रोशनी जबरदस्तपणे परावर्तित करतात. त्यामुळे हवामान ढगाळ असले तरी डोळ्यांवर ताण येऊ नये म्हणून लोकांना नेहमी सनग्लासेसचा वापर करावा लागतो.

इंस्टाग्रामवर युजर्सचे मन जिंकत आहेत भारतातील ही 10 ठिकाणे; इथे मिळेल संस्मरणीय ट्रिपचा अनुभव

पांढऱ्या रंगाचा नियम का लागू झाला?

पांढऱ्या रंगाचा कडक नियम 2018 साली लागू करण्यात आला. त्या काळातील राष्ट्राध्यक्ष गुर्बांगुली बर्दीमुखामेदोव यांना पांढरा रंग अत्यंत आवडत होता. व्यवसायाने दंतवैद्य असल्यामुळेही त्यांचा पांढऱ्या रंगाशी जास्त जवळचा संबंध होता असे म्हटले जाते. त्यांच्या आवडीचा प्रभाव शहराच्या प्रत्येक कोपऱ्यात दिसतो. जाहिरात बोर्ड असो, सजावट असो किंवा सार्वजनिक ठिकाणांची रचना, सर्वत्र पांढऱ्याच छटा पाहायला मिळतात. आज हे शहर जगातील सर्वात महागड्या शहरांपैकी एक म्हणूनही ओळखले जाते.