Ganesh Chaturthi 2025 : गणपतीच्या नैवेद्याची शान वाढवेल कुरकुरीत कोथिंबीर वडी; नोट करा पारंपरिक रेसिपी

Kothimbir Vadi Recipe : महाराष्ट्रातील पारंपरिक पदार्थांमध्ये कोथिंबीर वडीचा प्रामुख्याने समावेश होतो. ही वडी चवीला खमंग, कुरकुरीत आणि पौष्टिक असते. बाप्पाच्या नैवेद्यात कोथिंबीर वडीचा समावेश सर्वांनाच खुश करेल.

गणेश चतुर्थीच्या दिवशी बाप्पाला अनेक पदार्थांचा नैवेद्य दाखवला जातो. नैवेद्याच्या या ताटात मोदक, मसाले भात, भजी अशा विविध पदार्थांचा समावेश होतो. नैवेद्याच्या ताटाची ही मजा तुम्ही आणखीन एका पदार्थाने द्विगुणित करू शकता आणि हा पदार्थ म्हणजे कोथिंबीर वडी. कुरकुरीत चवीची ही खमंग वडी महाराष्ट्राच्या पारंपरिक पदार्थांपैकी एक आहे.

गणपती बाप्पाच्या नैवेद्यासाठी कोकणातील पारंपरिक पद्धतीमध्ये बनवा वाटपाची डाळ, नोट करा रेसिपी

ताज्या हिरव्या कोथिंबिरीपासून बनणारी ही वडी चविष्ट, खमंग आणि पौष्टिक असते. सकाळच्या नाश्त्यासाठी, संध्याकाळच्या वेळेस चहा बरोबर किंवा पाहुणचाराला पटकन बनवता येणारा हा उत्तम पर्याय आहे. कोथिंबीर वडी वाफवून किंवा तळून दोन्ही प्रकारे खाऊ शकतो. वाफवलेली वडी थोडी हेल्दी तर तळलेली वडी खुसखुशीत लागते. बाप्पाच्या आगमनाच्या या मंगल प्रसंगी तुम्ही घरी कोथिंबीर वडीचा बेत करू शकता. चला तर मग लगेच जाणून घेऊया यासाठी लागणारे साहित्य आणि कृती.

साहित्य

• कोथिंबीर – २ कप (बारीक चिरलेली)
• बेसन – १ कप
• तांदळाचे पीठ – २ टेबलस्पून
• आलं-लसूण-मिरची पेस्ट – १ टीस्पून
• लाल तिखट – १ टीस्पून
• हळद – ½ टीस्पून
• धणे-जिरे पूड – १ टीस्पून
• तीळ – १ टीस्पून
• मीठ – चवीनुसार
• पाणी – आवश्यकतेनुसार
• तेल – तळण्यासाठी

Ganesh Chaturthi 2025 : गव्हाच्या पिठापासून झटपट बनवा कुरकुरीत तळणीचे मोदक

कृती

• यासाठी सर्वप्रथम एका मोठ्या भांड्यात बारीक चिरलेली कोथिंबीर, बेसन, तांदळाचे पीठ,आलं-लसूण-मिरची पेस्ट, हळद, लाल तिखट, धणे-जिरे पूड, मीठ आणि तीळ असे सर्व साहित्य टाकून चांगले एकत्र करा.
• थोडं-थोडं पाणी घालून घट्टसर एक पीठ तयार करा.
• आता गॅसवर स्टीमर किंवा इडलीच्या साच्यात पाणी घालून पाण्याला उकळी येऊ द्या.
• तयार मिश्रणाचे लांब असे गोळे तयार करा आणि हे गोळे इडली पात्रात ठेवून द्या.
• कोथिंबीरचे हे गोळे छान १५-२० मिनिटे मध्यम आचेवर वाफवून घ्या.
• इडली पात्र लगेच उघडू नका तर गॅस बंद केल्याच्या ५ मिनिटांनंतर इडली पात्र उघडा आणि यातील गोळे बाहेर काढा
• गोळे छान थंड झाले की चाकूच्या मदतीने त्यांचे तुकडे करा
• तयार तुकडे गरम तेलात सोनेरी होईपर्यंत कुरकुरीत तळून घ्या आणि तयार वडी खाण्यासाठी सर्व्ह करा.
• तुम्ही कोथिंबीर वडी शॅलो फ्राय देखील करू शकता.

FAQs (संबंधित प्रश्न)

कोथिंबीर वडी आपण किती काळ साठवू शकतो?
तळलेली कोथिंबीर वडी तुम्ही दोन ते तीन दिवस साठवून ठेवू शकता.

कोथिंबीर वडी उकडून खाता येते का?
होय, तुम्ही न तळताही कोथिंबीर वडी उकडून खाऊ शकता, हा एक हेल्दी पर्याय आहे.