व्हेज खाणाऱ्यांसाठी पर्वणी, विकेंडनिमित्त घरी बनवा चविष्ट अन् प्रथिनांनी भरपूर असे ‘सोया कबाब’;

Soya Kabab Recipe : तीच तीच भाजी खाऊन कंटाळा आला असेल आणि काही नवीन पण आरोग्यासाठीही पौष्टिक ठरेल असं काही खायचं असेल तर सोयाबीन कबाब तुमच्यासाठी एक उत्तम पर्याय आहेत.

सोया कबाब ही एक स्वादिष्ट आणि पौष्टिक डिश आहे जी शाकाहारी लोकांसाठी चिकन कबाबचा उत्तम पर्याय मानली जाते. यात सोयाबीनमधील प्रथिनांचे भरपूर प्रमाण असते, ज्यामुळे शरीराला ऊर्जा आणि ताकद मिळते. ही डिश पार्टी, पिकनिक किंवा संध्याकाळच्या नाश्त्यासाठी परिपूर्ण आहे. याची खासियत म्हणजे बाहेरून क्रिस्पी आणि आतून सॉफ्ट टेक्स्चर तसेच मसाल्यांचा अप्रतिम सुगंध. तुम्ही ही रेसिपी घरी खूप सोप्या पद्धतीने तयार करू शकता आणि पाहुण्यांना स्वादिष्ट सरप्राइज देऊ शकता.

जेवणाला येईल चटकदार चव! रात्रीच्या जेवणासाठी पारंपरिक सारस्वत स्टाइलने बनवा आंबट बटाटा, चार घास जातील जास्त

सोयाबीनची भाजी तर आपण अनेकदा खाल्ली असेल पण यापासून चविष्ट असे कबाब तयार करता येतात ही गोष्ट फार कमी लोकांना ठाऊक आहे. याचे कबाब चवीला अप्रतिम लागतात आणि यात असणाऱ्या पोषक घटकांच्या साठ्यामुळे ते आरोग्यासाठीही फायद्याचे ठरतात. तुम्हीही कोणत्या गिल्ट फ्री पदार्थाच्या शोधात असाल तर आजची ही रेसिपी तुमच्यासाठीच आहे. मुलांच्या डब्यात, टी टाईम स्नॅक्ससाठी किंवा पार्टीजमध्ये लागणाऱ्या स्टार्टर्समध्ये तुम्ही याचा समावेश करू शकता. चला लगेच नोट करून घेऊयात यासाठी लागणारे साहित्य आणि कृती.

साहित्य :

• सोया चंक्स (नगेट्स) – 1 कप
• उकडलेले बटाटे – 2 मध्यम
• कांदा – 1 बारीक चिरलेला
• हिरवी मिरची – 2 बारीक चिरलेल्या
• आले-लसूण पेस्ट – 1 टीस्पून
• कोथिंबीर – 2 टेबलस्पून (बारीक चिरलेली)
• गरम मसाला – ½ टीस्पून
• लाल तिखट – ½ टीस्पून
• धने-जिरे पूड – ½ टीस्पून
• लिंबाचा रस – 1 टीस्पून
• मीठ – चवीनुसार
• कॉर्नफ्लोअर किंवा ब्रेडक्रम्ब्स – 2 टेबलस्पून
• तेल – तळण्यासाठी

Bharli Mirchi Recipe : भाजी काय करावं ते सुचत नाही? मग झटपट घरी बनवा गावरान स्टाईल ‘भरली मिरची फ्राय’

कृती :

• यासाठी सर्वप्रथम सोया चंक्स गरम पाण्यात 10 मिनिटे भिजवून ठेवा. त्यानंतर पाणी काढून चांगले पिळून घ्या जेणेकरून अतिरिक्त पाणी निघून जाईल.
• भिजवलेले सोया चंक्स मिक्सरमध्ये टाका आणि थोडं जाडसर पेस्टसारखं वाटून घ्या.
• एका भांड्यात वाटलेले सोया चंक्स, उकडलेले बटाटे, कांदा, हिरवी मिरची, आले-लसूण पेस्ट, कोथिंबीर, मसाले,
• मीठ आणि लिंबाचा रस एकत्र करून मिक्स करा.
• मिश्रण घट्ट राहण्यासाठी त्यात कॉर्नफ्लोअर किंवा ब्रेडक्रम्ब्स घाला. सर्व घटक चांगले मिसळा आणि थोडावेळ मुरू द्या.
• आता हाताने थोडेसे मिश्रण घ्या आणि कबाबच्या आकारात गोल किंवा तुमच्या आवडीच्या आकारात कबाब तयार करा.
• तव्यावर थोडं तेल गरम करा आणि मध्यम आचेवर कबाब दोन्ही बाजूंनी सोनेरी आणि क्रिस्पी होईपर्यंत शॅलो फ्राय करा.
• गरम गरम सोया कबाब हिरव्या चटणी, कांदा आणि लिंबाच्या फोडीसोबत सर्व्ह करा.
• तुम्हाला हवे असल्यास कबाब ओव्हनमध्ये किंवा एअरफ्रायरमध्येही बेक करू शकता.