गुजरातचा फेमस पदार्थ ‘हांडवो’ तुम्ही कधी खाल्ला आहे का? खमंग चवीचा हा पदार्थ सकाळच्या नाश्त्यासाठी आहे उत्तम पर्याय

 Handvo Recipe : हांडवो तुमच्या कुटुंबासाठी एक हेल्दी आणि चविष्ट पर्याय ठरेल. तुम्ही निवडक साहित्यापासून झटपट याला घरी तयार करु शकता. मुख्य म्हणजे हा एक चवीला टेस्टी पण आरोग्यासाठी हेल्दी असा पदार्थ आहे.

• हांडवो हा गुजरात राज्याचा एक पारंपारिक पदार्थ आहे.
• हा पदार्थ फक्त चवीलाच स्वादिष्ट नाही तर आरोग्यासाठीही निरोगी पर्याय आहे.
• अगदी सोप्या पद्धतीने तुम्ही हा पदार्थ घरीच तयार करु शकता.

भारतीय पाककलेत प्रत्येक राज्याची स्वतःची एक खास चव आणि परंपरा आहे. गुजरातची अशीच एक लोकप्रिय आणि पौष्टिक डिश म्हणजे हांडवो. हा एक प्रकारचा खमंग, कुरकुरीत आणि आतून मऊ असा केकसारखा पदार्थ आहे, जो डाळी, तांदूळ आणि भाज्यांच्या मिश्रणातून तयार केला जातो. त्यामुळे हा केवळ चविष्टच नाही तर प्रथिने, फायबर आणि आवश्यक पोषकतत्त्वांनी भरलेला असतो.

Recipe : झणझणीत पदार्थाने वाढवा बोरिंग जेवणाची चव, घरी बनवा अस्सल गावरान चवीचा ‘लाल मिरचीचा ठेचा’

हांडवो हा नाश्त्यासाठी, दुपारच्या जेवणासाठी किंवा हलक्या संध्याकाळच्या स्नॅकसाठी उत्तम पर्याय आहे. पारंपरिक पद्धतीत यासाठी पीठ आंबवले जाते, ज्यामुळे त्याला एक खास आंबटसर चव आणि मऊ टेक्स्चर मिळते. त्यात घातलेले तीळ, मोहरी आणि कढीपत्त्याची फोडणी त्याची चव आणखी वाढवते. आजच्या धावपळीच्या जीवनात हेल्दी आणि पटकन तयार होणाऱ्या पदार्थांची गरज असते. अशा वेळी हांडवो हा एक परफेक्ट पर्याय ठरतो.  चला तर मग, घरीच बनवूया खमंग आणि स्वादिष्ट हांडवो बनवण्याची रेसिपी जाणून घेऊया.

साहित्य:

• 1 कप तांदूळ
• ½ कप चणा डाळ
• ¼ कप तूर डाळ
• 2 चमचे उडीद डाळ
• 1 कप किसलेला दुधी भोपळा
• 2-3 हिरव्या मिरच्या (बारीक चिरलेल्या)
• 1 चमचा आले-लसूण पेस्ट
• ½ कप दही
• 1 चमचा हळद
• मीठ चवीनुसार
• 1 चमचा साखर
• 1 चमचा ईनो किंवा बेकिंग सोडा

फोडणीसाठी:

• 2 चमचे तेल
• 1 चमचा मोहरी
• 1 चमचा तीळ
• कढीपत्ता

कडाक्याच्या उन्हाळ्यात शरीर राहील फ्रेश आणि हायड्रेट! काही मिनिटांमध्ये घरीच बनवा थंडगार बेलाचे सरबत

कृती:

• सर्वप्रथम तांदूळ आणि सर्व डाळी 6-7 तास भिजवून ठेवा.
• नंतर हे मिश्रण मिक्सरमध्ये जाडसर वाटून घ्या.
• त्यात दही घालून पीठ 7-8 तास आंबवण्यासाठी ठेवा.
• आंबलेल्या पिठात दुधी भोपळा, हिरव्या मिरच्या, आले-लसूण पेस्ट, हळद, मीठ आणि साखर घालून चांगले मिसळा.
• शेवटी ईनो घालून हलक्या हाताने ढवळा.
• कढईत तेल गरम करून त्यात मोहरी, तीळ आणि कढीपत्ता घालून फोडणी तयार करा.
• त्यात तयार पीठ घालून झाकण ठेवून मंद आचेवर 25-30 मिनिटे शिजवा.
• गरमागरम हांडवो हिरवी चटणी किंवा टोमॅटो सॉससोबत सर्व्ह करा.