बुधवार, 21 ऑक्टोबर 2026
कडाक्याच्या उन्हाळ्यात शरीर राहील फ्रेश आणि हायड्रेट! काही मिनिटांमध्ये घरीच बनवा थंडगार बेलाचे सरबत
उन्हाळा ऋतूला सुरुवात झाल्यानंतर स्किन केअर किंवा हेअर केअर रुटीनमध्ये ज्याप्रमाणे बदल केला जातो, तसाच बदल आहारात करणे सुद्धा आवश्यक आहे. कारण वाढत्या उन्हाळ्यात शरीराला पाण्याची खूप जास्त आवश्यकता असते. कडक उन्हात कुठेही बाहेर गेल्यानंतर खूप जास्त थकल्यासारखे वाटते तर काहींना अचानक चक्कर सुद्धा येते. त्यामुळे या दिवसांमध्ये आहारात बदल करणे आवश्यक आहे. उन्हाळ्यात खूप जास्त तिखट किंवा तेलकट पदार्थांचे अजिबात सेवन करू नये. या पदार्थांच्या सेवनामुळे ऍसिडिटी, अपचन किंवा आरोग्यासंबंधित संमस्या उद्भवण्याची जास्त शक्यता असते. आज आम्ही तुम्हाला सोप्या पद्धतीमध्ये बेलाचे सरबत बनवण्याची रेसिपी सांगणार आहोत. थंड पदार्थ पिण्याची इच्छा झाल्यानंतर कायमच ताक, कोल्ड्रिंक किंवा कोणताही सोडा आणून प्यायला जातो. पण त्यावेजी घरी बनवलेले बेलाचे सरबत प्यावे. शरीराचे वाढलेले तापमान नियंत्रणात ठेवण्यासाठी बेलाचे सरबत प्यायले जाते. चला तर जाणून घेऊया रेसिपी.(फोटो सौजन्य – pinterest)
कृती:
बेलाचे सरबत बनवण्यासाठी सर्वप्रथम, बेल फळाचे मध्यभागी दोन तुकडे करून घ्या. त्यानंतर त्याच्या आतील गर काढून घ्या.
बेलाचा गर काढून झाल्यानंतर त्यात २ ते ३ ग्लास थंड पाणी घालून काहीवेळ तसेच ठेवा. यामुळे गर मऊ होईल.
चाळणीवर बेलाचा गर व्यवस्थित गाळून घ्या. बेलाचे सरबत बनवताना मिक्सरचा वापर करू नये. यामुळे बिया रसात मिक्स होतात आणि चव बिघडून जाते.
गाळून घेतलेला गर एका भांड्यात घेऊन त्यात चवीनुसार मीठ, साखर आणि जिऱ्याची पावडर घालून मिक्स करा.
सगळ्यात शेवटी स्वच्छ धुवून घेतलेली पुदिन्याची पाने हाताने बारीक करून रसात टाका आणि मिक्स करून घ्या.
तयार आहे सोप्या पद्धतीमध्ये बनवलेले बेलाचे थंडगार सरबत.
