तोंडात टाकताच विरघळतील अशा खुसखुशीत करंज्या आता घरीच बनवा, वाचा सोपी रेसिपी

दिवाळी सणानिमित्त सर्वच घरांमध्ये लाडू, करंज्या, चकली इत्यादी पदार्थ बनवले जातात. त्यातील सगळ्यांच्या आवडीचा पदार्थ म्हणजे करंजी. चला तर जाणून घेऊया खुसखुशीत करंज्या बनवण्याची सोपी रेसिपी.

दिवाळी सणाला अवघे काही दिवस शिल्लक राहिले आहेत.दिवाळी सणाच्या काही दिवसांआधी सगळीकडे मोठी लगबग असते. घराची साफसफाई, दिवाळीची खरेदी, फराळ इत्यादी अनेक गोष्टी दिवाळी सणाला केल्या जातात. लाडू,करंज्या, चकली इत्यादी फराळाचे पदार्थ बनवल्याशिवाय दिवाळी सण साजरा झाल्यासारखा वाटत नाही. अनेक घरांमध्ये दिवाळीच्या पाच ते सहा दिवस आधी लाडू, करंज्या बनवण्यास सुरुवात केली जाते. फराळातील सगळ्यांच्या आवडीचा पदार्थ म्हणजे करंज्या. करंज्या बनवण्यासाठी जास्त वेळ लागतो त्यामुळे अनेक घरांमध्ये करंज्या विकत आणल्या जातात. पण विकतच्या करंज्या खाण्याऐवजी तुम्ही सोप्या पद्धतीमध्ये घरीसुद्धा करंज्या बनवू शकता. त्यामुळे आज आम्ही तुम्हाला तोंडात टाकताच विरघळणाऱ्या खुसखुशीत खोबऱ्याच्या करंज्या बनवण्याची सोपी रेसिपी सांगणार आहोत. या करंज्या बनवण्यासाठी फार वेळ लागत नाही. चला तर जाणून घेऊया रेसिपी.(फोटो सौजन्य-istock)

साहित्य:

• किसलेलं खोबर
• साखर
• वेलची पावडर
• काजू, बदामाचे बारीक तुकडे
• मैदा
• मीठ
• पाणी
• तूप
• चारोळी
• खसखस

हे देखील वाचा: Diwali 2024: यंदाच्या दिवाळीला बनवा जाळीदार-मऊसूत अनारसे, नोट करा पारंपरिक रेसिपी

कृती:

करंजीचे सारण बनवण्याची कृती:

• सर्वप्रथम उन्हात सुकवून घेतलेलं खोबर किसणीच्या साहाय्याने बारीक किसून घ्या. त्यानंतर मंद आचेवर खोबर व्यवस्थित भाजून घ्या. खोबर भाजून थंड झाल्यानंतर हातांच्या साहाय्याने कुस्करून त्यात भाजून घेतलेला खसखस, काजू बदामाचे बारीक तुकडे, वेलची पावडर, चारोळ्या, जायफळ किस टाकून मिक्स करा. नंतर त्यात पिठीसाखर टाकून पुन्हा एकदा मिक्स करून घ्या. अशा पद्धतीने करंजीचे सारण तयार करा.
• बाऊलमध्ये मैदा, मीठ आणि बारीक रवा टाकून मिक्स करून घ्या. त्यानंतर पिठामध्ये आवश्यकतेनुसार पाणी टाकून कणिक मळून घ्या. मळून घेतलेल्या पिठाला तेल लावून घ्या आणि काहीवेळ पीठ झाकून बाजूला ठेवा. करंजी बनवताना सगळ्यात आधी पिठाचे बारीक गोळे करून पातळ लाटून घ्या. त्यानंतर त्यात तयार केलेले खोबऱ्याचे सारण भरून करंजी व्यवस्थित चिकटण्यासाठी बाजूने पाणी लावून दोन्ही कडा बंद करून चिरणे घेऊन व्यवस्थित गोलाकार करंजी कापा.
• करंजी तळण्यासाठी गरम तेल करून त्यात करंजी टाकून व्यवस्थित भाजून घ्या. मंद आचेवर दोन्ही बाजूने करंजी भाजून झाल्यानंतर काढून घ्या.अशा पद्धतीने तयार आहे सोप्या पद्धतीमध्ये बनवलेली खुसखुशीत करंजी.