कारलं खायला आवडत नाही? मग सोप्या पद्धतीमध्ये घरी बनवा झणझणीत कारल्याचं भरीत, लहान मुलंसुद्धा आवडीने खातील

लहान मुलांपासून अगदी मोठ्यांपर्यंत अनेकांना कारलं खायला आवडत नाही. अशावेळी तुम्ही झणझणीत कारल्याचे भरीत बनवून खाऊ शकता. कारल्याचे भरीत भाकरीसोबत अतिशय सुंदर लागेल.

लहान मुलांपासून अगदी मोठ्यांपर्यंत अनेकांना कारलं खायला आवडत नाही. चवीला कडू असणाऱ्या कारल्याचे नाव घेतल्यानंतर लहान मुलं नाक मुरडतात. पण कारल्याची भाजी आरोग्यासाठी अतिशय गुणकारी आहे. शरीरात वाढलेला मधुमेह नियंत्रणात ठेवण्यासाठी अनेक लोक उपाशी पोटी कारल्याच्या रसाचे सेवन करतात. कारल्याच्या रसात चिमूटभर काळे मीठ टाकून प्यायल्यास बद्धकोष्ठता आणि आरोग्यासंबंधित अनेक समस्यांपासून आराम मिळेल. कारल्याची भाजी चवीला कडू लागते. पण या भाजीचे आठवड्यातून एकदा किंवा दोनदा सेवन केल्यास शरीरात सकारात्मक बदल दिसून येतील. म्हणूनच आज आम्ही तुम्हाला झणझणीत कारल्याचे भरीत बनवण्याची सोपी रेसिपी सांगणार आहोत. कारल्याचे भरीत भाकरी, चपाती किंवा भातासोबत सुद्धा तुम्ही खाऊ शकता. अनेक घरांमध्ये चिंच, गूळ घालून भाजी बनवली जाते तर काही लोक ओल खोबर घालून कारल्याची भाजी बनवतात. चला तर जाणून घेऊया कारल्याचे भरीत बनवण्याची सोपी रेसिपी.(फोटो सौजन्य – pintrest)

सकाळच्या नाश्त्यात १० मिनिटांमध्ये झटपट बनवा खमंग कोथिंबीर पराठा, नाश्ता होईल पोटभर

साहित्य:

• कारल्याची भाजी
• लसूण
• कांदा
• टोमॅटो
• हिरव्या मिरच्या
• शेंगदाण्याचा कूट
• चिंच कोळ
• लाल तिखट
• मीठ
• हळद
• काळा मसाला

कोळंबीचे थालीपीठ कधी खाल्ले आहेत का? नॉनव्हेज लव्हर्स झटपट फॉलो करा रेसिपी

कृती:

• कारल्याचे भरीत बनवण्यासाठी सर्वप्रथम, कारली स्वच्छ पाण्याने धुवून घ्या. त्यानंतर कारल्याचे देठ काढून घ्या.
• त्यानंतर कारल्याच्या गोलाकार चकत्या करून त्याच्या आतील बिया काढून घ्या. गरम पाण्यात १५ मिनिटं कारली शिजण्यासाठी ठेवा.
• कढईमध्ये तेल गरम करून त्यात मोहरी, हिंग, हळद घाला आणि वरून कांदा, टोमॅटो घालून मिक्स करा. त्यानंतर त्यात लसूण घालून पुन्हा एकदा व्यवस्थित मिक्स करा.
• कांदा टोमॅटो व्यवस्थित शिजल्यानंतर त्यात चवीनुसार मीठ घालून मिक्स करा. त्यानंतर कढईवर झाकण ठेवून गॅस मंद आचेवर ठेवा.
• त्यानंतर त्यात चिंच कोळ, शेंगदाण्याचा कूट आणि लाल तिखट, गरम मसाला आणि काळा मसाला घालून व्यवस्थित मिक्स करा.
• तयार केलेल्या मसाल्यामध्ये शिजवून मॅश केलेली कारली घालून व्यवस्थित मिक्स करा.
• तयार आहे सोप्या पद्धतीमध्ये बनवलेले झणझणीत कारल्याचे भरीत. हा पदार्थ भाकरीसोबत खूप सुंदर लागेल.