१० मिनिटांमध्ये बनवा वाटीभर रव्याचे पौष्टिक आप्पे, वाचा सोपी रेसिपी

सकाळच्या वेळी पोटभर नाश्ता केल्यास शरीरात ऊर्जा कायम टिकून राहते. त्यामुळे सकाळच्या वेळी नाश्ता करणे आवश्यक आहे. नाश्त्यामध्ये घरी अनेकदा पोहे, उपमा किंवा शिरा खाऊन कंटाळा आल्यानंतर काहींना काही नवीन पदार्थ खाण्याची इच्छा होते. अशावेळी तुम्ही वाटीभर रव्याचे पौष्टिक आप्पे बनवू शकता. हे आप्पे खाल्ल्यामुळे तुमचे पोटही भरले आणि नवीन पदार्थाची चवही चाखता येईल.

दक्षिण भारतामध्ये तांदूळ आणि उडीद डाळीपासून बनवलेले पदार्थ प्रसिद्ध आहेत.तिथे प्रामुख्याने डोसा, इडली, मेदुवडा, आप्पे इत्यादी पदार्थ नाश्त्यामध्ये आणि जेवणात बनवले जातात. त्यातील आप्पे हा पदार्थ सगळ्यांचं खूप आवडतो. कमीत कमी वेळात आणि घाईगडबडीमध्ये तुम्ही आप्पे बनवू शकता. दाक्षिणात्य पदार्थ भारतासह इतर सर्वच देशांमध्ये प्रसिद्ध झाले आहेत. सकाळच्या नाश्त्यामध्ये किंवा इतर वेळी आप्पे बनवून खाल्ले जातात. आप्पे बनवण्यासाठी खूप कमी साहित्य लागत आणि झटपट तयार होतात. त्यामुळे आज आम्ही तुम्हाला वाटीभर रवा वापरून खमंग पौष्टिक आप्पे कसे बनवायचे, याची सोपी रेसिपी सांगणार आहोत. चला तर जाणून घेऊया.

साहित्य:

• रवा
• दही
• बेसन
• मीठ
• हिरवी मिरची
• कांदा
• टोमॅटो
• शिमला मिरची
• गाजर
• सोया चंक्स
• मीठ
• धणे पावडर
• सांबार मसाला
• लाल तिखट
• हळद
• कोथिंबीर
• तूप

हे देखील वाचा: काकडी-टोमॅटो एकत्र खाल्ल्याने काय होते?

कृती:

• पौष्टिक आप्पे बनवण्यासाठी सर्वप्रथम वाटीभर रवा घेऊन स्वच्छ करून घ्या. त्यानंतर त्यात पाणी घालून काहीवेळ भिजण्यासाठी ठेवा.
• मिक्सरच्या भांड्यात भिजत ठेवलेला रवा, दही, बेसन आणि गरजेनुसार पाणी घालून बारीक पेस्ट तयार करा.
• पेस्ट बनवून झाल्यानंतर बारीक चिरून घेतलेला कांदा, टोमॅटो, सिमला मिरची, गाजर टाकून मिक्स करा.
• नंतर त्यात चवीनुसार मीठ, बारीक चिरलेली मिरची, चमचाभर सांबार मसाला, कोथिंबीर आणि बारीक करून घेतलेले सोयाबीन टाकून मिक्स करा.
• आप्पे बनवण्यासाठी अप्प्याचे भांडे गरम करण्यासाठी ठेवा. गरम झाल्यानंतर थोडस तूप लावून आप्प्याचे मिश्रण टाका.
• दोन्ही बाजूने आप्पे व्यवस्थित भाजल्यानंतर चटणीसोबत सर्व्ह करा.