IRCTC घेऊन आला जपान टूर पॅकेज, टोक्योपासून हिरोशिमपर्यंतची मजेदार सफर… जाणून घ्या संपूर्ण डिटेल्स

Japan Tour Package : IRCTC दिल्लीहून जपानला जाण्याचे एक खास टूर पॅकेज घेऊन आला आहे. यात फ्लाईटचे तिकिट, राहण्याची-खाण्याची सोय तसेच लोकल ट्रान्सपोर्टचा खर्च अशा अनेक सुविधा पुरवल्या जातील. फक्त टूर पॅकेज बुक करा आणि जपान दर्शनाची तयारी करा.

• या खास परदेशी टूरमध्ये पर्यटकांना अनेक प्रसिद्ध शहरांसह ऐतिहासिक आणि निसर्गरम्य ठिकाणांना भेट देता येणार आहे.
• प्रवासादरम्यान निवास, जेवण, स्थानिक वाहतूक, व्हिसा आणि इतर आवश्यक सुविधा पॅकेजमध्ये समाविष्ट आहेत.
• इच्छुक प्रवाशांसाठी बुकिंगपूर्वी काही आवश्यक कागदपत्रे आणि वैध पासपोर्ट असणे बंधनकारक आहे.

इंडियन रेल्वे केटरिंग अँड टुरिझम कॉर्पोरेशनने (IRCTC) दिल्लीहून जपान फिरण्यासाठी ९ रात्री आणि १० दिवसांचे एक खास टूर पॅकेज लाँच केले आहे. या पॅकेज अंतर्गत, प्रवाशांना जपानमधील काही प्रसिद्ध शहरांची आणि ऐतिहासिक ठिकाणांची सैर करता येईल. ही यात्रा ६ सप्टेंबरपासून दिल्लीहून सुरु होत असून पर्यटकांना यात टोकियो, हाकोने, हामामात्सु, क्योटो, ओसाका, नारा आणि हिरोशिमा यांसारख्या प्रमुख जपानी शहरांना देता येईल. प्रवासी दिल्लीहून जपानच्या हानेडा एअरपोर्टसाठी उड्डाण भरतील आणि १५ सप्टेंबरला यात्रा संपवून पुन्हा भारतात परततील.

टूर पॅकेजची किंमत किती?

पॅकेजची किंमत ट्रिपल शेअरिंगच्या आधारावर प्रति व्यक्ती 3,45,999 रुपये ठेवण्यात आली आहे. सोबतच ट्विन शेअरिंगसाठी प्रति व्यक्ती 3,49,999 रुपये खर्च आकारला जाणार आहे. जर प्रवाशाला एकटं खोलित रहाायचं असेल तर त्याला 4,73,999 रुपये इतका खर्च येईल. लहान मुलांसाठीची टूर पॅकेजमध्ये वेगळी किंमत निश्चित करण्यात आली आहे. ५ ते ११ वर्षांच्या मुलांसाठी बेडसह टूर पॅकेजची किंमत 2,92,499 रुपये इतकी असेल, तर विना बेड ही किंमत 2,63,999 रुपयांइतकी असेल.

Independence Day 2026 : 15 ऑगस्टला लाँग वीकेंडला प्लॅन करताय? मग मुंबईतील या ५ ठिकाणांना भेट द्या

पॅकेजमध्ये कोणकोणत्या सुविधा मिळतील?

IRCTC नुसार, या टूर पॅकेजमध्ये प्रवाशांना अनेक प्रकारच्या सुविधा पुरवल्या जातील. यात दिल्ली ते जपानला जाण्यासाठी इकोनॉमी क्लास फ्लाइट टिकट, 4-स्टार हाॅटेलमध्ये राहण्याची सोय आणि जपानचा टूरिस्ट व्हिसा यांचा समावेश आहे. याशिवाय, प्रवासादरम्यान रोजचा नाश्ता, दुपारचे जेवण आणि रात्रीचे जेवण हे देखील पॅकेजमध्ये समाविष्ट असेल. इतकंच नाही तर एअरपोर्टपासून हाॅटेल आणि वेगवेगळ्या ठिकाणी फिरण्यासाठी लोकल ट्रांसपोर्टचा खर्च देखील या टूर पॅकेजमध्ये समाविष्ट असणार आहे. जपानमधील प्रमुख पर्यटन स्थळांच्या सहली एसी बसमधून आयोजित केल्या जातील. ७० वर्षांखालील प्रवाशांसाठी प्रवास विम्याचाही समावेश आहे. संपूर्ण प्रवासात माहिती आणि मार्गदर्शनासाठी टूर गाईड उपलब्ध असेल. लागू असलेले कर देखील पॅकेजच्या किंमतीत समाविष्ट आहेत.

फ्लाईटचा शेड्यूल काय?

पर्यटक ऑल निप्पॉन एयरवेजच्या (ANA) फ्लाईटने जपानला पोहचतील. ही फ्लाईट ६ सप्टेंबर रोजी संध्याकाळी ६ वाजताच्या सुमारास दिल्लीहून उड्डाण घेईल आणि दुसऱ्या दिवशी सकाळी ५.५५ वाजताच्या सुमारास हानेडा एयरपोर्टला दाखल होईल. जपानमधून भारतात परतताना हानेडा एअरपोर्टवर सकाळी ११.१० वाजता फ्लाईट टेक ऑफ करेल आणि ४.३० वाजता दिल्लीत दाखल होईल. तथापि, आयआरसीटीसीने म्हटले आहे की, हे विमान वेळापत्रक सध्या अंदाजित असून एअरलाइनच्या परिचालन गरजेनुसार त्यात बदल होऊ शकतो.

टूर पॅकेजमध्ये कोणकोणत्या ठिकाणांची सैर केली जाईल?

या १० दिवसांच्या टूर पॅकेजची सुरुवात टोकियोला भेट देण्यापासून होईल. इथे पर्यटकांना आसाकुसा मंदिर, नाकामिसे दोरी मार्केट, उएनो पार्क, ओडाईबा आणि टीमलॅब प्लॅनेट्स अशा प्रसिद्ध ठिकाणांची भेट करुन दिली जाईल. पर्यटकांना माऊंट फुजीचे पाचवे स्टेशन (ओशिनो हक्काई), ओवाकुदानी व्हॅली, हाकोने रोपवे आणि हाकोने पायरेट शिप क्रूझची सैरदेखील करवली जाईल. याशिवाय नागोयामधील टोयोटा संग्रहालय आणि एससीमॅगलेव्ह रेल्वे संग्रहालय, क्योटोचे अराशियामा बांबू फॉरेस्ट, किंकाकु-जी मंदिर आणि फुशिमी इनारी ताईशा, ओसाका किल्ला, नारा डियर पार्क आणि तोडाई-जी मंदिर या ठिकाणांचीही भेट पर्यटक या टूर पॅकेजमध्ये घेणार आहेत.

जगातील सर्वाधिक पाऊस भारताच्या या ठिकाणी होतो! निसर्गप्रेमींची पहिली पसंत आहे हे ठिकाण…

बुकिंगचे डिटेल्स

IRCTC नुसार, या टूरसाठी अर्ज करणाऱ्या प्रवाशांकडे परत येण्याच्या तारखेपासून किमान ६ महिने वैध असलेला पासपोर्ट असणे अनिवार्य आहे. बुकिंगवेळी पॅनकार्डसह अन्य महत्त्वपूर्ण दस्तऐवज जमा करणे बंधनकारक असेल. याशिवाय जपानचा व्हिसा मिळवण्यासाठी प्रवाशांना आपली आर्थिक स्थिती आणि व्यावसायाशी जोडलेले काही कागदपत्रे जमा करावे लागतील.