डासांचा करायचाय नायनाट! लिंबाचे साल फेकून देण्याऐवजी त्याचा असा करा वापर; घरगुती उपायाने सर्व डास होतील छुमंतर

Home Remedies : बदलत्या वातावरणात डासांचा प्रार्दुभावही वाढू लागतो. घरभर फिरणाऱ्या या डासांना बाहेरचा रस्ता दाखवायचा असेल तर त्यासाठी तुम्ही लिंबाची मदत घेऊ शकता. या उपायाच्या मदतीने काही क्षणांतच घरातील सर्व डासांना पळवून लावण्यास मदत मिळेल.

• लिंबू आणि कडुलिंबाच्या मदतीने बनवा घरगुती डास प्रतिबंधक दिवा
• कापूर, लवंग आणि दालचिनीच्या सुगंधाने डासांना दूर ठेवण्याचा उपाय
• संध्याकाळी घरात डासांचा त्रास कमी करण्यासाठी ट्राय करा हा सोपा उपाय

बदलत्या हवामानात डास ही घरातील एक मोठी समस्या सर्वांनाच त्रासदायक ठरते. विशेषतः संध्याकाळ जवळ येताच, डासांचे थवे घरांभोवती घिरट्या घालू लागतात. त्यांना दूर ठेवण्यासाठी, लोक कॉइल्स, स्प्रे आणि इतर डास प्रतिबंधक कॉईल्स वापरतात. पण, हे प्रतिबंधक कधीकधी आरोग्यासाठी हानिकारक असू शकतात. तुम्ही डासांना घरापासून दूर ठेवण्यासाठी नैसर्गिक घटकांचा वापर देखील करू शकता. प्रसिद्ध इंटरनेट पर्सनॅलिटी पूनम देवनानीने डासांना दूर ठेवण्याची अशीच एक नैसर्गिक पद्धत सांगितली आहे. घरगुती उपाय करून तुम्ही डासांचा नायनाट करू शकता.

यासाठी लागणारे आवश्यक साहित्य:

• एक लिंबू,
• कडुलिंबाची काही पाने
• थोडा कापूस
• थोडे कडुलिंबाचे तेल किंवा मोहरीचे तेल
• २-३ कापराच्या काड्या
• ५-६ लवंगा
• १ दालचिनीची काडी

 

डासांना दूर ठेवण्यासाठी काय करावे?

• सर्वप्रथम, एक लिंबू कापून त्याचा रस काढा. आता, चमच्याने लिंबाच्या दोन्ही अर्ध्या भागांमधील उरलेला गर पूर्णपणे स्वच्छ करा. तुम्हाला फक्त अर्ध्या लिंबाची साल लागेल
• लिंबू स्वच्छ केल्यावर, काही कडुलिंबाची पाने वाळवून हलक्या हाताने ठेचून घ्या. ही पाने लिंबाच्या सालीमध्ये ठेवा
• आता, कापसापासून एक लहान वात बनवा आणि ती लिंबाच्या सालीमध्ये ठेवा
• त्यावर थोडे कडुलिंबाचे तेल टाका; कडुलिंबाचे तेल उपलब्ध नसल्यास, तुम्ही मोहरीचे तेल वापरू शकता
  यानंतर, वातीच्या भोवती थोडे कापूर ठेवा
• लवंग आणि दालचिनी ठेचून त्यांची थोडी पूड वातीजवळ ठेवा
• यानंतर, गरज वाटल्यास आणखी थोडे तेल घाला
• आता, ही वात पेटवा आणि जिथे डास जास्त प्रमाणात जमा होण्याची शक्यता आहे, अशा ठिकाणी ठेवा. तुमची इच्छा असल्यास, तुम्ही असे २ किंवा ३ दिवे बनवून घराच्या वेगवेगळ्या कोपऱ्यांमध्ये ठेवू शकता.
• या दिव्याच्या वासामुळे डास दूर राहतात. तुमच्या घरात हा दिवा लावल्याने तुम्ही नैसर्गिकरित्या डासांना दूर ठेवू शकता.
• विशेषतः संध्याकाळी, हा दिवा लावल्याने तुम्हाला एकही डास दिसणार नाही आणि लिंबू, कडुलिंब, लवंग, कापूर व दालचिनीचा सुगंध तुमचे घरभर पसरेल. त्यामुळे, डासांना दूर ठेवण्यासाठी तुम्ही हा उपाय करून पाहू शकता.