Ram Navami : राम नवमी निमित्त खास प्रसाद, झटपट घरी तयार करा स्वादिष्ट रव्याचा शिरा

Ravyacha Sheera Recipe : रव्याचा शिरा हा प्रसादासाठी बनवला जाणारा एक लोकप्रिय पदार्थ आहे. मऊ आणि गोड चवीचा हा शिरा फार झटपट तयार होतो आणि सर्वांना खुश देखील करतो.

• राम नवमी म्हणजे भगवान रामाचा जन्मदिवस.
• या दिवशी रामाची पूजा करुन त्याला प्रसाद अर्पण केला जातो.
• राम नवमीनिमित्त तुम्ही घरी गोडसर चवीचा रव्याचा शिरा तयार करु शकता.

राम नवमी हा भगवान रामांच्या जन्माचा पवित्र सण असून या दिवशी घराघरात भक्तिभावाने पूजा केली जाते. या सणाचे वैशिष्ट्य म्हणजे साधेपणा, पवित्रता आणि प्रसादामधील सात्विकता. अनेक ठिकाणी या दिवशी गोड पदार्थ म्हणून रव्याचा शिरा तयार करून भगवान रामांना नैवेद्य दाखवला जातो. शिरा हा पदार्थ जितका सोपा आहे तितकाच तो चविष्ट आणि मनाला समाधान देणारा आहे.

Summer Special: कडाक्याच्या उन्हाळ्यात १० मिनिटांमध्ये झटपट बनवा काकडीची चविष्ट कढी, पोटात टिकून राहील थंडावा

रव्याचा शिरा बनवताना वापरले जाणारे साहित्य सहज उपलब्ध असते आणि त्याची बनवण्याची पद्धतही सोपी असते, त्यामुळे प्रत्येकजण हा प्रसाद घरी बनवू शकतो. योग्य प्रमाणात तूप, साखर आणि रवा वापरून तयार केलेला शिरा मऊ, सुगंधी आणि स्वादिष्ट लागतो. विशेष म्हणजे, प्रसाद म्हणून बनवताना त्यात प्रेम आणि श्रद्धा असणे अधिक महत्त्वाचे असते. चला तर मग, राम नवमीसाठी खास रव्याचा शिरा कसा बनवायचा याची रेसिपी जाणून घेऊया.

साहित्य :

• 1 कप रवा
• 3/4 कप साखर
• 2 ते 3 टेबलस्पून तूप
• 2 कप पाणी किंवा दूध (किंवा दोन्ही मिसळून)
• 5-6 काजू (तुकडे केलेले)
• 5-6 बदाम (बारीक कापलेले)
• 1 टेबलस्पून मनुका
• 1/2 टीस्पून वेलची पूड
• थोडे केशर (ऑप्शनल)

वजन झपाट्याने कमी करण्यासाठी रात्रीच्या जेवणासाठी प्या चविष्ट ओट्स सूप, पोटावर वाढलेली चरबी होईल नष्ट

कृती :

• सर्वप्रथम कढईमध्ये तूप गरम करून त्यात काजू, बदाम आणि मनुका हलके सोनेरी होईपर्यंत भाजून घ्या. ते बाजूला काढून ठेवा.
• त्याच कढईमध्ये उरलेले तूप घालून रवा मंद आचेवर भाजायला सुरुवात करा. रवा हलक्या सोनेरी रंगाचा होईपर्यंत आणि छान सुगंध येईपर्यंत सतत हलवत भाजा.
• दुसऱ्या भांड्यात पाणी किंवा दूध गरम करून घ्या. त्यात केशर घालू शकता.
• भाजलेल्या रव्यात हळूहळू गरम पाणी किंवा दूध घाला. गुठळ्या होऊ नयेत म्हणून सतत हलवत राहा.
• रवा शिजून मिश्रण घट्ट झाले की त्यात साखर घाला. साखर घातल्यानंतर शिरा थोडा पातळ होईल, त्यामुळे पुन्हा थोडा वेळ शिजू द्या.
• आता त्यात वेलची पूड आणि भाजलेले ड्रायफ्रूट्स घाला. सर्व नीट मिसळा.
• शिरा मऊ आणि सुगंधी झाला की गॅस बंद करा.
• गरमागरम शिरा भगवान रामांना नैवेद्य म्हणून अर्पण करा. त्यानंतर प्रसाद म्हणून सर्वांना वाटा.
• शिरा अधिक चविष्ट करण्यासाठी पाण्याऐवजी दूध वापरू शकता.
• साखरेचे प्रमाण आपल्या आवडीनुसार कमी-जास्त करू शकता.
• प्रसादासाठी बनवताना शक्यतो शुद्ध तूप वापरा.