गल्ली गल्लीत फेमस असा ‘जीनी डोसा’ घरी कसा तयार करायचा? याची मसालेदार अन् चिजी चव मन खुश करून टाकेल

Jini Dosa Recipe : जिनी डोसा हा मुंबईतील एक लोकप्रिय आणि आकर्षक दिसणारा स्ट्रीट फूड डोसा आहे. चीज, भाज्या, मसाले घालून तयार केलेला हा डोसा चवीला फार छान लागतो आणि पोटभरणीचा ठरतो.

डोसा म्हटलं की आपल्या डोळ्यांसमोर लगेच दक्षिण भारतीय खाद्यसंस्कृती उभी राहते. कुरकुरीत, सोनसळी रंगाचा आणि चटणी-सांबारसोबत खाल्ला जाणारा हा पदार्थ आता केवळ दक्षिण भारतापुरता मर्यादित राहिलेला नाही. भारतभरच नव्हे तर परदेशातसुद्धा डोश्याचा सुगंध सर्वत्र पसरलेला दिसतो. डोश्याचे वेगवेगळे प्रकार आपल्याला पाहायला मिळतात – साधा डोसा, मसाला डोसा, रवा डोसा, मैसूर डोसा, पेपर डोसा अशा अनेक प्रकारांमध्ये हा पदार्थ आपल्या पोटाची भूक भागवतो.

वेट लॉससाठी घरी बनवा Cucumber Salad; सेलिब्रिटींच्याही आवडीची आहे डिश

त्याच प्रकारात एक खास आणि चविष्ट प्रकार आहे जिनी डोसा. मुंबईतील स्ट्रीट फूडमध्ये विशेष लोकप्रिय झालेला हा डोसा थोडा वेगळ्या पद्धतीने बनवला जातो. ह्यात वेगवेगळ्या भाज्या, मसाले आणि चीज वापरून डोश्याला एकदम अनोखा स्वाद दिला जातो. हॉटेलमध्ये किंवा गाडीवर मिळणारा जिनी डोसा तरुणाईमध्ये विशेष लोकप्रिय आहे कारण तो चवदार, तिखट, मसालेदार आणि चीजमुळे क्रिमी टेक्स्चर देणारा असतो. हा डोसा खाल्ल्यावर तुम्हाला साध्या डोश्यापेक्षा वेगळा अनुभव मिळतो. चला तर मग जाणून घेऊया यासाठी लागणारे साहित्य आणि कृती.

साहित्य

• डोश्याचे पीठ – २ कप
• बटर – २ टेबलस्पून
• बारीक चिरलेला कांदा – १
• बारीक चिरलेला टोमॅटो – १
• बारीक चिरलेली ढोबळी मिरची – १
• आलं-लसूण पेस्ट – १ टीस्पून
• हिरवी मिरची (बारीक चिरलेली) – २
• लाल तिखट – १ टीस्पून
• गरम मसाला – ½ टीस्पून
• मीठ – चवीनुसार
• चीज – ½ कप (किसलेले)
• कोथिंबीर – सजावटीसाठी

चवीबरोबरच घ्या आरोग्याचीही काळजी… घरी बनवा स्वादिष्ट मसाला ओट्स; चव अशी की पदार्थाचे फॅनच व्हाल

कृती

• यासाठी सर्वप्रथम एका पॅनमध्ये बटर गरम करून त्यात कांदा, टोमॅटो, ढोबळी मिरची, हिरवी मिरची आणि
• आलं-लसूण पेस्ट टाकून छान परतून घ्या.
• भाज्या मऊ झाल्यावर त्यात लाल तिखट, गरम मसाला आणि मीठ घालून व्यवस्थित मिक्स करा.
• गरम तव्यावर डोश्याचे पीठ पसरून घ्या आणि त्यावर थोडे बटर घाला.
• डोश्यावर तयार केलेल्या मसालेदार भाज्यांचे मिश्रण पसरवा.
• किसलेले चीज वरून शिंपडा आणि झाकण ठेऊन डोसा थोडा कुरकुरीत होईपर्यंत शिजवा.
• डोसा तयार झाल्यावर पिझ्झा सारखा काप करून जिनी डोसा रोलसारखा गुंडाळून घ्या.
• वरून कोथिंबीर घालून नारळाची चटणी आणि सांबारसोबत गरम सर्व्ह करा.
• चीज आवडत असेल तर अधिक प्रमाणात घालू शकता.
• हा डोसा पिझ्झा किंवा रोलसारखा दिसतो त्यामुळे मुलांनाही फार आवडतो.