प्लास्टरसाठी रुग्णाकडून 400 रुपयांची लाच; पैसे मागणाऱ्या ‘त्या’ कामगाराला केले निलंबित

कल्याण डोंबिवली पालिकेच्या कल्याणमधील रुक्मिणीबाई रुग्णालयातील एका सफाई कामगाराला निलंबित केले आहे. मुकेश पंडित असे या सफाई कामगाराचे नाव आहे. त्याची विभागीय चौकशीही प्रस्तावित करण्यात येणार आहे.

कल्याण : कल्याण डोंबिवली पालिकेच्या कल्याण मधील रुक्मिणीबाई रुग्णालयातील एक सफाई कामगार दोन दिवसापूर्वी रात्रीच्या वेळेत एका रुग्णाकडून दुखावलेल्या पायाला प्लास्टर करण्यासाठी ४०० रूपये मागत होता. यासंबंधीची दृश्यध्वनी चित्रफित समाज माध्यमावर प्रसारित होताच, पालिका प्रशासनाने या प्रकरणाची गंभीर दखल घेत त्या सफाई कामगाराला तडकाफडकी शुक्रवारी पालिका सेवेतून निलंबित केले आहे. मुकेश पंडित असे या सफाई कामगाराचे नाव आहे.

पालिकेची शास्त्रीनगर, रुक्मिणीबाई रुग्णालये अनागोंदी कारभारामुळे गेल्या दोन वर्षापासून चर्चेत आहेत. तरीही पालिका प्रशासन या रुग्णालयातील डॉक्टर, कर्मचाऱ्यांच्या बदल्या, झाडाझडती करत नसल्याने नागरिक आश्चर्य व्यक्त करत आहेत. अलीकडेच एका कारवाईच्या फेऱ्यात सापडलेल्या एका वैद्यकीय अधिकाऱ्याशी मुकेश पंडितचे सलोख्याचे संबंध असल्याची पालिका रुग्णालयात चर्चा आहे. या वैद्यकीय अधिकाऱ्याच्या आशीर्वादाने सफाई कामगार असुनही मुकेश पंडित रुग्णांना आपण रुग्ण सेवेतील मोठे जाणकार असल्याचा आव आणून मार्गदर्शन करत असत, अशा तक्रारी आहेत. बुधवारी संध्याकाळी चार वाजता बाई रुक्मिणीबाई रुग्णालयात एक रुग्ण डाव्या पायाला गंभीर दुखापत झाल्याने उपचारासाठी दाखल झाला. यावेळी कर्तव्यावरील वैद्यकीय अधिकाऱ्याने त्या रुग्णाला तपासले. त्यांच्या पायाला फॅक्चर असल्याने पायाला आधार देण्यासाठी त्याला प्लास्टर करण्याचा सल्ला दिला. हे प्लास्टर सकाळी अस्थितज्ज्ञ डॉक्टर करतील असे ठरले.

दरम्यान, संबंधित रुग्णाला प्लास्टर करण्यासाठी कक्षात नेण्यात आले. तेथे सफाई कामगार मुकेश पंडितने रुग्णाच्या नातेवाईकांकडून प्लास्टर ऑफ पॅरिसचे साहित्य आणण्यासाठी ४०० रूपयांची मागणी केली. रुक्मिणीबाई रुग्णालयात प्लास्टर करण्याच्या साहित्याचा पुरेसा साठा होता. ते साहित्य पंडितने रुग्णाला उपलब्ध करून देणे आवश्यक होते. पंडितने रुग्ण, नातेवाईकांची अडवणूक करून त्यांच्याकडे पैसे दिल्याशिवाय प्लास्टर होणार नाही अशी भूमिका घेतली. रुग्णाच्या नातेवाईकांनी कर्मचारी प्लास्टर करण्यासाठी कसे पैसे मागतो याची गुपचूप मोबाईलमधून दृश्यध्वनी चित्रफित तयार केली.

हे सुद्धा वाचा : क्षुल्लक भांडणाचा भयंकर शेवट; पत्नीचा मृत्यू, आईला फोन लावला अन् घाबरलेल्या पतीनेही उचलले टोकाचे पाऊल

रुग्णालयातील मुकेश पंडितच्या अनेक तक्रारी 

रुक्मिणीबाई रुग्णालयात प्लास्टर नसल्याची आणि त्यासाठी रुग्णाकडे कामगार मुकेश पंडित पैसे मागत असल्याच्या दृश्यध्वनी चित्रफितीची वैद्यकीय आरोग्य विभागाचे उपायुक्त प्रसाद बोरकर, वैद्यकीय आरोग्य अधिकारी डॉ. दीपा शुक्ल यांनी गंभीर दखल घेतली. रुक्मिणीबाई रुग्णालयाच्या मुख्य वैद्यकीय अधिकाऱ्यांकडून अहवाल मागविण्यात आला. या अहवालात रुग्णालयात व अपघात कक्षात प्लास्टरचा पुरेसा साठा आहे. तरीही सफाई कामगार पंडितने रुग्णाच्या नातेवाईकांकडे पैशांची मागणी केली. पंडितच्या गैरवर्तनामुळे पालिकेची आणि रुग्णालय प्रशासनाची बदनामी झाली म्हणून त्यांनी आपल्या कर्तव्यात कसुरी आणि गैरवर्तन केल्याने महाराष्ट्र नागरी सेवा व शिस्त नियमाने त्याला पालिका सेवेतून डॉ. दीपा शुक्ल यांनी निलंबित केले आहे. त्याची विभागीय चौकशीही प्रस्तावित करण्यात येणार आहे.