Farmers News: शेतकरी संकटात! जंगली हत्तींसह वाघांची दहशत; खरिपानंतर आता रब्बी हंगामही धोक्यात

Gadchiroli the Rabi season : आधी अवकाळी पावसामुळे धोका, आता जंगली प्राण्यांमुळे शेतकरी संकटात पाहायला मिळत आहे. गडचिरोत पाचही वनविभागात जंगली प्राण्यांनी दहशत मांडून ठेवली.

• जंगली हत्ती आणि वाघांच्या दहशतीमुळे शेतकरी संकटात
• खरिपानंतर आता रब्बी हंगामही धोक्यात
• पाचही वनविभागांत वाघांनी प्रचंड दहशत निर्माण

गडचिरोली: चार वर्षापूर्वी ओडिशातून आलेल्या जंगली हत्तींनी जिल्हावासींना हैराण करून सोडले होते. हत्ती कधी दक्षिण गडचिरोली तर कधी मध्य व उत्तर गडचिरोलीत फेरफटका मारत आहेत. यासोबतच गडचिरोली वनवृत्ताच्या पाचही वनविभागांत वाघांनी प्रचंड दहशत निर्माण केली आहे. क्वचितप्रसंगी वाघाचे दर्शन होणाऱ्या भागात ‘पगमार्क’ दिसून येत असल्याने शेतकऱ्यांमध्ये भीतीचे वातावरण निर्माण झाले आहे. त्यामुळे खरिपासह रब्बी हंगाम धोक्यात येण्याची शक्यता शेतकऱ्यांकडून व्यक्त केली जात आहे.

‘दुष्काळात तेरावा महिना’! आधी अतिवृष्टी, त्यात खत दरवाढीने शेतकऱ्यांचे मोडले कंबरडे

मागील तीन चार वर्षांपूर्वी – ओडिशा राज्यातून छत्तीसगडमार्गे जंगली हत्तींनी गडचिरोली जिल्ह्याच्या धानोरा तालुक्यात प्रवेश केला. त्यानंतर त्या हत्तींच्या कळपाने कोरची, कुरखेडा, देसाईगंज, आरमोरी तालुक्यांत बरेच दिवस बस्तान मांडले होते. त्यानंतर त्यांनी गडचिरोली व आरमोरी तालुक्यांच्या सीमावर्ती भागात मागील वर्षभरापासून मुक्काम ठोकला होता. त्यामुळे या दोन्ही तालुक्यातील खरिपासह रब्बी हंगामात शेतकऱ्यांचे मोठे नुकसान झाले. रात्रीच्या सुमारास हत्तींकडून नुकसान तर पिकांच्या संरक्षणासाठी गेलेल्या शेतकऱ्यांवर दिवसा वाघांचे हल्ले होऊ लागल्यामुळे पिकांचे संरक्षण तरी कसे करायचे? असा प्रश्न शेतकऱ्यांसमोर उपस्थित झाला आहे. दरम्यानच्या काळात गडचिरोली तालुक्यात मुक्कामी असलेल्या हत्तींनी चामोर्शी, एटापल्ली व भामरागड तालुक्यात भरमंती केली.

अल्पावधीतच हत्तींच्या कळपाने परत आपला मोर्चा गडचिरोली तालुक्याकडे वळविला. मात्र, हत्तींनी गडचिरोली तालुका सोडताच वाघांचे दर्शन होऊ लागले होते. त्यामुळे ‘हत्ती गेले की वाघ व वाघ गेले की हत्ती’ अशी स्थिती गडचिरोलीसह अनेक तालुक्याची झाली आहे. सध्या खरीप हंगामातील पिकांची काढणी सुरू असून, रब्बी हंगामासाठी पूर्वमशागतीची कामे सुरू झाली आहेत. मात्र, जिल्ह्यात वाढलेल्या वन्यप्राण्यांमुळे शेती करायची तरी कशी? अशी स्थिती शेतकऱ्यांची झाली आहे.

तीन तालुक्यात वाघांची भीती, नागरिकांमध्ये संताप

जिल्ह्याध्या आरमोरी, देसाईगंज व गडचिरोली तालुक्यात वाघांचे दर्शन नेहमी होत होते. क्वचितच चामोर्शी तालुक्यात वाघाचे दर्शन हायचे. मात्र, मागील काही दिवसांपासून चामोशी तालुक्यासह मुलचेरा तालुक्यातही वाधांचे दर्शन होऊ लागल्यामुळे नागरिकामध्ये भीतीचे वातावरण निर्माण झाले आहे. वनविभागाकडून नागरिकांना सतर्क केले जात असले तरी वाघांची दहशत कायम असल्यामुळे शेतकऱ्यांचे मोठे नुकसान होत आहे.

शेतकऱ्यांचे ई-केवायसीकडे दुर्लक्ष; मराठवाड्यात ६.७८ लाख शेतकरी बाकी