अन्न व औषध प्रशासनाची मोठी कारवाई; तब्बल 1900 किलो खाद्यपदार्थ केले जप्त

अन्न पदार्थ्यांचे नियमित अन्न नमुने घेऊन उर्वरित साठा १९०० किलो, किंमत ५ लाख ७२ हजार रुपये जप्त करून अकोला महानरपालिकेच्या अंतर्गत बायोगॅस प्रकल्प, भोड येथे नष्ट करण्यात येणार आहे.

• सुमारे 1900 किलो खाद्यपदार्थावर कारवाई
  
• ५ लाख रुपयांचा मुद्देमाल ताब्यात
  
• सहाय्यक आयुक्त देवेंद्र वीर यांना मिळाली होती माहिती

अकोला : असुरक्षित पद्धतीने अकोल्यात आणला जात असलेला मावा, खवा, हलवा यासह सुमारे 1900 किलो खाद्यपदार्थ अन्न व औषध प्रशासनाने सोमवारी मोठी कारवाई करत जप्त केले. या कारवाईत सुमारे ५ लाख रुपयांचा मुद्देमाल ताब्यात घेण्यात आला. अन्न व औषध प्रशासनाचे सहाय्यक आयुक्त देवेंद्र वीर यांना मिळालेल्या गोपनीय माहितीच्या आधारे ही कारवाई करण्यात आली.

रायली जिन परिसरातील आरको ट्रान्सपोर्टच्या माध्यमातून खाद्यपदार्थ असुरक्षित पद्धतीने अकोल्यात आणले जात असल्याची माहिती सहाय्यक आयुक्त देवेंद्र वीर यांना मिळाली होती. माहितीच्या आधारे सोमवारी आरको ट्रान्सपोर्ट, रायली जिन, अकोला येथे दुपारी ११.३० वाजता तपासणी केली असता तेथे अहमदाबाद गुजरात येथून विविध ब्रँडचे स्वीट हलवा (अंबिका), ट्रॅडिशनल स्वीट (जीडब्लूएएल), हलवा (श्री जीडब्ल्यूएएल), रिच स्वीट (अंबिका), ब्रजनिधी स्वीट, मुरलीधर स्वीट आदींचा साठा अहमदाबाद गुजरात येथून एमपी-०९/एचक्यू-५००४ आणि एमएच-२८/एबी-७८८२ या क्रमांकाच्या दोन ट्रकमधून वाहतूक करण्यात आला होता, अशी माहिती मिळाली आहे.

अन्न पदार्थांचे नमुने पाठवले प्रयोगशाळेत

अन्न पदार्थ्यांचे नियमित अन्न नमुने घेऊन उर्वरित साठा १९०० किलो, किंमत ५ लाख ७२ हजार रुपये जप्त करून अकोला महानरपालिकेच्या अंतर्गत बायोगॅस प्रकल्प, भोड येथे नष्ट करण्यात येणार आहे. माल मागवणारे व्यापारी कमल शर्मा, वैभव पाटील, अशोक अहुजा यांचे परवाने निलंबित करण्यात आले आहेत. ही कारवाई आयुक्त तुकाराम मुंढे, अमरावतीचे सहआयुक्त सचिन केदारे यांच्या मार्गदर्शनाखाली सहाय्यक आयुक्त अकोला देवानंद वीर आणि अन्न सुरक्षा अधिकारी किशोर बोरचाटे यांनी केली आहे.

बीडमध्ये अन्न व औषध प्रशासनाचा दणका

दुसरीकडे, प्रतिबंधित अन्नपदार्थांची विक्री करणे, अन्नपदार्थांच्या निर्मिती व विक्रीच्या ठिकाणी स्वच्छता आणि सुरक्षिततेच्या नियमांचे उल्लंघन करणाऱ्यांविरोधात अन्न व औषध प्रशासनाने कारवाई केली आहे. आयुक्त तुकाराम मुंढे यांच्या निर्देशानुसार २४ सप्टेंबर रोजी बीड शहरात दोन ठिकाणी कारवाई करून प्रतिबंधित गुटखा व पानमसाला जप्त केला आहे. संबंधित विक्रेत्यांविरोधात शहर पोलीस ठाण्यात गुन्हे दाखल करण्यात आले आहेत. दरम्यान, जालना रोडवरील चहा-नाश्ता सेंटरमध्ये गंभीर त्रुटी आढळल्याने त्याचा परवाना निलंबित करण्यात आला आहे.

Nagpur News : चार उमेदवारांचे अर्ज दाखल; शक्तिप्रदर्शनाचा जोर, भाजपची रॅली मात्र रद्द