Navarashtra Impact: ‘नवराष्ट्र’च्या पाठपुराव्याला यश! आंबेडकर चौक ते शिवाजी महाराज चौक अतिक्रमणांवर नगरपरिषदेची कारवाई

Navarashtra Impact: आंबेडकर चौक ते शिवाजी महाराज चौक परिसरातील अतिक्रमण कारवाईत पक्षपात होत असल्याचा आरोप करण्यात आला होता. ‘नवराष्ट्र’ने या प्रकरणाचा सातत्याने पाठपुरावा केल्यानंतर अखेर नगरपरिषद प्रशासन अ‍ॅक्शन मोडवर आले आहे. २ ऑक्टोबरपासून अतिक्रमण हटवण्याच्या कारवाईला सुरुवात होणार आहे.

• अतिक्रमण कारवाईतील पक्षपाताच्या आरोपानंतर नगरपरिषद अ‍ॅक्शन मोडवर
• २ ऑक्टोबरपासून मोहीम
• आंबेडकर चौक ते शिवाजी महाराज चौक अतिक्रमण हटवण्यास सुरुवात

पोपट पिटेकर, अहिल्यानगर : शेवगाव शहरात काही दिवसांपूर्वी आंबेडकर चौक ते छत्रपती शिवाजी महाराज चौक दरम्यान प्रशासनाकडून अतिक्रमण हटाव मोहीम राबवण्यात आली होती. मात्र, या कारवाईदरम्यान प्रशासनाने छोटे व्यापारी आणि श्रीमंत व्यापारी असा उघड भेदभाव केल्याचा गंभीर आरोप वंचित बहुजन आघाडीचे नेते किसन चव्हाण यांनी केला आहे. याप्रकरणी त्यांनी थेट अहिल्यानगर जिल्हाधिकारी पंकज आशिया यांच्याकडे अधिकृत तक्रार करत प्रशासनाने समान कारवाई न केल्यास न्यायालयात जाण्याचा थेट इशाराही दिला होता.(Navarashtra Impact)

Navarashtra Impact: ‘नवराष्ट्र’च्या बातमीचा दणका; स्मार्ट बाजारवर एफडीएची धडक!

‘नवराष्ट्र’च्या प्रतिनिधीने याबाबत जाब विचारल्यानंतर प्रशासनाची धावपळ- अतिक्रमण कारवाईतील या पक्षपाती भूमिकेबाबत आणि नागरिकांमधील वाढत्या असंतोषाबाबत नवराष्ट्र’ने शेवगाव नगरपरिषदेच्या मुख्याधिकारी विजया गाडघे यांना थेट जाब विचारला. नवराष्ट्र’च्या या रोखठोक प्रश्नांनंतर नगरपरिषद प्रशासन खडबडून जागे झाले आहे.

या संदर्भात बोलताना मुख्याधिकारी विजया गाडघे यांनी स्पष्ट केले की, “अतिक्रमणाबाबत कोणतीही भेदभावपूर्ण कारवाई केली जाणार नाही. शहरात राहिलेले सर्व उर्वरित आणि बड्या व्यापाऱ्यांचे अतिक्रमण 2 ऑक्टोबरपासून मोहीम राबवून हटवण्यात येईल. असे आश्वासन त्यांनी दिले,अशी माहिती शेवगाव नगरपरिषद मुख्याधिकारी विजया घाडगे यांनी दिली.

वंचित बहुजन आघाडीचा आक्रमक पवित्रा

याप्रकरणी वंचित बहुजन आघाडीचे राज्य उपाध्यक्ष किसन चव्हाण यांनी आरोप करताना म्हटले की, “प्रशासनाने कारवाई करताना केवळ गरीब आणि छोट्या टपरीधारकांना, किरकोळ व्यापाऱ्यांना लक्ष्य केले; तर श्रीमंत आणि वजनदार व्यापाऱ्यांच्या पक्क्या अतिक्रमणांकडे जाणीवपूर्वक दुर्लक्ष केले. या अन्यायाविरोधात त्यांनी जिल्हाधिकाऱ्यांकडे दाद मागितली असून, २ ऑक्टोबरच्या कारवाईतही टाळाटाळ झाल्यास न्यायालयाचे दरवाजे ठोकणार असल्याचा पुनरुच्चार केला आहे.

सोनारपेठ मोजणीनंतर कारवाईला गती मिळण्याची शक्यता- दुसरीकडे, सोनारपेठ परिसरातील जमिनींची 2 नोव्हेंबरपासून होणारी शासकीय मोजणी आणि नगरपरिषदेने दिलेले 2 ऑक्टोबरपासूनच्या कारवाईचे आश्वासन यामुळे आता शेवगावातील अतिक्रमणांचा प्रश्न पूर्णपणे निकाली निघण्याची चिन्हे आहेत. नगरपरिषदेच्या या आश्वासनानंतर अखेर प्रशासकीय स्तरावर प्रत्यक्ष कारवाई सुरू होणार असल्याचे चित्र स्पष्ट होत आहे.

शेवगाव शहराचे नगरपरिषदेच्या कारवाईकडे लक्ष

नवराष्ट्रच्या प्रतिनिधीने याबाबत अनेकवेळा प्रभावी पाठपुराव्यामुळे आणि वंचित बहुजन आघाडीच्या आक्रमक भूमिकेमुळे नगरपरिषद प्रशासन खरंच सर्वपक्षीय आणि सर्वसमावेशक कारवाई करणार की पुन्हा कागदी घोडेच नाचवणार, याकडे संपूर्ण शेवगाव शहराचे लक्ष लागले आहे.

Navarashtra Impact: नवराष्ट्राच्या बातमीची दखल; शिवसैनिकांच्या दणक्यानंतर रामलीला गार्डनमध्ये आता रोज पोलिसांची गस्त