थायलंडमधील गणेशभक्ताकडून ‘दगडूशेठ’ला रुग्णवाहिका ; फुकेत येथील पापासॉर्ण मिपा यांच्यातर्फे ट्रस्टच्या सेवेत  दोन गाड्या दाखल

श्रीमंत दगडूशेठ गणपतीची ख्याती भारताबाहेरही आहे. थायलंड फुकेत येथून अनेक भाविक दरवर्षी पुण्यात दर्शनाला येतात. त्यातील एक भक्त, फुकेत येथील रहिवासी पापासॉर्ण मिपा यांनी दगडूशेठच्या सामाजिक कार्याला हातभार लावत जय गणेश रुग्णसेवा अभियानाकरिता दोन रुग्णवाहिका दिल्या आहेत.

पुणे : श्रीमंत दगडूशेठ गणपतीची ख्याती भारताबाहेरही आहे. थायलंड फुकेत येथून अनेक भाविक दरवर्षी पुण्यात दर्शनाला येतात. त्यातील एक भक्त, फुकेत येथील रहिवासी पापासॉर्ण मिपा यांनी दगडूशेठच्या सामाजिक कार्याला हातभार लावत जय गणेश रुग्णसेवा अभियानाकरिता दोन रुग्णवाहिका दिल्या आहेत.

श्रीमंत दगडूशेठ हलवाई सार्वजनिक गणपती ट्रस्ट, सुवर्णयुग तरुण मंडळाकडे पापासॉर्ण मिपा यांनी या रुग्णवाहिका सुपूर्द केल्या. यावेळी ट्रस्टचे अध्यक्ष माणिक चव्हाण, उपाध्यक्ष सुनील रासने, उत्सवप्रमुख अक्षय गोडसे यांसह मंडळाचे पदाधिकारी व कार्यकर्ते उपस्थित होते.

पापासॉर्ण मिपा म्हणाल्या, भारतीयांना आणि दगडूशेठ गणपती ट्रस्टच्या कार्याला मदत देण्याच्या उद्देशाने या रुग्णवाहिका मी देत आहे. ट्रस्ट गोरगरीब वंचितांना मदत देण्यासोबत विविध रुग्णालयांच्या माध्यमातून आरोग्यसेवा देत आहे. आमचे देखील भाग्य आहे की आम्ही ट्रस्टच्या या सामाजिक कार्याचा यामाध्यमातून छोटासा भाग होऊ शकलो.

कोण आहेत पापासॉर्ण मिपा
फुकेत मधील यशस्वी उद्योजिका म्हणून त्यांची ओळख आहे. फुकेत ९ रिअल इस्टेट डेव्हलपमेंट कंपनी त्यांची आहे. त्या फुकेत येथे श्रीमंत दगडूशेठ हलवाई गणपती मंदिरासारखे मंदिर उभारत आहेत. बांधकाम क्षेत्रात त्यांना मिळालेले यश हे दगडूशेठ गणेशामुळेच मिळाले असल्याची भावना त्यांनी पुण्यात व्यक्त केली. थायलंडहून अनेकांना पुण्यात दर्शनासाठी येण्याची इच्छा आहे, मात्र अंतर खूप असल्याने शक्य होत नाही. याकरिता मी फुकेत येथे मंदिर उभारत आहे, असे त्यांनी सांगितले.

ट्रस्टची अविरतपणे आरोग्यसेवा सुरु
दगडूशेठ सार्वजनिक गणपती ट्रस्टच्या जय गणेश रुग्णसेवा अभियान अंतर्गत भारती हॉस्पीटल रिसर्च सेंटर पुणे यांच्या संयुक्त विद्यमाने नुकतेच जय गणेश प्रांगण येथे मोफत आरोग्य शिबिराचे आयोजन करण्यात आले होते. त्यामध्ये ३७८ नागरिकांनी वैद्यकिय सुविधेचा लाभ घेण्यासाठी सहभाग नोंदविला. ११३ नागरिकांच्या विविध शस्त्रक्रिया मोफत करून देण्यात येणार आहेत. याशिबिरामध्ये आयुष्य भारत योजनेचे गोल्डन कार्ड ९२ लोकांना मोफत स्वरुपात काढून देण्यात आले. रुग्णसेवा अभियान अंतर्गत लायन्स क्लब आॅफ कात्रज पुणे यांच्या संयुक्त विद्यमाने गोकुळ नगर कात्रज कोंढवा रोड भागातील ६८ नेत्र रुग्णांची मोफत मोतीबिंदू शस्त्रक्रिया एच.व्ही.देसाई नेत्र रुग्णालय यांच्या वतीने करून देण्यात आली.