Amravati Hospital Fire: अंगावर काटा! व्हेंटिलेटरचा स्फोट, ३ नवजात बाळांचा मृत्यू; बाळांच्या कक्षात आग

Amravati Hospital Fire: महाराष्ट्रातील अमरावती जिल्हा महिला रुग्णालयाच्या NICU मध्ये पहाटे भीषण आग लागून ३ नवजात बालकांचा मृत्यू झाला. परिस्थिती अत्यंत गंभीर, नेमकी कशामुळे लागली आग?

• अमरावतीत हृदयद्रावक घटना

• एनआयसीयुमध्ये भीषण आग 

• ३ नवजात बाळांचा आगीत जळून मृत्यू 

Amravati Hospital Fire: महाराष्ट्रातील अमरावती जिल्ह्यातून एक महत्त्वपूर्ण बातमी समोर आली आहे. अमरावती जिल्हा महिला रुग्णालयाच्या नवजात अतिदक्षता विभागात (NICU) लागलेल्या आगीत तीन नवजात बालकांचा होरपळून मृत्यू झाला. पहाटे 3.30 वाजता नवजात शिशु अतिदक्षता विभागात अचानक व्हेंटिलेटरमध्ये स्फोट झाल्याने आग लागली, ज्यात तीन नवजात बालकांचा मृत्यू झाला. रुग्णालयात घबराट पसरली आणि आत असलेल्या रुग्णांना व मुलांना वाचवण्यासाठी सर्वजण धावपळ करू लागले. दरम्यान अनेक बालकांचा जीव वाचवण्यात रुग्णालयातील कर्मचाऱ्यांना यश मिळाले आहे असं सांगण्यात आलं आहे. 

रुग्णालयातील व्हेंटिलेटरमध्ये स्फोट

Amravati, Maharashtra: Three newborns died after a fire broke out in the Neonatal Intensive Care Unit (NICU) of Amravati District Women’s Hospital at around 3:30 AM. The fire reportedly started following an explosion in a ventilator on the hospital’s third floor, where 39… pic.twitter.com/Yde1uEk3W6 — IANS (@ians_india) August 24, 2026

मिळालेल्या माहितीनुसार, रुग्णालयाच्या तिसऱ्या मजल्यावर आग लागली. महिला जिल्हा रुग्णालयात, जिथे ३९ नवजात बालकांवर उपचार सुरू होते, तिथे एका मोठ्या स्फोटामुळे व्हेंटिलेटरला आग लागली. डॉक्टर आणि परिचारिकांनी तात्काळ सर्व बाळांना बाहेर काढण्याचा प्रयत्न केला.

यानंतर झालेल्या संघर्षात, डॉक्टर आणि परिचारिकांनी अनेक मुलांना वाचवण्यात यश मिळवले, परंतु दुर्दैवाने तिघांचा मृत्यू झाला. डॉक्टर, परिचारिका आणि रुग्णालयाच्या कर्मचाऱ्यांनी मुलांना सुरक्षितपणे बाहेर काढले, तर सहा नवजात बालकांना पुढील उपचारांसाठी सुपर-स्पेशालिटी रुग्णालयात हलवण्यात आले. दरम्यान, नवजात शिशु विभागात लागलेल्या आगीत वैद्यकीय उपकरणे आणि इतर साहित्य जळून खाक झाले. अथक प्रयत्नांनंतर आगीवर नियंत्रण मिळवण्यात आले. सुदैवाने, आग रुग्णालयाच्या खोल्यांपर्यंत पसरली नाही.

Amravati News: डोमा आश्रमशाळा पडली ओस! भीती, अफवांमुळे ६०० विद्यार्थ्यांचे गावाकडे पलायन; मेळघाटात अंधश्रद्धेचा कहर

डॉक्टरांनी काय सांगितले?

या घटनेनंतर मुलांच्या उपचारांवर देखरेख करणारे जिल्हा सिव्हिल सर्जन डॉ. विनोद पवार यांनी सांगितले की, काही मुलांना पीडीएमसी रुग्णालयात दाखल करण्यात आले आहे. सखोल तपासानंतरच आगीचे पूर्ण स्वरूप आणि तिचे कारण स्पष्ट होईल. या घटनेमुळे रुग्णालयाच्या सुरक्षा व्यवस्थेवर प्रश्नचिन्ह निर्माण झाले आहे.

नवनीत राणांंनी केली रुग्णालयाची पाहणी 

नवनीत राणा यांनी रुग्णालयाची या दरम्यान पाहणी केली असून रुग्णालयातील अग्निशामक यंत्रणेवर सवाल निर्माण केले आहेत. याशिवाय दोषींवर गुन्हा दाखल करण्याची मागणीही केली आहे. फायर ऑडिट झालं होतं की नाही याची माहितीदेखील द्यावी असंही यावेळी नवनीत राणा यांनी सांगितलं. तसंच आरोग्यमंत्री प्रकाश आबिटकर यांच्याशी संवाद साधत या प्रकरणाबाबत सखोल चौकशी करावी असंही मत त्यांनी यावेळी मांडलं 

अमरावती जिल्हाधिकारी आशिष येरेकरांनी दिली माहिती 

एनआयसीयू विभागात ही दुर्घटना घडली. त्या वेळी तिथे एकूण ३९ बालके दाखल होती. आगीत आणि धुरामुळे ३ बालकांचा मृत्यू झाला, तर उर्वरित ३६ बालकांना सुरक्षित बाहेर काढण्यात आले. सुरक्षित काढलेल्या बालकांवर तातडीने उपचार सुरू असून त्यांना शहरातील विविध रुग्णालयांत हलवण्यात आले आहे अशी माहिती अमरावती जिल्हाधिकारी आशिष येरेकर यांनी दिली आहे. 

• पंजाबराव देशमुख रुग्णालय: ११ बालके
• सुपर स्पेशालिटी हॉस्पिटल: ५ बालके
• मुरके हॉस्पिटल: ८ बालके
• होप हॉस्पिटल: ६ बालके
• पारिजात हॉस्पिटल: २ बालके
• मातेसोबत ठेवण्यात आलेली बालके: ४ बालके

स्थलांतरित केलेल्या सर्व बालकांवर पूर्णपणे मोफत उपचार करण्याचे कडक निर्देश सर्व संबंधित खाजगी व सरकारी रुग्णालयांना देण्यात आले आहेत; पालकांकडून कोणतेही शुल्क आकारले जाणार नाही.

Amravati News: तीन दूध डेअरींमधील नमुने प्रयोगशाळेत! एनालॉग पनीरविरोधात एफडीएची मोहीम; पुरवठादारही रडारवर

पोलीस आणि फॉरेन्सिक टीमने घटनास्थळाची पाहणी केली 

उपकरणांचा पुरवठा करणाऱ्या ‘शिलर’ (Schiller) कंपनीच्या नागपूर येथील पुरवठादारांना उपकरणांच्या तांत्रिक तपासणीसाठी बोलावण्यात आले आहे. स्प्रिंकलर/फॉगर यंत्रणा का कार्यान्वित झाली नाही, तसेच फायर ऑडिटची सद्यस्थिती काय आहे, याची सखोल चौकशी केली जाईल. आरोग्यमंत्री आणि पालकमंत्र्यांना घटनेची माहिती देण्यात आली असून, आरोग्यमंत्री आज दुपारी रुग्णालयाला भेट देणार आहेत.