शनिवार, 7 नोव्हेंबर 2026
सोलापूर : कराड डेपोची बस सोलापूर बस स्थानकातून उस्मानाबादला निघाली होती. नेमकं त्याचदरम्यान एसटीतील प्रवाशाने बस काही अंतरावर गेल्यावर विष प्राशन (Attempted Suicide) केले. ही बाब चालक आणि वाहकाच्या लक्षात येताच त्यांनी प्रसंगावधान राखत एसटी बस थेट सोलापुरातील सिव्हिल हॉस्पिटलकडे वळवली अन् संबंधित प्रवाशाला तातडीचे उपचार दिले.
सोलापूर बस स्थानकात कराड डेपोची बस दुपारच्या सुमारास दाखल झाली. ही बस दीडच्या दरम्यान सोलापूर बस स्थानकातून निघाली. बस काही अंतरावर गेल्यानंतर बसमधील प्रवासी सिद्धेश्वर स्वामी (वय 53 वर्ष, द्वारका नगरी, विजापूर रोड, सोलापूर शहर) याने विष प्राशन केल्याची बाब लक्षात आली. सिद्धेश्वर यास मोठा खोकला येत होता आणि बसमध्ये विषारी औषधाचे उग्र वास येत होते. हे एसटी कर्मचाऱ्यांना समजले असता त्यांनी तातडीने सोलापूर बसस्थानक प्रमुखाला माहिती दिली आणि रुग्णवाहिकेला याबाबत माहिती देऊन बोलावून घेतले.
रुग्णवाहिकेऐवजी एसटीच नेली रुग्णालयात
उस्मानाबादकडे निघालेली बस काही अंतरावर गेली असता कंडक्टरच्या लक्षात आले त्यांनी रुग्णवाहिका बोलावली. मात्र, सिद्धेश्वर स्वामी यांचे वजन भारी असल्याने त्यांना बसमधून बाहेर काढता आले नाही. वाहक आणि चालकाने एसटी बस थेट सिव्हिल हॉस्पिटलला आणली. सिव्हिल हॉस्पिटलमधील इतर कर्मचाऱ्यांच्या मदतीने प्रवाशास बाहेर काढले आणि रुग्णालयात उपचारासाठी दाखल केले. मात्र, प्रवाशाची प्रकृती गंभीर असून, तो सध्या बेशुद्ध आहे.
