बारामती / नवराष्ट्र न्यूज नेटवर्क : आगामी लोकसभा निवडणुकीसाठी महायुतीच्या उमेदवार सुनेत्रा पवार (Sunetra Pawar) यांच्या प्रचारासाठी बारामती विधानसभा मतदारसंघाच्या प्रचारप्रमुखपदी माळेगाव कारखान्याचे माजी अध्यक्ष बाळासाहेब तावरे यांच्या नावाची घोषणा करण्यात आली आहे.
राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनी बाळासाहेब तावरे यांची मंगळवारी भेट घेऊन, त्यांना तुम्ही माझ्यासह सुप्रिया सुळे यांच्याबरोबर आहात, असे समजतो, असे म्हटले होते. त्यामुळे बाळासाहेब तावरे शरद पवार गटामध्ये सहभागी होतात काय, याबाबत चर्चेला उधाण आले होते. मात्र, बाळासाहेब तावरे हे राष्ट्रवादी काँग्रेसचे अध्यक्ष व उपमुख्यमंत्री अजित पवार यांच्याबरोबर कायम राहणार असल्याचे स्पष्ट झाले आहे. त्यांची सुनेत्रा पवार यांच्या प्रचारासाठी बारामती विधानसभा मतदारसंघाच्या प्रचार प्रमुखपदी निवड करण्यात आली आहे.
प्रत्येक विधानसभा मतदारसंघनिहाय प्रचारप्रमुखाची नियुक्ती केली जाणार असून, बारामती विधानसभा मतदारसंघाच्या प्रचारप्रमुखपदाची जबाबदारी बाळासाहेब तावरे यांच्यावर सोपविण्यात आली आहे.
दरम्यान, सुनेत्रा पवार यांचा उमेदवारी अर्ज गुरुवारी १८ एप्रिल रोजी विभागीय आयुक्त कार्यालयात भरला जाणार आहे. या अगोदर सकाळी साडेनऊ वाजता पुणे जिल्हा परिषदेजवळ पुना क्लबच्या समोर जाहीरसभेचे आयोजन करण्यात आले आहे.
मुख्यमंत्री एकनाथ शिंदे, उपमुख्यमंत्री देवेंद्र फडणवीस व अजित पवार, प्रफुल्ल पटेल, सुनील तटकरे, चंद्रकांत पाटील, दिलीप वळसे पाटील, खासदार मेधा कुलकर्णी, रुपाली चाकणकर, प्रदीप रावत, अनिल शिरोळे, संजय काकडे, हर्षवर्धन पाटील, विजय शिवतारे यांच्यासह आमदार दत्तात्रय भरणे, भीमराव तापकीर, दिलीप मोहिते पाटील, महेश लांडगे, राहुल कुल, सुनील शेळके, अतुल बेनके, सुनील टिंगरे, चेतन तुपे, माधुरी मिसाळ, अश्विनी जगताप, सिध्दार्थ शिरोळे, सुनील कांबळे, अण्णा बनसोडे यांच्यासह अनेक मान्यवर उपस्थित राहणार आहेत, अशी माहिती किरण गुजर यांनी दिली.
.png "Videos"){kind=small}
