अचानक खाली पडला तरुण; प्रत्यक्षदर्शींनी धाव घेत वाचवला जीव, उड्डाणपुलावर नेमकं काय घडलं?
परळी : बीड जिल्ह्यातील परळी शहरात श्यामाप्रसाद मुखर्जी उड्डाणपुलावरून एका तरुणाने उडी घेतल्याची धक्कादायक घटना समोर आली आहे. या घटनेत तरुण गंभीर जखमी झाला असून, त्याच्यावर परळी येथील उपजिल्हा रुग्णालयात उपचार सुरू आहेत. घटनेमुळे परिसरात खळबळ उडाली आहे. मिळालेल्या माहितीनुसार, संबंधित तरुण उड्डाणपुलावर गेला आणि अचानक खाली उडी घेतली. हा प्रकार तेथून जाणाऱ्या नागरिकांच्या लक्षात येताच त्यांनी तातडीने घटनास्थळी धाव घेतली. गंभीर जखमी अवस्थेत असलेल्या तरुणाला नागरिकांनी तातडीने परळीच्या उपजिल्हा रुग्णालयात दाखल केले.
सध्या तरुणाची प्रकृती चिंताजनक असल्याची माहिती असून, डॉक्टरांचे पथक त्याच्यावर उपचार करत आहे. दरम्यान, या घटनेमागील नेमके कारण अद्याप समोर आलेले नाही. कौटुंबिक, आर्थिक किंवा वैयक्तिक कारणातून त्याने हे टोकाचे पाऊल उचलले का, याचा तपास केला जात आहे. घटनेची माहिती मिळताच स्थानिक पोलिसांनी घटनास्थळी तसेच उपजिल्हा रुग्णालयात भेट दिली. तरुणाची ओळख पटवण्यासह त्याच्या नातेवाइकांशी संपर्क साधण्याचे प्रयत्न सुरू आहेत. या प्रकरणाचा पुढील तपास पोलिसांकडून केला जात आहे.
.png "Videos"){kind=small}
