अनेक मंडळी येतात अन् गप्पा मारतात, आश्वासने देणाऱ्यांना आता…; रवींद्र चव्हाणांची शिवतारेंवर सडकून टीका

भाजपचे प्रदेशाध्यक्ष रवींद्र चव्हाण यांनी आमदार विजय शिवतारे यांच्यावर नाव न घेता सडकून टीका केली आहे. सासवड स्मार्ट करण्यासाठी आम्ही कटिबद्ध असल्याचे त्यांनी यावेळी सांगितले.

• अनेक मंडळी येतात अन् गप्पा मारतात
• आश्वासने देणाऱ्यांना आता उभे करु नका
• रवींद्र चव्हाणांची शिवतारेंवर सडकून टीका

सासवड : सध्या निवडणुकीचा काळ आहे आणि अनेक मंडळी येतात गप्पा मारतात, ती राजकारणी आहेत त्यांना आश्वासन द्यायची असतात, त्यांच्या भूलथापांना बळी पडू नका. त्यांना अजिबात उभे करू नका. वसुदैव कुटुंबंम या प्रेरणेने पंतप्रधान नरेंद्र मोदी आणि भाजप केवळ देशात नाही तर संपूर्ण जगात काम करीत आहेत. काही मंडळी निवडणुकीच्या काळात फक्त आश्वासन देतील; मात्र काम काहीच करणार नाही, अशा शब्दात भाजपचे प्रदेशाध्यक्ष रवींद्र चव्हाण यांनी आमदार विजय शिवतारे यांच्यावर नाव न घेता सडकून टीका केली आहे. सासवड स्मार्ट करण्यासाठी आम्ही कटिबद्ध असल्याचे त्यांनी यावेळी सांगितले.

सासवड नगरपरिषद सार्वत्रिक निवडणूक निमित्त भाजप उमेदवारांच्या प्रचारानिमित्त रवींद्र चव्हाण यांनी सासवडमध्ये रोड शो केला. त्यानंतर धान्य बाजार मध्ये झालेल्या जाहीर सभेत आमदार विजय शिवतारे यांच्यावर विविध प्रश्नांवरून जोरदार तोफ डागली. यावेळी भाजपचे प्रदेश महामंत्री राजेश पांडे, माजी आमदार संजय जगताप, आमदार योगेश टिळेकर, अशोक टेकवडे, दौलत शितोळे, मार्तंड भोंडे, दिलीप गिरमे, गणेश जगताप, शेखर वढणे, आनंद जगताप यांच्यासह भाजपचे पदाधिकारी, कार्यकर्ते उपस्थित होते.

जगतापांनी घेतला शिवतारेंचा समाचार

माजी आमदार संजय जगताप यांनी आमदार विजय शिवतारे यांचा जोरदार समाचार घेतला. आपण मंत्री होता, सरकार होते. मात्र, सासवडला निधी देताना कायम सापत्न भावाची वागणूक दिल्याचा आरोप केला. आम्ही स्वच्छतेतून पुरस्कार मिळवला. वीरची पाणी योजना आम्हीच नव्याने केली. मात्र, त्यांनी जाणून बुजून दोन वर्षे वर्क ऑर्डर काढली नाही. नंतर आचारसंहिता लागली. आणि त्याचे श्रेय तुम्ही घेता? यापूर्वी सासवडला नियमित पाणी मिळत होते.

पदे मिळल्यावर कामे करा

कचरा गाडी वेळेवर येत होती, मात्र काही लोकांनी जाणीवपूर्वक सासवड घाण करण्याचे काम केले. मागील तीन चार महिन्यात ज्यांनी सासवडचे नियोजन बिघडवले ते आपल्यासमोर उभे आहेत. आम्हाला नगरसेवक पदाची बिरुदावली मिरवायची नाही तर लोकांची कामे करायची आहेत. मात्र, काही लोकांना फक्त राजकारण करायचे आहे, अशा शब्दात नाव न घेता विजय शिवतारे यांच्यावर चौफेर टीकास्त्र सोडले.

झोपडपट्टी मुक्त सासवड करायचे

पिंपळे येथे दोन कोटी आणि वाघ डोंगर येथे दोन कोटी लिटर पाण्याचा साठवण तलाव करणार आहे. सासवडमधील सर्व रस्ते सिमेंट काँक्रिटचे होणार आहेत. सर्व विजेच्या तारा अंडर ग्राउंड करणार आहे. सध्या सात मजलेपर्यंत बांधकाम करण्याची परवानगी असून, आगामी काळात विमानतळ प्रकल्प होत आहे. १०, ११ मजलेपर्यंत बांधकाम करता येणार आहे. आम्हाला झोपडपट्टी मुक्त सासवड करायचे आहे. प्रत्येक व्यक्तीला पंतप्रधान आवास योजना अंतर्गत घरकुल द्यायचे आहे. असे आश्वासन संजय जगताप यांनी यावेळी दिले.