Chandrapur News: विहिरींची कामे पूर्ण करूनही अनुदानाची प्रतीक्षा; ग्रामपंचायतीला निधी मिळाला, पण शेतकऱ्यांच्या खात्यात रक्कम नाही

पारडी (ठवरे) ग्रामपंचायतीतील मग्रारोहयोच्या वैयक्तिक लाभाच्या सिंचन विहिरींची कामे २०२५ मध्ये पूर्ण झाली. संबंधित अनुदानाची रक्कम ग्रामपंचायतीला प्राप्त झाली आहे. मात्र अद्याप ही रक्कम लाभार्थ्यांना मिळालेली नाही.

• पारडी (ठवरे) येथील चार लाभार्थ्यांनी २०२५ मध्ये सिंचन विहिरींची कामे पूर्ण करूनही अद्याप अनुदान मिळालेले नाही.
• ग्रामपंचायतीला अनुदानाचा निधी प्राप्त झाला असला तरी प्रशासकीय आणि आर्थिक मर्यादांमुळे लाभार्थ्यांच्या खात्यावर रक्कम वर्ग करता आलेली नाही.
• शिवसेना तालुका प्रमुख गिरीश नवघडे यांनी लाभार्थी शेतकऱ्यांसह जिल्हाधिकाऱ्यांची भेट घेऊन अनुदानाची रक्कम तातडीने देण्याची मागणी केली आहे.

नागभीड: महात्मा गांधी राष्ट्रीय ग्रामीण रोजगार हमी योजनेंतर्गत (मग्रारोहयो) पूर्ण करण्यात आलेल्या वैयक्तिक सिंचन विहिरींचे अनुदान ग्रामपंचायतीच्या खात्यात जमा झाले असतानाही संबंधित शेतकऱ्यांच्या खात्यावर रक्कम वर्ग झालेली नसल्याने पारडी (ठवरे) येथील चार लाभार्थी अडचणीत सापडले आहेत. स्वतःच्या पैशातून विहिरींची कामे पूर्ण केल्यानंतरही अनुदानासाठी प्रतीक्षा करावी लागत असल्याने शेतकऱ्यांनी प्रशासनाकडे दाद मागितली आहे.

Raigad News: महाडमध्ये प्रथमच जिल्हा परिषदेचा भव्य शैक्षणिक सोहळा; १६ आदर्श शिक्षकांसह ३२२ गुणवंत विद्यार्थ्यांचा होणार गौरव

पारडी (ठवरे) ग्रामपंचायतीतील मग्रारोहयोच्या वैयक्तिक लाभाच्या सिंचन विहिरींची कामे २०२५ मध्ये पूर्ण झाली. देवराम काशिनाथ ठवरे, होमदेव गोपाळा मेश्राम, श्यामला तुकाराम भोयर आणि निशिकांत पुरुषोत्तम रणदिवे या चार लाभार्थ्यांनी कामे पूर्ण केल्यानंतर अनुदानाची प्रतीक्षा केली. संबंधित अनुदानाची रक्कम ग्रामपंचायतीला प्राप्त झाल्याचे सांगण्यात येत असले तरी लाभार्थ्यांना अद्याप त्याचा लाभ मिळालेला नाही. ग्रामपंचायतीवर १६ फेब्रुवारीपासून प्रशासक असल्याने निर्माण झालेल्या प्रशासकीय व आर्थिक अडचणींचा फटका लाभार्थ्यांना बसत असल्याचे समोर आले आहे. त्यामुळे निधी उपलब्ध असूनही प्रत्यक्ष लाभार्थ्यांपर्यंत तो पोहोचत नसल्याची स्थिती आहे.

अनुदानासाठी वारंवार पाठपुरावा करूनहीं प्रश्न सुटत नसल्याने लाभार्थ्यांनी शिवसेना तालुका प्रमुख गिरीश नवघडे यांच्याकडे आपली समस्या मांडली. त्यानंतर नवघडे यांनी लाभार्थी शेतकऱ्यांसह चंद्रपूर येथे जिल्हाधिकाऱ्यांची भेट घेऊन निवेदन सादर केले. सिंचन विहिरींची कामे पूर्ण करूनही अनुदानापासून वंचित असलेल्या शेतकऱ्यांचा प्रश्न तातडीने सोडवून रक्कम त्यांच्या खात्यावर जमा करण्याची मागणी त्यांनी केली.

Ganeshotsav 2026 : Mira Bhayandar मध्ये गणेशमूर्ती विसर्जनासाठी 24 ठिकाणी व्यवस्था; 19 कृत्रिम अन् ५ नैसर्गिक जलस्रोतांचा समावेश

ग्रामपंचायत पारडी (ठवरे) येथे १६ फेब्रुवारीपासून प्रशासक आहे. प्रशासकांना स्वच्छता, पाणीपुरवठा आणि कर्मचाऱ्यांचे वेतन याव्यतिरिक्त इतर आर्थिक व्यवहार करण्यावर मर्यादा आहेत. त्यामुळे सिंचन विहिरीच्या लाभार्थ्यांना अनुदान वितरित करता आलेले नाही. पुढील आदेश प्राप्त झाल्यानंतरच याबाबत आर्थिक कार्यवाही करता येईल- दिनेश येरणे, ग्रामसेवक, पारडी (ठवरे)

(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)