मंगळवार, 3 नोव्हेंबर 2026
फोटो सौजन्य सोशल मिडिया
गंगापूर तालुक्यातील लासूर स्टेशन येथील रवी ऑइल इंडस्ट्रीज या आस्थापनेची अन्न सुरक्षा अधिकारी प्रज्ञा सुरसे यांनी आकस्मिक तपासणी केली. या तपासणीत आस्थापनेला अन्नसुरक्षेच्या निकषांवर एकूण ८६ पैकी केवळ ३० गुण म्हणजेच ३५ टक्के गुण मिळाले. तपासणीदरम्यान परवान्यात व्यवसायाची नोंद ‘जनरल मॅन्युफॅक्चरिंग’ अशी असताना प्रत्यक्षात केवळ ‘रिपॅकर’ म्हणून काम सुरू असल्याचे आढळले. व्यवसायाच्या स्वरूपातच तफावत असल्याचे प्रशासनाच्या निदर्शनास आले.
दुसरी कारवाई सुंदरवाडी येथील केंब्रिज स्कूलजवळ असलेल्या मेसर्स दिव्य महावितरक या पतंजली आयुर्वेदच्या सुपर डिस्ट्रीब्युटरच्या गोदामात करण्यात आली. संबंधित आस्थापना विजय कडुबा जाधव यांच्या मालकीची असल्याची माहिती प्रशासनाने दिली. येथे विक्रीसाठी ठेवलेल्या पतंजली गायीच्या तुपाच्या दोन बॅचमधील साठ्यावर भेसळयुक्त असल्याचा संशय व्यक्त करण्यात आला.
अन्न सुरक्षा अधिकाऱ्यांनी केलेल्या तपासणीत ‘काऊ घी ०१’ या उत्पादनाच्या एनसीडीएफ २६०१७० बॅचमधील २,९९८ युनिट्स म्हणजेच १,३४९.१ लिटर तूप आढळले. त्याची किंमत १२ लाख २९ हजार १८० रुपये आहे. तर ‘काऊ घी ०२’ या एनसीडीजी २६०११५ बॅचमधील १,०३४ युनिट्स म्हणजेच ९३०.६ लिटर तूप आढळले.
अन्नसुरक्षा आणि मानके कायदा, २००६ मधील तरतुदीनुसार हा साठा जप्त करून सुरक्षित ताब्यात ठेवण्यात आला आहे. संबंधित तुपाचे नमुने प्रयोगशाळेत तपासणीसाठी पाठविण्यात येणार आहेत. प्रयोगशाळेचा अहवाल प्राप्त झाल्यानंतर उत्पादनाव्या गुणवत्तेबाबत स्पष्टता येईल आणि त्यानुसार पुढील कायदेशीर कारवाई केली जाणार आहे.
