भोंदू बाबा प्रकरणावर संजय शिरसाट कडाडले!
शनिवारी (दि.२१) पालकमंत्री शिरसाट यांनी विविध विषयांवर प्रसारमाध्यमांशी संवाद साधला. यावेळी ते बोलत होते. सध्या नाशिक येथील कथित ज्योतिष अशोक खरात याच्यासोबत लोकप्रतिनिधींचे असलेले फोटो व्हायरल होत असून, याची चर्चा सुरु आहे. यावर मंत्री शिरसाट यांनी आपले मत व्यक्त केले. शिरसाट म्हणाले, राजकारणात अनेकांशी लोकप्रतिनिधींचा संपर्क येत असतो. येणाऱ्या माणसाच्या मनात काय आहे, तो काय उद्योग करतो, हे माहित नसते. मात्र हे माहित असूनही कोणी साथ देत असले तर तो गुन्हा ठरतो. त्याची चौकशी झाली पाहिजे. व्हायरल झालेल्या व्हिडिओमध्ये निचपणाचा कळस दिसतो. धर्माच्या नावावर असा प्रकार महाराष्ट्राला कलंक आहे. यावर सरकारने कडक कारवाई केली पाहिजे. त्या भोंदूबाबासोबत अनेक मोठ्या नेत्यांचे फोटो आहेत. चुकीच्या माणसाला भेटल्याचा पश्चाताप नंतर होतो. आता खरातचा रामराहीम झाल्याशिवाय राहणार नाही. अनेक वर्षे त्याला तुरुंगात काढावे लागतील. सरकारने याची सखोल चौकशी केली पाहिजे, अशी भूमिका त्यांनी मांडली.
Nashik News : मंदिराच्या आडून कुकर्माचा आरोप; बाबा खरातला फाशी द्या, मिरगावात संताप
छत्रपती संभाजीनगर जिल्हा परिषद अध्यक्ष, उपाध्यक्षपद निवडीत झालेल्या घटनांची माहिती पक्षाप्रमुख एकनाथ शिंदे यांच्या कानावर पोहोचली आहे. कोणी काय केले, याची माहिती त्यांना मिळाली आहे. त्यामुळे ते योग्य त्या व्यक्तीला योग्य ती समज समज ते देतील, अशी खात्री असल्याचेही मंत्री शिरसाट म्हणाले.
निसर्गापुढे माणूस हतबल असतो. मागील तीन दिवस झालेल्या अवकाळी पावसामुळे शेतकऱ्यांचे मोठे नुकसान झाले. शेतकरी हतबल झालेला असला तरी शासन त्यांना वाऱ्यावर सोडणार नाही. लवकरच या अवकाळीचा पंचनामे करून बाधित शेतकऱ्यांना नुकसानभरपाई दिली जाणार असल्याचे आश्वासन पालकमंत्र्यांनी दिले. पूर्वी प्रचंड पाऊस झाला, तेव्हा सरकारने २० हजार कोटींची मदत केली होती. यंदाही सरकारने पंचनामे सुरु केले असल्याचे मंत्री म्हणाले.
एमआयएमचे प्रदेशाध्यक्ष इम्तियाज जलिल यांनी घरकुल योजनेच्या निधी वितरणात बोगसगिरी झाल्याचा आरोप केला होता. यावर बोलताना पालकमंत्री म्हणाले, माझ्या खात्यातर्फे म्हणजेच सामाजिक न्याय विभागातर्फे रमाई आवास योजनेला निधी दिला जातो. त्यापुढील प्रक्रिया करण्याचे काम महापालिका आणि जिल्हा परिषदेने करायचे असते. आम्ही फक्त निधी देतो, मात्र यात पुढे निधी वितरित करताना कोणाची फसवणूक झाली असेल तर यावर निश्चितपणे कारवाई केली जाईल, असे स्पष्टीकरण शिरसाट यांनी दिले.
.png "Videos"){kind=small}
