महापालिका निवडणुकीसाठी काँग्रेसची जोरदार तयारी; 40 स्टार प्रचारकांची यादी जाहीर

आढावा बैठका व रणनितीवर सविस्तर चर्चा केल्यानंतर आता ४० स्टार प्रचारकांची यादी काँग्रेसने जाहीर केली आहे.

• महापालिका निवडणुकीसाठी काँग्रेसची जोरदार तयारी
• 40 स्टार प्रचारकांची यादी जाहीर
• बैठका व रणनितीवर चर्चा केल्यानंतर निर्णय

मुंबई : महापालिका निवडणुकीसाठी सर्व राजकीय पक्षांनी जोरदार तयारीला सुरुवात केली आहे. अनेक इच्छुक उमेदवारांकडून जोरदार प्रचार सुरु आहे. कार्यकर्ते अनेक वर्ष महापालिका निवडणुकीची वाट पाहत होते. अखेर महापालिका निवडणूक लवकरच होणार आहे. राज्यातील २९ महानगरापालिकांच्या निवडणुकीसाठी काँग्रेस पक्षानेही जय्यत तयारी केली आहे. आढावा बैठका व रणनितीवर सविस्तर चर्चा केल्यानंतर आता ४० स्टार प्रचारकांची यादी काँग्रेसने जाहीर केली आहे.

स्टार प्रचारकांच्या यादीत प्रभारी रमेश चेन्नीथला, प्रदेशाध्यक्ष हर्षवर्धन सपकाळ, विधिमंडळ पक्षनेते आमदार विजय वडेट्टीवार, खासदार छत्रपती शाहू महाराज, विधान परिषदेतील गटनेते आमदार सतेज ऊर्फ बंटी पाटील, राष्ट्रीय सरचिटणीस खासदार मुकुल वासनीक, तेलंगणाचे मुख्यमंत्री रेवंत रेड्डी, माजी मुख्यमंत्री पृथ्वीराज चव्हाण, राजस्थानचे माजी उपमुख्यमंत्री सचिन पायलट, काँग्रेस कार्य समितीचे सदस्य बाळासाहेब थोरात, तेलंगणाचे मंत्री मोहम्मद अझरुद्दीन, खासदार रजनीताई पाटील, गोव्याचे प्रभारी माणिकराव ठाकरे, माजी प्रदेशाध्यक्ष नाना पटोले, अल्पसंख्याक विभागाचे राष्ट्रीय अध्यक्ष व राज्यसभा खासदार इम्रान प्रतापगढी, राज्यसभा खासदार चंद्रकांत हंडोरे, अखिल भारतीय कार्य समितीचे सदस्य नसीम खान, अभिनेते व काँग्रेस नेते राज बब्बर, अखिल भारतीय कार्य समितीच्या सदस्या यशोमती ठाकूर, खासदार प्रणिती शिंदे, आमदार अमिन पटेल, माजी मंत्री डॉ. नितीन राऊत, माजी मंत्री सुनिल केदार, आमदार अमित देशमुख, आ. डॉ. विश्वजित कदम, आमदार भाई जगताप, अनिस अहमद, माजी मंत्री रमेश बागवे, माजी खासदार हुसेन दलवाई, आ. साजिद खान पठाण, कन्हैया कुमार, आमदार जिग्नेश मेवाणी, माजी मंत्री वसंत पुरके, माजी आमदार मुजफ्फर हुसेन, एम.एम. शेख, प्रदेश उपाध्यक्ष मोहन जोशी, अल्पसंख्याक विभागाचे अध्यक्ष वजाहत मिर्झा, वरिष्ठ प्रवक्ते अतुल लोंढे, प्रदेश उपाध्यक्ष सिद्धार्थ हत्तीअंबिरे व हनुमंत पवार यांचा या यादीत समावेश आहे.

मुंबई महापालिकेत काँग्रेस एकटी लढणार?

मुंबई महापालिकेसाठी सर्वच पक्षांनी कंबर कसली आहे. दोन्ही ठाकरे बंधू एकत्र आले आहेत. तर राष्ट्रवादीला सोबत घेण्याची तयारी सुरू आहे. दुसरीकडे काँग्रेसने मुंबईत स्वबळाचा नारा दिला आहे. महाविकास आघाडीसोबत न जाता एकला चलो रेचा निर्णय घेतला आहे. पण त्यांना वंचित बहुजन आघाडीसोबत युती हवी आहे. त्यावर चर्चा सुरू असतानाच आता वंचितकडून दिलेल्या प्रस्तावामुळे काँग्रेस पेचात अडकली आहे. प्रकाश आंबेडकर यांनी ताणल्यामुळे काँग्रेसचे टेन्शन वाढले आहे. मुंबई महापालिका निवडणूक काँग्रेसला एकट्यानेच लढवावी लागते की काय असा प्रश्न विचारला जातोय.